قازاقستان مۇسىلماندارى ءدىني باسقارماسى كۇندەلىكتى بەس ۋاقىت ناماز بەن جۇما نامازدارىن مەشىتتە وقۋعا قاتىستى مالىمدەمە جاسادى.

وندا ۆەدومستۆوارالىق كوميسسياسىنىڭ (ۆاك)  شەشىمىنە ساي، كۇندەلىكتى بەس ۋاقىت نامازدى مەشىتتە وقۋعا بولاتىنى الايدا، جۇما نامازدارىن جاماعات بولىپ وقۋعا رۇقسات بەرىلمەگەنى ايتىلعان.

قمدب مالىمدەمەسى

قۇرمەتتى مۇسىلمان قاۋىم!

جۋىردا مەملەكەتتىك ۆەدومستۆوارالىق كوميسسياسىنىڭ (ۆاك) سەلەكتورلىق وتىرىسىنىڭ شەشىمى بويىنشا 2 قاراشادان باستاپ ەلىمىزدىڭ بارلىق مەشىتتەرىندە (جۇما نامازىن قوسپاعاندا) بەس ۋاقىت ناماز وتكىزۋگە رۇقسات بەرىلگەن بولاتىن.

وسىعان وراي، قازاقستان مۇسىلماندارى ءدىني باسقارماسى مەشىتتەردە جۇما نامازىن وقۋعا قاتىستى ەل تۇرعىندارىنا كەلەسىدەي مالىمدەمە جاسايدى:

بىرىنشىدەن، قازىرگى ۋاقىتتا ەلىمىزدىڭ مەشىتتەرىندە كۇندەلىكتى بەس ۋاقىت ناماز جاماعاتپەن وقىلادى, الايدا جۇما نامازى ۋاقىتشا وقىلمايدى.

وسىعان وراي، قمدب مۇسىلمان قاۋىمىن مەملەكەت زاڭىنا مويىنسۇنۋعا جانە ءتۇرلى ارانداتۋشىلىق ارەكەتتەرگە سالىنباۋعا شاقىرادى. ويتكەنى، ءابۋ حانيفا ءمازھابىندا جۇما نامازى دۇرىس بولۋ ءۇشىن مەملەكەت باسشىسى نەمەسە ونىڭ ورىنباسارى جالپى رۇقسات (يزن عام) بەرۋى شارت. بۇل جايىندا مۋللا الي قاري (اللا ونى راقىمىنا السىن) بىلاي دەيدى: «جۇما نامازىن وتەۋ ءۇشىن جالپى رۇقسات (يزن عام) ەتىلۋى شارت. سەبەبى، جۇما نامازى – يسلام بەلگىلەرىنىڭ ءبىرى. ول ادامدار اراسىندا اشىق تۇردە ورىندالۋى ءتيىس («ءفاتحۋ باب ءال-عينايا»، 1/565). سونداي-اق، شاريعاتتا: «يمام (باسشى) زاڭدى نەگىزدە ەل تۇرعىندارىنا جينالۋعا رۇقسات ەتپەسە، حالىق جينالماۋى كەرەك»، – دەپ ايتىلعان («ءفاتاۋا ھينديا»، 1/206).

ەكىنشىدەن، حانافي ءمازھابىندا: «جۇما نامازىن وقۋعا رۇقسات ەتىلمەگەن جاعدايدا، بەسىن نامازى كۇندەگىدەي جاماعاتپەن وقىلادى»، – دەلىنگەن («ءفاتاۋا ءباززازيا»، 1/69). سوندىقتان جۇما كۇنى بەسىن نامازى مەشىتتەردە سانيتارلىق تالاپتاردى ساقتاعان حالدە جاماعاتپەن وقۋعا رۇقسات ەتىلەدى نەمەسە ۇيىندە وقيدى.

قۇرمەتتى جاماعات!

قازاقستان مۇسىلماندارى ءدىني باسقارماسى ەلىمىزدەگى مەشىتتەر جاماعاتىن ۇكىمەتىمىزدىڭ جۇما نامازىن ۋاقىتشا توقتاتۋىنا بايلانىستى شەشىمىنە تۇسىنىستىكپەن قاراۋعا جانە وعان سابىرلىق تانىتۋعا شاقىرادى.

اللا تاعالا ەلىمىزدى بىرلىكتەن ايىرماسىن، حالقىمىزعا اماندىق، دىنىمىزگە قۋات بەرسىن! ءامين!

قازاقستان مۇسىلماندارى ءدىني باسقارماسى

Abai.kz