قازاقستاندا احمەت بايتۇرسىنۇلىنىڭ ادىستەمەسىنە نەگىزدەلگەن جاڭا الىپپە مازمۇنى بەكىتىلدى. جاڭا وقۋلىق نەگىزىندە كەلەر وقۋ جىلى بالالار جاڭا الىپپەمەن وقىپ، جەلتوقساندا الىپپەمەن قوشتاسادى. بۇل تۋرالى ءبىلىم جانە عىلىم ۆيتسە-ءمينيسترى شولپان كارينوۆا ايتتى.

"جۇمىس توبى 20-دان ارتىق وتىرىس وتكىزدى. عىلىمي نەگىزگە، پراكتيكالىق قولدانىمعا بايلانىستى بىرنەشە ۇسىنىس ءتۇستى. سونىڭ ءبارى زەردەلەنىپ، وسى ۋاقىتقا دەيىن باعدارلاما، وقۋلىق جاساپ جۇرگەن ناقتى اۆتورلاردىڭ قاتىسۋىمەن جۇمىس توبى جۇمىسىن اياقتادى

ەكىنشى ماسەلە، الىپپەنىڭ وقۋ باعدارلاماسىنا قاتىستى وقۋلىقتار ازىرلەۋ جۇمىسى باستالدى. بۇل جۇمىستىڭ سوڭى رەتىندە الداعى 2021 جىلدىڭ قاڭتار ايىندا وقۋلىقتار اپروباتسياعا ەنگىزىلەدى. ول ءۇشىن بعم اپروباتسيا وتكىزەتىن پيلوتتىق مەكتەپتەردىڭ ءتىزىمىن بەكىتتى. وسى بەكىتىلگەن مەكتەپتەردە الىپپەنىڭ باعدارلاماسى بىرىنشىدەن زەردەلەنەتىن بولادى. سودان كەيىن وقۋلىق ازىرلەۋگە بايلانىستى بارلىق كەزەڭنەن تولىق وتەدى. ساراپتامادان وتكەن وقۋلىقتار وقۋ جىلىندا مەكتەپتەرگە ەنگىزىلەدى.

جالپى الىپپەنى 2021-2022 وقۋ جىلىندا ەنگىزۋ جوسپارلانعان. وسى جوسپارعا ساي جۇمىس جۇرگىزىلىپ جاتىر. (...) الىپپەنىڭ جالپى مازمۇنى احمەت بايتۇرسىنۇلىنىڭ ادىستەمەسىن پايدالانىپ جاسالاتىنى ايتىلدى. بۇل جۇيە، بىرىنشىدەن، وقۋشىلاردىڭ بىلىمىنە قاتىستى ناعىز تالاپتاردى قاراي بىلەتىن: دىبىستاردىڭ رەتى، قولدانۋ جيىلىگى ەسكەرىلدى", - دەدى ۆيتسە-مينيستر وكق ونلاين-بريفينگىندە.

ۆەدومستۆو وكىلى الىپپەنى وقىتۋدىڭ ءۇش كەزەڭى بارىن اتاپ ءوتتى: الىپپەگە دەيىنگى كەزەڭ، الىپپە كەزەڭى، الىپپەدەن كەيىنگى كەزەڭ.

"وسىنىڭ ەكى كەزەڭى الىپپە وقۋلىعى ارقىلى، ال الىپپەدەن كەيىنگى كەزەڭ انا ءتىلى وقۋلىعى ارقىلى جالعاسىپ ىسكە اسىرىلادى. بۇرىنعى وقۋلىقتا الىپپەگە دەيىنگى كەزەڭگە كوپ كوڭىل بولگەن. قازىرگى وقىتىلىپ جاتقان ءپاننىڭ ىشىندە دە وسى ەرەكشەلىكتەرگە توقتالعان، بىراق ءوز ەرەكشەلىكتەرى ناقتى وقۋعا بايلانىستى بەرىلگەن. سودان كەيىن بۇگىندە اتا-انالاردىڭ تۇسىنىسپەۋشىلىگىن تۋدىرىپ جاتقان تۇستارى بار. ءبارى ەسكەرىلىپ، قازىرگى جاسالاتىن الىپپە وقۋلىعى بالانىڭ نەعۇرلىم فيزيولوگيالىق جاس ەرەكشەلىكتەرىن ەسكەرىپ جاسالادى.

وتە ماڭىزدى - الىپپە كەزەڭى. ءارىپ ۇيرەتۋ، دىبىس ۇيرەتۋ، بۋىن ۇيرەتۋ. وسى كەزەڭگە باسا نازار اۋدارىلعان. وزدەرىڭىزگە بەلگىلى، الىپپەمەن قوشتاسۋ جەلتوقساندا وتەتىن. قازىرگى پرينتسيپ تە وسىعان جاسالىپ، انا ءتىلى وقۋلىعىنا كوشىپ، جالپى وقۋشىنىڭ ءسوز تالعامى، ءسوزجاسامىن دامىتۋ كەزەڭى وسى انا ءتىلى كەزەڭى ارقىلى جۇرگىزىلەدى", - دەدى ۆيتسە-مينيستر.

ەسكە سالايىق، ەلىمىزدە اتا-انالار وقۋشىلارعا الىپپەنى قايتارۋدى تالاپ ەتىپ، نارازى بولعان. سودان سوڭ ءبىلىم جانە عىلىم مينيسترلىگى جاڭا الىپپە احمەت بايتۇرسىنۇلىنىڭ ادىستەمەسى نەگىزىندە جاسالاتىنىن حابارلادى.

Abai.kz