سادىر جاپاروۆ قىرعىزستان پرەزيدەنتىنىڭ مىندەتىن اتقارۋشى وكىلەتتىگىن توقتاتتى. بۇل تۋرالى ونىڭ ءباسپاسوز قىزمەتى مالىمدەدى.

وسىلايشا جاپاروۆ الداعى پرەزيدەنتتىك سايلاۋعا ەلدىڭ قاراپايىم ازاماتى رەتىندە قاتىسۋدى شەشكەن.

ال پرەزيدەنتتىڭ مىندەتىن ۋاقىتشا پارلامەنت سپيكەرى تالانت مامىتوۆ اتقارادى. ۇكىمەت باسشىسىنىڭ مىندەتى ءبىرىنشى پرەمەر-مينيستر ارتەم نوۆيكوۆقا جۇكتەلدى.

ايتا كەتەيىك، قىرعىزستاندا جاڭا پرەزيدەنتتىك سايلاۋ 2021 جىلدىڭ 10 قاڭتارىنا بەلگىلەنگەن. سادىر جاپاروۆ ورتالىق سايلاۋ كوميتەتىنە ءوزىنىڭ قۇجاتتارىن وتكىزىپ تە قويدى. كوميسسيانىڭ حابارلاۋىنشا، سايلاۋعا قاتىسۋعا 63 ادام ءوتىنىش بەرگەن.

تالانت مامىتوۆ، قىرعىزستان پرەزيدەنتىنىڭ مىندەتىن اتقارۋشى:

– مەملەكەت باسشىسىنىڭ مىندەتىن اتقارۋعا كىرىسە وتىرىپ، مەن حالىق الدىنداعى جاۋاپكەرشىلىگىمدى تولىق سەزىنەمىن. كونستيتۋتسيالىق قۇقىق شەڭبەرىندە حالىقتىڭ بەيبىت ءومىرى مەن ەلىمىزدىڭ تۇراقتىلىعىن قورعاۋ ءۇشىن بار كۇشىمدى سالامىن. حالىق وسى باعىتتاعى مەنىڭ بارلىق ءىسىمدى قولدايدى دەپ ۇمىتتەنەمىن.

Abai.kz