The New York Times گازەتىنىڭ مالىمەتى بويىنشا، ترامپ مۇنداي ۇسىنىستى 12 قاراشادا وتكەن جينالىستا ايتقان. بۇل جينالىسقا ونىڭ جوعارى لاۋازىمدى كەڭەسشىلەرى، ۆيتسە-پرەزيدەنت مايك پەنس، جاڭادان سايلانعان قورعانىس ءمينيسترى كريستوفەر ميللەر جانە شتاب جەتەكشىلەرىنىڭ بىرلەسكەن كوميتەتىنىڭ توراعاسى گەنەرال مارك ميللي قاتىسقان. ترامپ ولاردان الداعى اپتادا يراننىڭ يادرولىق نىساندارىنا اسكەري وپەراتسيا جۇرگىزۋ مۇمكىندىگىن سۇراعان.

سەيسەنبى كۇنى گازەت ماقالاسىنداعى مالىمەتتەردى امەريكالىق شەنەۋنىكتەردىڭ ءبىرى Reuters اگەنتتىگىنە راستادى. اق ءۇي رەسمي مالىمدەمە جاساۋدان باس تارتتى.

ترامپ وتكىزگەن جينالىستا حالىقارالىق اتوم ەنەرگياسى جونىندەگى اگەنتتىك بايانداماسى تىڭدالعان. وندا يران بايىتىلعان ۋران قورىن كوبەيتىپ جاتقانى ايتىلعان. ماگاتە مالىمەتى بويىنشا، يراننىڭ نەتەنزاداعى كومبيناتىندا ءوندىرىس توقتاۋسىز ءجۇرىپ جاتىر. مۇنداي جاعداي بەس جىل بۇرىن تەگەرانمەن جاسالعان كەلىسىمگە قايشى كەلەدى. ترامپ 2018 جىلى بۇل كەلىسىمنەن شىعىپ كەتكەن ەدى.

يراننىڭ يادرولىق نىساندارى سوققى جاساۋ ايماقتا جانجال تۋعىزىپ، جاڭادان سايلانعان اقش پرەزيدەنتى دجو بايدەننىڭ سىرتقى ساياساتىنا قيىندىق تۋعىزادى، دەپ حابارلادى «امەريكا داۋىسى».

سايلاۋداعى قارسىلاسىن «داۋىس ۇرلادى» دەپ ايىپتاعان ترامپ بيلىكتى تاپسىرۋ تارتىبىنەن باس تارتىپ وتىر، سول سەبەپتى بايدان كومانداسى ۇلتتىق بارلاۋ مالىمەتىنەن بەيحابار.

Abai.kz