27-شىلدەدە الماتىنىڭ قالالىق سوتى GEGA لوگيستيكالىق كەشەنىن ءسۇرۋ تۋرالى شەشىم شىعاردى. ارىز بەرۋشى-قورعانىس مينيسترلىگى. حالىقارالىق ستاندارتقا ساي ءتۇرلى تاۋار، ازىق-تۇلىك، ءدارى-دارمەك ساقتايتىن قويمانى وسىدان بەس جىل بۇرىن ەلباسى نۇرسۇلتان نازارباەۆتىڭ ءوزى اشقان بولاتىن.

يندۋستريالدى-يننوۆاتسيالىق دامۋ باعدارلاماسى اياسىندا مەملەكەت قازىناسىنان بۇل جوباعا 4,5 ملرد تەڭگە ءبولىندى! ەندى كەلىپ، اياق استى قورعانىس مينيسترلىگىنىڭ الماتىداعى اۋە بازاسى جانىندا سالىنعان نىسان زاڭسىز بولىپ شىقتى. مينيسترلىك دالەل رەتىندە وسىدان 80 جىل بۇرىن قازاق كسر حالىقتىق كوميسسارلار كەڭەسىنىڭ كازارما سالۋعا جەر ءبولىنسىن دەگەن قۇجاتىن جەلەۋ ەتكەن. ويلاڭىزشى، 1940 جىلعى بۇيرىق. ودان بەرى كەڭەس ۇكىمەتى قۇلادى. قازاقستان ءوز الدىنا وتاۋىن تىگىپ، تاۋەلسىزدىگىن جاريالادى. ول قۇجاتتىڭ قازىرگى ۋاقىتتا زاڭدى كۇشى بار دەپ قالاي الامىز؟ باستى ايتقان ۋاجدەرى-لوگيستيكالىق كەشەن اۋە بازاسى جانىندا ورنالاسقاندىقتان، ۇشىپ-قونۋعا كەدەرگى كەلتىرەدى.

سوندا اسكەريلەر وسى اڭگىمەسىن سول كەزدەگى الماتى اكىمى يمانعالي تاسماعامبەتوۆ قۇرىلىس باستاۋعا جەردى زاڭداستىرىپ بەرگەن 2005 جىلدارى نەگە ايتپادى؟ تىم بولماسا پايدالانۋعا ەندى بەرىلگەن 2015 جىلى احمەتجان ەسىموۆكە قاۋىپتى دەپ نەگە ەسكەرتپەدى؟ بۇل جايتقا قاراپ، ەرىكسىز ھاكىم اباي «قايران ەلىم قازاعىم، قايران جۇرتىم، ۇستاراسىز اۋزىنا ءتۇستى مۇرتىن» دەپ اياقتان شالاتىن قانعا سىڭگەن قاسيەتتىڭ كورىنىس تاپقانىنا كۇيىنەسىڭ. بولماسا ورتالىق ازيادا تەڭدەسى جوق حالىقارالىق تالاپقا ساي كەشەننىڭ قورعانىس مينيسترلىگىنە سۇيەلدەۋ كورىنۋىن قالاي اقتارسىز. ولار بەك ەير اپاتى، ارىستاعى قويما جارىلىسىنان كەيىن شولاق بەلسەندىلىككە سالىپ، بيلىك الدىندا ۇپاي جيناۋ ءۇشىن وسىنداي قادامعا بارعانىن اڭداۋعا بولادى. بىلايشا ايتقاندا بۇل سالدارمەن كۇرەس.

ال، دەر ۋاقىتىندا قورعانىس مينيسترلىگى جۇمىسىن مۇلتىكسىز اتقارىپ، بارماق باستى، كوز قىستىعا سالماسا ايدىن كۇننىڭ امانىندا ارىستاعى جارىلىس بولمايتىن دا دا ەدى عوي دەگەن مۇڭلى ويعا كەتەسىڭ. «تاز اشۋىن تىرنادان» الار دەپ، ەندى كەلىپ قوپارىپ جۇمىس ىستەپ جاتقاندارىن كورسەتۋ ءۇشىن باسقالارعا قىرعيداي ءتيۋدىڭ نە قاجەتى بار؟ «قاۋىپسىزدىكتى»  قالقان ەتۋ ارقىلى قيراتۋدىڭ سوڭى نەگە اكەلىپ سوعارىن تۇسىنە مە ەكەن؟ الماتىنىڭ 70 پايىز ازىق-تۇلىك، ءدارى-دارمەك قورىن ساقتاپ وتىرعان نىسان جەرمەن جەكسەن بولسا ءبىر كۇندە مىڭنان استام ادام جۇمىسسىز دالادا قالادى. مىناداي پاندەميا قاناتىن كەڭگە جايعان قيىن-قىستاۋ زاماندا الدە مينيسترلىك ءبارىنىڭ ەكى قولىنا ءبىر كۇرەك تاۋىپ بەرە مە ەكەن؟

شەتەلدەن ەل شەكاراسىنا وتكەن قاي تاۋار بولماسىن وسى لوگيستيكالىق كەشەننىڭ كەدەن اۋماعىنداعى تەكسەرىستەن وتەدى. ونىڭ جۇمىسى توقتاسا بالاما باسقا كەشەن جوق. 80 جىل بۇرىنعى قۇجات نەگىزىندە شەشىم شىعارعان سوتقا بۇدان كەيىن قالاي سەنەسىڭ؟ «وگىزدى دە ولتىرمەي، اربانى دا سىندىرماۋ» ءۇشىن بۇل جاعدايعا پرەزيدەنتتىڭ تىكەلەي ارالاسقانى قاجەت. ايتپەسە، سۇرىلەيىن دەپ جاتقان دۇكەن، يا ءۇي ەمەس.

مەملەكەت بيۋدجەتىنەن كەزىندە 4,5 ملرد تەڭگە بولىنگەن نىساندى سۇرسە، ونىڭ شىعىنىن كىم وتەيدى؟ مينيسترلىك موينىنا الۋعا دايىن با؟ بۇل جايت قازىر الەۋمەتتىك جەلى، بۇقارالىق اقپارات قۇرالدارىندا قىزۋ تالقىلانىپ جاتىر. بىراق، بيلىكتەن ءۇن قاتىپ ارالاسقاندارى جوق. وقيعا قالاي ءوربيدى؟ ءالىپتىڭ ارتىن باعايىق.