ۇيىم بايانداماسىندا الەكساندر لۋكاشەنكو جەڭدى دەپ جاريالانعان 9 تامىزداعى پرەزيدەنت سايلاۋىنىڭ ناتيجەسىن جويۋدى ۇسىنعان.
بايانداما اۆتورلارى سايلاۋ پروتسەسستەرى بۇزىلعانىن ايتىپ، ادام قۇقىقتارى تاپتالدى دەگەن پىكىر بىلدىرگەن.
وسىعان دەيىن بۇۇ-نىڭ ادام قۇقىقتارى بويىنشا كەڭەسى مينسكتى ادام قۇقىقتارى سالاسىنا باسا نازار اۋدارۋعا شاقىرعان.
ەقىۇ ەسەبى 17 ەلدىڭ، ونىڭ ىشىندە اقش، فرانتسيا جانە ۇلىبريتانيا ءوتىنىشى بويىنشا ازىرلەنگەن. قۇجات 700-گە جۋىق دايەكتى ماتەريالعا نەگىزدەلگەن. مينسك بۇل بويىنشا بىرلەسىپ جۇمىس ىستەۋدەن باس تارتقان.
9 تامىزدا وتكەن پرەزيدەنت سايلاۋىنان كەيىن بەلارۋس استاناسىندا جانە باسقا قالالارىندا نارازىلىق اكتسيالارى باستالىپ، الەكساندر لۋكاشەنكونىڭ وتستاۆكاسىن تالاپ ەتىپ جاتىر.
پوليتسيا تاراپىنان كۇش قولدانۋ كەزىندە كەمىندە ءتورت ادام قايتىس بولدى. جارالانعانداردىڭ ناقتى سانى بەلگىسىز. بۇگىنگى كۇنگە دەيىن التى ادام ءىز-ءتۇسسىز جوعالىپ كەتكەندەر قاتارىندا. باتىس ەلدەرى لۋكاشەنكونى سايلاۋدا جەڭدى دەپ تانىعان جوق.
Abai.kz
