وتكەن تاۋلىكتە ەڭ كوپ ناۋقاس شىعىس قازاقستان وبلىسىندا (222) تىركەلگەن. پاۆلودار وبلىسىندا - 50, نۇر-سۇلتان قالاسىندا - 35, سولتۇستىك قازاقستان وبلىسىندا - 32, اقمولا وبلىسىندا - 29, الماتى قالاسىندا 25 ادامنان كوروناۆيرۋس ينفەكتسياسى تابىلعان. قىزىلوردا، ماڭعىستاۋ وبلىستارىندا بىردە-ءبىر ناۋقاس انىقتالماعان.

قازاقستاندا ناۋرىز ايىنان بەرى كوروناۆيرۋس جۇققانى پتر-تەستپەن راستالعاندار سانى 114 235 ادامعا جەتتى. 107 مىڭنان استامى جازىلعان. ناۋرىز ايىنان بەرى كەمىندە 1867 ادام قايتىس بولعان. بۇل ستاتيستيكاعا كوروناۆيرۋس جۇقتىرعانى راستالعان، بىراق "ىلەسپە اۋرۋدان قايتىس بولدى" دەگەن جۇزدەگەن ادام ءولىمى ەنگىزىلمەگەن.

كوروناۆيرۋس جونىندەگى ۇلتتىق ستاتيستيكاعا 1 تامىزدان بەرى ەسەبى جۇرگىزىلىپ كەلە جاتقان كوروناۆيرۋس پنەۆمونياسى دەرەگى دە قوسىلماي وتىر. دياگنوزى تەك اۋرۋ بەلگىلەرى بويىنشا قويىلاتىن كوروناۆيرۋس پنەۆمونياسى 38 مىڭنان استام ادامنان انىقتالعان، 405 ادام قايتىس بولعان. ۇكىمەت كوروناۆيرۋس پنەۆمونياسى دەرەگىنىڭ ايماق بويىنشا ءبولىنىسىن جۇيەلى تۇردە جاريالامايدى.

دجونس حوپكينس ۋنيۆەرسيتەتى سەكىلدى كوپتەگەن الەمدىك ۇيىمدار مەن دەرەككوزدەر قازاقستاننىڭ دەرەگىن پتر تەستىمەن راستالعان ناۋقاستارعا عانا سۇيەنىپ بەرىپ وتىر. ال دۇنيەجۇزىلىك دەنساۋلىق ساقتاۋ ۇيىمى قازاقستان بيلىگى بىرىكتىرمەگەن ەكى دەرەكتى قوسىپ جاريالاپ ءجۇر. ەكى دەرەكتى قوسقاندا قازاقستاندا كوروناۆيرۋسقا شالدىققاندا 114 235 ەمەس - 152 516 بولادى.

قازاقستاننىڭ بىرقاتار وبلىستارىندا شەكتەۋ شارالارى كۇشەيدى. 9 قاراشادان باستاپ سولتۇستىك قازاقستان وبلىسى، كوكشەتاۋ قالالارىندا بلوكبەكەتتەر قويىلىپ، اۋماققا كىرىپ شىعۋ شەكتەلەدى. قازىر قاراعاندى، شىعىس قازاقستان، پاۆلودار وبلىستارى اۋماعىنا كىرىپ-شىعۋ ءۇشىن جولاۋشىلار قولىندا پتر-تەست ناتيجەسى بولۋى ءتيىس.

Abai.kz