قازاقستان رەسپۋبليكاسى ارقاشان دا ماڭىزدى الەمدىك ماسەلەلەردە ىنتىماقتاستىق پوزيتسياسىن ۇستانىپ كەلەدى. اسىرەسە جاھاندىق جانە ايماقتىق قاۋىپسىزدىكتى نىعايتۋ ماسەلەلەرىندە قازاقستاننىڭ اتقارار ءرولى اسا جوعارى. 

ءبارىمىز بىلەتىندەي 27 قىركۇيەكتە ەلىمىزبەن تىكەلەي وداقتىق جانە ديپلوماتيالىق جاقىن قارىم-قاتىناستاعى قوس ەل ازەربايجان مەن ارمەنيا اراسىندا قارۋلى قاقتىعىس ورىن الىپ، مۇنىڭ سوڭى تەريتوريالىق سوعىسقا ۇلاسقان. الەمدىك ۇيىمدار، قاۋىمداستىقتار ەكى جاقتى دا بۇل سوعىستى توقتاتۋعا ۇندەدى. قازاقستان دا سول قاتاردى قوس تاراپتى ماسەلەنى بەيبىت جولمەن شەشۋگە شاقىردى.

ناتيجەسىندە 10 قاراشادا قوس ەل كەلىسىمگە كەلىپ، سوعىس قيمىلدارى رەسمي توقتاتىلدى. وسىعان وراي، ەلىمىزدىڭ سىرتقى ىستەر مينيسترلىگى تاۋلى قاراباقتاعى سوعىس جاعدايعا قاتىستى رەسمي مالىمدەمە جاريالادى.

قازاقستان سىرتقى ىستەر مينيسترلىگى ءوز مالىمدەمەسىندە، ازەربايجان رەسپۋبليكاسى پرەزيدەنتى يلحام اليەۆ، ارمەنيا رەسپۋبليكاسى پرەمەر-ءمينيسترى نيكول پاشينيان جانە رەسەي فەدەراتسياسى پرەزيدەنتى ۆلاديمير ءپۋتيننىڭ تاۋلى قاراباقتاعى قاقتىعىس ايماعىنداعى سوعىستى، سونداي-اق بارشا اسكەري ءىس-شارالاردى توقتاتۋ تۋرالى كەلىسىمدەرىن جوعارى باعالايتىنىن جەتكىزدى.

بىرىككەن ۇلتتار ۇيىمىنىڭ قاۋىپسىزدىك كەڭەسىنىڭ قارارلارىن باسشىلىققا الا وتىرىپ، تاۋلى قاراباق پروبلەماسىن رەتتەۋ ماقساتىندا قول جەتكىزىلگەن وسى ۋاعدالاستىقتار ايماقتىڭ قاۋىپسىزدىگىن ساقتاۋعا نەگىز بولا الادى دەپ سانايدى.

سونداي-اق، ءبىزدىڭ ەلدىڭ سىرتقى ىستەر مينيسترلىگى تاۋلى قاراباقتا سوعىس قيمىلدارىن توقتاتۋ جونىندەگى كەلىسىمگە قول جەتكىزۋدە رەسەي فەدەراتسياسىنىڭ ماڭىزدى ءرولىن جوعارى باعالادى. ءارى سولتۇستىكتەگى كورشىمىزدىڭ ايماق قاۋىپسىزدىكگىن ساقتاۋ ماقساتىنداعى ىنتىماقتاستىقتاردى ساقتاۋعا جانە ءىس جۇزىندە ىسكە اسىرۋعا باعىتتالعان بىتىمگەرشىلىك ساياساتى مەن ۇستانىمىن ەرەكشە اتاپ ءوتتى.

قازاقستاندىق تاراپ ازەربايجان جانە ارمەنيا ەلدەرىنىڭ ايماقتا بەيبىتشىلىك پەن ىنتىماقتاستىقتى ساقتاۋ، وڭىرلىك قاۋىپسىزدىكتى قامتاماسىز ەتۋگە بارىنشا ۇمتىلاتىندىقتارىنا سەنىم ءبىلدىردى. ەرى ەكى ەل حالقىنىڭ وسىنداي كۇردەلى كەزەڭنەن شىعۋىنا قولداۋ ءبىلدىردى.

ايتا كەتەيىك، ازەربايجان مەن ارمەنيا ءبىزدىڭ ەلمەن بىرقاتار ديپلوماتيالىق وداقتار مەن ۇيىمدارعا ورتاق مۇشە ەلدەر. اتاپ ايتقاندا ازەربايجانمەن تاۋەلسىز مەملەكەتتەر دوستىعى جانە تۇركى كەڭەسىنە، ال ارمەنيامەن تاۋەلسىز مەملەكەتتەر دوستىعى جانە ەۋرازيالىق ەكونوميكالىق وداققا ورتاق مۇشەمىز. ەكى ەلمەن دە دوستىق قاتىناستامىز.

Abai.kz