قازاقستان رەسپۋبليكاسى ورتالىق سايلاۋ كوميسسياسى سايلاۋشىلارعا ۇندەۋ جولدادى. 

ەسكە سالا كەتەيىك، 2021 جىلعى 10 قاڭتاردا قازاقستان رەسپۋبليكاسى پارلامەنتى ءماجىلىسىنىڭ جانە ءماسليحات دەپۋتاتتارىنىڭ كەزەكتى سايلاۋى وتەدى.

«ەگەر ءسىز داۋىس بەرۋ كۇنىندە 18 جاسقا تولعان جانە بەلسەندى سايلاۋ قۇقىعىنا يە قازاقستان رەسپۋبليكاسىنىڭ ازاماتى بولساڭىز، قازاقستان رەسپۋبليكاسى پارلامەنتى ءماجىلىسىنىڭ جانە ءماسليحات دەپۋتاتتارىن سايلاۋعا قۇقىعىڭىز بار. ءسىزدىڭ سايلاۋشىلار تىزىمىندە بولۋىڭىز - سايلاۋعا قاتىسۋعا كونستيتۋتسيالىق قۇقىعىڭىزدىڭ ىسكە اسىرىلۋىنىڭ كەپىلى. سايلاۋشىلار ءتىزىمىن جەرگىلىكتى اتقارۋشى ورگاندار جاسايدى. ءسىزدىڭ ناقتى سايلاۋ ۋچاسكەسىنىڭ اۋماعىنداعى تۇرعىلىقتى جەرىڭىز بويىنشا تىركەلۋىڭىز ءسىزدى سايلاۋشىلار تىزىمىنە ەنگىزۋگە نەگىز بولىپ تابىلادى. سايلاۋ ۋچاسكەلەرىنىڭ شەكاراسى جەرگىلىكتى بۇقارالىق اقپارات قۇرالدارىندا 2020 جىلعى 5 قاراشادان كەشىكتىرىلمەي جاريالانادى» دەلىنگەن وسك ۇندەۋىندە.

ورتالىق سايلاۋ كوميسسياسىنىڭ مالىمەتىنە سەنسەك، ءار سايلاۋشى سايلاۋ تاعايىندالعان كەزدەن باستاپ ءتيىستى جەرگىلىكتى اتقارۋشى ورگاندا سايلاۋشى رەتىندە تىركەلۋگە قۇقىلى.

«سىزگە 2020 جىلعى 10 جەلتوقسانعا دەيىن سايلاۋ كۇنى تىركەلگەن جەرىڭىز بويىنشا داۋىس بەرۋگە ارنالعان ءۇي-جايعا كەلۋ مۇمكىندىگىڭىز بولمايتىنى بەلگىلى بولسا، باراتىن جەرىڭىزدەگى اكىمدىككە سايلاۋشىلاردىڭ ءتيىستى تىزىمىنە قوسۋ تۋرالى جازباشا وتىنىشپەن جۇگىنۋگە قۇقىلىسىز. ەگەر ءسىز تۇراقتى تىركەلگەن جەرىڭىزدەن تىس ەلدى مەكەندە بولساڭىز جانە تۇرعىلىقتى جەرىڭىز بويىنشا ۋاقىتشا تىركەلگەن بولساڭىز، 2020 جىلعى 10 جەلتوقساننان كەشىكتىرمەي، سايلاۋ كۇنى ءوزىڭىز داۋىس بەرەتىن سايلاۋ ۋچاسكەسىنىڭ سايلاۋشىلار تىزىمىنە ەنگىزۋ تۋرالى جازباشا وتىنىشپەن ۋاقىتشا بولاتىن جەردەگى اكىمدىككە جۇگىنۋگە قۇقىلىسىز» دەيدى كوميسسيا.

سونداي-اق، ورتالىق سايلاۋ كوميسسياسى ءار سايلاۋشىنى قۇقىقتىق ساۋاتتىلىق تانىتىپ، سايلاۋ قۇقىعىن پايدالانۋعا شاقىرادى.

«ءوزىڭىزدى سايلاۋشىلار تىزىمىنە ەنگىزۋ بويىنشا زاڭدى ماڭىزدى ارەكەتتەردى ۋاقتىلى قابىلداۋىڭىز قاجەت. 2020 جىلعى 26 جەلتوقساننان باستاپ سىزگە ءوز سايلاۋ ۋچاسكەڭىزدەگى سايلاۋشىلار تىزىمىنەن ءوزىڭىز تۋرالى دەرەكتەردى تەكسەرۋ مۇمكىندىگى بەرىلەدى» دەپ تۇيىندەيدى ۇندەۋىن ورتالىق سايلاۋ كوميسسياسى.

تۇپنۇسقا: قازاقپارات

Abai.kz