قازاقستان مۇسىلماندارى ءدىني باسقارماسى مۇحاممەد پايعامباردىڭ كاريكاتۋراسىن قايتا جاريالاعان «سharlie Hebdo» جۋرنالىنىڭ ءىس-ارەكەتىنە بايلانىستى مالىمدەمە جاسادى. رەسمي مالىمدەمەدە ءدىني باسقارما اتالعان جۋرنالدىڭ بۇل ارەكەتىنە كەلىسپەۋشىلىگىن بىلدىرگەن.

سونداي-اق، مۇسىلمانداردى ءتۇرلى ارانداتۋشىلىق ارەكەتتەرگە بەرىلمەي، بارلىق امالداردىڭ شاريعات ءارى زاڭ شەڭبەرىندە شەشىلۋى ءتيىس ەكەندىگىن جەتكىزەگەن.

قمدب مالىمدەمەسى

قۇرمەتتى مۇسىلمان قاۋىم!

سوڭعى كەزدەرى ءسوز ەركىندىگى مەن دەموكراتيانى جامىلعاندار جەكەلەگەن ەتنوستاردى نەمەسە كونفەسسيالاردى بالاعاتتاۋ، كەمسىتۋ، ارانداتا باستادى. ارينە، مۇنداي جاعداي كوپشىلىك ەلدەردى، حالىقتاردى جانە ءتۇرلى ءدىن وكىلدەرىن قاتتى الاڭداتادى. بۇل ءبىر جاقتان، راديكالدىق كوزقاراس پەن لاڭكەستىكتى، ەكىنشى جاقتان، كونفەسسياارالىق وشپەندىلىك پەن ارازدىقتى تۋدىرۋدا.

جۋىردا فرانتسيانىڭ «Charlie Hebdo» جۋرنالىنىڭ مۇحاممەد پايعامباردىڭ (وعان اللانىڭ سالاۋاتى مەن سالەمى بولسىن) كەلەمەج سۋرەتىن سالۋى جانە كەيبىر بيلىك وكىلدەرىنىڭ ايتقان قيسىنسىز پىكىرى الەمدەگى بارلىق مۇسىلمانداردىڭ اشۋ-ىزاسىنا سەبەپ بولدى.

توزىمسىزدىك پەن وشپەندىلىكتىڭ الەۋمەتتىك-ەكونوميكالىق، ساياسي جانە زاڭنامالىق سەبەپتەرىنەن وزگە، قوعامدا قالىپتاسقان مادەني جانە رۋحاني قۇندىلىقتاردىڭ قۇلدىراۋىنا، قوعامنىڭ تۇتاستىعى مەن مادەنيەتارالىق قاتىناستىڭ بۇزىلۋىنا الىپ باراتىنى ءسوزسىز.

ايتسە دە، شىنايى مۇسىلمان ءوزىنىڭ پايعامبارىنا بولعان سۇيىسپەنشىلىگىن، ونىڭ ناعىز ۇمبەتى ەكەنىن سەنىمى مەن ىزگى ىستەرى، ادەپتىلىگى مەن كوركەم مىنەزى ارقىلى كورسەتەدى. سونىمەن قاتار، مۇسىلماندار ءوز ءدىنى مەن پايعامبارىن قورلاۋعا جول بەرمەيدى. سەبەبى، پايعامبارعا يمان كەلتىرۋمەن قاتار ونى قورعاۋ دا - مۇسىلماننىڭ مىندەتى.

پايعامبارىمىز (وعان اللانىڭ سالاۋاتى مەن سالەمى بولسىن): «سەندەردiڭ ەشقايسىلارىڭ مەنi اتا-اناسىنان، بالا-شاعاسىنان جانە بارلىق ادامزاتتان ارتىق جاقسى كورمەيiنشە، تولىق يمان كەلتiرگەن بولىپ سانالمايدى» دەگەن (مۋسليم).

وسى جاعدايعا بايلانىستى، قازاقستان مۇسىلماندارى ءدىني باسقارماسى ءوزىنىڭ كەلىسپەۋشىلىگىن بىلدىرەدى جانە مۇسىلمانداردى ءتۇرلى ارانداتۋشىلىق ارەكەتتەرگە بەرىلمەي، بارلىق امالداردىڭ شاريعات ءارى زاڭ شەڭبەرىندە شەشىلۋى ءتيىس ەكەندىگىن جەتكىزەدى.

ەلىمىزدەگى ءدىن وكىلدەرى مەن قاراپايىم حالىقتىڭ كەيبىر ساياسي كۇشتەر مەن ءتۇرلى راديكالدىق توپتاردىڭ قۇربانى بولىپ كەتپەۋىن قالايدى.

يسلام ءدىنى – وزگە مادەنيەتتەرگە توزىمدىلىگى مەن سۇحباتقا اشىقتىعىنىڭ ارقاسىندا كوپتەگەن ەلدەر مەن حالىقتاردىڭ جەرگىلىكتى مادەنيەتتەرىن بىرەگەي ارنادا توعىستىرعان ءدىن. سونداي-اق، يسلام ءدىنى باسقا دىندەرگە، كوسەمدەرى مەن عيباداتحانالارىنا قۇرمەتپەن قاراۋعا بۇيىرادى، كەز كەلگەن ءدىندى كەمسىتۋگە، ولاردىڭ ءدىني رامىزدەرىن بۇزۋعا تىيىم سالادى.

قۇرمەتتى باۋىرلار، ارداقتى اعايىن!

ءاربىر مۇسىلمان كەز كەلگەن ءدىن جانە ءدىني قاتىناستارعا قاتىستى ءسوز بولعاندا ماسەلەنىڭ نازىكتىگىن ەسكەرىپ، ونى ءتۇسىندىرۋ مەن تاراتۋدا ءوزىنىڭ ءرولى مەن قوعام الدىنداعى ازاماتتىق جاۋاپكەرشىلىگىن تەرەڭ سەزىنۋى ءتيىس.

وسى ءبىر جاعدايدا بارشا مۇسىلمان قاۋىمىن توزىمدىلىككە، پاراساتتىلىققا شاقىرا وتىرىپ، جاراتۋشى يەمىزدەن ەلىمىزگە تىنىشتىق، حالقىمىزعا اماندىق، اسىل ءدىنىمىزدىڭ وركەندەۋىن تىلەيمىز.

Abai.kz