قازاقستانداعى يۋنيسەف مالىمەتى بويىنشا بالالاردىڭ 66% -ى مەكتەپتەگى زورلىق-زومبىلىق پەن كەمسىتۋگە تاپ بولسا، 44% -ى مەكتەپتەگى زورلىق-زومبىلىقتىڭ قۇربانى بولادى.

«اينالايىن SOS» جوباسىندا بۋللينگ ماسەلەسى سۋرەتتەر ارقىلى سيپاتتالدى

يۋنيسەف-ءتىڭ قازاقستانداعى زەرتتەۋلەرى كورسەتكەندەي، مەكتەپتە قورلاۋ جانە بوپسالاۋ ەلەمەنتتەرى بار زورلىق-زومبىلىق كورگەن بالالاردا سۋيتسيد جاساۋ قاۋپى جوعارى.

«مۇعالىم بالاعا پسيحولوگيالىق قىسىم كورسەتىپ، سىنىپتاعى بارلىق وقۋشىنىڭ كوزىنشە ونىڭ كوڭىلىنە كەلەتىن ءسوز ايتىپ، ءتىپتى تاربيەلەۋدىڭ ءبىر بولشەگى رەتىندە وقۋشىنى كەمسىتەتىن سوزدەر ايتۋى مۇمكىن. مۇنداي قارىم-قاتىناس وقۋشىنىڭ پسيحولوگيالىق جاعدايىنا كەرى اسەرىن تيگىزەدى. مۇعالىم مۇنداي ارەكەتى ارقلى ءوزى اگرەسسور بولىپ قانا قويماي، سىنىپتاعى وقۋشىلارعا وزدەرىن وسىلاي ۇستاۋعا رۇقسات بەرگەندەي بولادى. وسىلايشا مۇعالىمنەن ءجابىر كورگەن وقۋشى سىنىبىنداعى باسقا وقۋشىلاردان دا وسىلاي ءجابىر كورە باستايدى»، - دەيدى بۋللينگكە قارسى «Street Law Kazakhstan» باعدارلاماسىنىڭ كوورديناتورى حاليدا اجىعۇلوۆا.

كەمسىتۋدىڭ سالدارى ءارتۇرلى بولۋى مۇمكىن. مىسالى، وقۋشى ءوزىن كەمسىتكەندىكتەن ۇنەمى كۇيزەلىستە ءجۇرىپ، ساباق وقي الماي قالۋى مۇمكىن. ءوزىن دۇرىس دارەجەدە باعالاماي، قورشاعان ورتاسىمەن قارىم-قاتىناس جاساۋ قيىنعا سوعادى. ءتىپتى، مۇنىڭ سوڭى پسيحوتەراپيالىق ەمدى قاجەت ەتۋگە اكەلۋى مۇمكىن. كۇش كورسەتۋ، كەلەكە ەتۋدىڭ قۇرباندارى سۋيتسيد جاساۋ تۋرالى باسقا وقۋشىلارعا قاراعاندا 5 ەسە كوپ ويلايدى.

«اينالايىن SOS» جوباسىندا بۋللينگ ماسەلەسى سۋرەتتەر ارقىلى سيپاتتالدى.

«ءبىز فوتوجوباعا قاتىسۋعا كەلىسىم بەرىپ، مەكتەپتەردە بالالاردى كەمسىتۋ قالاي جۇزەگە اساتىنى تۋرالى ايتىپ بەرگەن بالالارعا العىس ايتامىز. ولاردىڭ كەيبىرى بۋللينگگە قاتىستى باستارىنان وتكىزگەن جاعدايلاردى ايتتى، ال ءبىز ونى پلاكاتقا سۋرەت سالۋ ارقىلى جەتكىزۋگە تىرىستىق. بۇل پلاكاتتار وقۋشىلار تاراپىنان كەمسىتۋگە تاپ بولعان بالالارعا بۇل تۋرالى ويىن اشىق ايتۋعا كومەكتەسەدى دەپ ويلايمىز. كەلەكە ەتۋ، كەمسىتۋ – جانعا جازىلماس جارا سالىپ كەتەدى. ءبىزدىڭ بالالارىمىز بۋللينگكە تاپ بولماۋى كەرەك، ولار بار جاقسىلىق اتاۋلىعا لايىقتى»، - دەيدى Peremena.media باسىلىمىنىڭ باس رەداكتورى ايجان ماديحودجاەۆا.

دەرەككوز: قازاقپارات

Abai.kz