بيىل بىرىككەن ۇلتتار ۇيىمىنىڭ قۇرىلعانىنا 75 جىل تولادى. وسىعان وراي كۇنى كەشە مەملەكەت باسشىسى قاسىم-جومارت توقاەۆ بۇۇ باس حاتشىسى انتونيۋ گۋتەرريشكە قۇتتىقتاۋ جەدەلحاتىن جولدادى.

- بۇگىندە بىرىككەن ۇلتتار ۇيىمىنا مۇشە بارلىق مەملەكەتتەر وتكەن كۇندەرگە كوز جۇگىرتە وتىرىپ، ۇيىمنىڭ وسى ۋاقىت ارالىعىندا قول جەتكىزگەن ۇزدىكسىز ىلگەرىلەۋدىڭ جارقىن جولىن ماقتانىشپەن باعالايتىنى انىق. بارشا جاھان جۇرتى قازىرگىدەي باستان كەشىپ وتىرعان ەكونوميكا مەن گەوساياساتتاعى، اسىرەسە، دەنساۋلىق ساقتاۋ سالاسىنداعى اۋىر داعدارىستى باستان كەشىپ وتىرعان ساتتە، بىرىككەن ۇلتتار ۇيىمىنا ميلليونداعان ادامدار، ونىڭ ىشىندە وسال توپتار ۇلكەن ءۇمىت ارتادى،- دەلىنگەن حابارلامادا.

سونىمەن قاتار، قازاقستان پرەزيدەنتى بىرىككەن ۇلتتار ۇيىمى جۇيەسىنىڭ ەسەپ بەرەتىندىگى مەن تيىمدىلىگىن ءارى مامىلەگەرشىلىگىن ارتتىرۋعا ارنالعان انتونيۋ گۋتەرريشتىڭ اينىماس كۇش جىگەرى مەن ستراتەگياسىن تولىقتاي قولدايتىنىن ايتىپ ءوتتى.

- بىرىككەن ۇلتتار ۇيىمىنىڭ جارعىسىندا بەكىتىلگەن نەگىزگى ماقساتتار مەن قاعيداتتاردىڭ قورعالۋى مەن ساقالۋىنا ءبىز تىكەلەي جاۋاپتىمىز. بىرىككەن ۇلتتار ۇيىمىنىڭ قاۋىپسىز، تۇراقتى جانە ينكليۋزيۆتى بولاشاقتى قامتاماسىز ەتۋگە باعىتتالعان ءىس-ارەكەتتەرىن قازاقستان تولىعىمەن قولدايتىنىن جەتكىزگىم كەلەدى،-دەدى مەملەكەت باسشىسى.

سونداي-اق، اتالعان جەدەلحاتتا قاسىم-جومارت توقاەۆ بىرىككەن ۇلتتار ۇيىمىنىڭ بارشا قىزمەتكەرلەرى مەن توراعاسى انتونيۋ گۋتەرريشكە بارشا يگى باستامالارىنىڭ ءساتتى بولۋىنا نيەتتەس ەكەنىن جەتكىزدى.

ايتا كەتەيىك، قازاقستان اتالعان حالىقارالىق ۇيىمعا 1992 جىلدىڭ 2 ناۋرىزىنان باستاپ مۇشە بولدى. مۇنداي حالىقارالىق ۇيىمعا مۇشە بولۋ تاۋەلسىزدىگىن ەندى جاريالاعان جاس مەملەكەتكە ەكونوميكالىق-ساياسي، الەۋمەتتىك، مادەني-گۋمانيتارلىق، ەكولوگيالىق سيپاتتاعى حالىقارالىق ماسەلەلەردى شەشۋگە سونداي-اق، حالىقارالىق ىنتىماقتاستىقتى ورناتۋعا جاعداي جاسايدى.

بىرىككەن ۇلتتار ۇيىمىنا مۇشە بولعان كەزەڭدەردە قازاقستان ىسكە اسىرىلىپ جاتقان نەمەسە ءار جىلداردا جۇزەگە اسقان بىرنەشە باستامالاردى ۇسىندى. اتاپ ايتساق:

-ورتالىق ازيا ەكونوميكاسى ءۇشىن بىرىككەن ۇلتتار ۇيىمىنىڭ ارنايى باعدارلاماسىن قۇرۋ; (سپەكا)

-بىرىككەن ۇلتتار ۇيىمى “ريو + 20” ورنىقتى دامۋ جونىندەگى كونفەرەنتسياسىنىڭ قورىتىندى قۇجاتىندا نەگىزگى كومپونەنتتەرى كورىنىس تاپقان الەمدىك ەنەرگو-ەكولوگيالىق ستراتەگيانى ازىرلەۋ;

-سەمەي جانە ارال سياقتى ەكولوگيالىق تۇرعىدان اپاتتى ايماقتاردى قالپىنا كەلتىرۋ;

-29 تامىزدى حالىقارالىق يادورلىق سىناقتارعا قارسى كۇرەس كۇنى رەتىندە جاريالاۋ;

-اۋعانستانداعى جانە ورتالىق ازياداعى بىرىككەن ۇلتتار ۇيىمىنىڭ ايماقتىق تورابىن قۇرۋ جونىندەگى باستاما;

-مەملەكەت باسشىسىنىڭ “الەم. XXI عاسىر” مانيفەستى بىرىككەن ۇلتتار ۇيىمىنىڭ باسشىلىعىنا جىبەرىلدى جانە باس اسسامبليانىڭ قۇجاتى رەتىندە، سونداي-اق قاۋىپسىزدىك كەڭەسىنىڭ قۇجاتى رەتىندە S/2016/317 تىركەۋ نومەرلەرىمەن بىرىككەن ۇلتتار ۇيىمىنا مۇشە ەلدەر اراسىندا التى رەسمي تىلدە تارالدى;

-2010 جانە 2013-2022جىلداردى حالىقارالىق جىل جانە مادەنيەتتەردى جاقىنداستىرۋدىڭ حالىقارالىق ونجىلدىعى رەتىندە جاريالاۋ;

-ازياداعى ءوزارا ءىس-قيمىل جانە سەنىم شارالارى كەڭەسىن شاقىرتۋ ت.ب;

قازاقستان تاۋەلسىزدىك العاننان بەرى سىرتقى ساياساتتا كوپۆەكتورلى باعىتتى ۇستانىپ كەلەدى. ال، قر-دىڭ بىرىككەن ۇلتتار ۇيىمىنداعى نەگىزگى قىزمەتى ەكونوميكالىق دامۋ، قورشاعان ورتانى ساقتاۋ، بەيبىتشىلىك پەن قاۋىپسىزدىك، الەۋمەتتىك دامۋ، دەنساۋلىق ساقتاۋ مەن حالىقارالىق قۇقىق، سونىمەن قاتار گۋمانيتارلىق ماسەلەلەردىڭ شەشۋگە باعىتتالعان.

قازاقستان رەسپۋبليكاسى اتالعان حالىقارالىق ۇيىمعا مۇشە بولعاننان باستاپ بىرنەشە باعىتتا ايقىن بەلسەندى ۇستانىمىن كورسەتتى. سونداي-اق، قاۋىپسىزدىك سالاسىندا بىرقاتار باستامالار دا ۇسىندى.

Abai.kz