سوڭعى كەزدەرى راسىندا تۇركيادان پاتەر الدىم نەمەسە سول جاققا كوشتىم دەگەن ازاماتتار سانى كوبەيۋدە. قىزىق ءۇشىن انتاليا، يزمير، ستامبۋل سىندى قالالارداعى ءۇي باعاسىن سالىستىرىپ قاراپ شىقتىم. بىزبەن شامالاس.

الانيا، مەرسين، كونيا سىندى قالالارىندا بىزدەن تومەن. اۋا-رايى جىلى. تۇركيا ارينە اقش ەمەس، بىراق بىزدەن الدا. كوپ جاعداي جاسالعان. قازاقستانعا كەلۋ 4-5 ساعاتتىق جول. ىڭعايلى. ول تۇسىنىكتى.

كەزىندە تۇركيادان بايلار ءۇي السا قازىر ورتا تاپ تا پاتەر الاتىن، استانا مەن الماتىداعى پاتەرىن ساتسا دا انتاليا، ستامبۋلدان ورنىنا بىرگە ءبىر پاتەر باعاسى كەلەتىن دەڭگەيگە كەلدىك. ەندى ورتا دەڭگەيدەگى قازاقتاردىڭ الماتى مەن استانا ەمەس الىس-جاقىن شەتەلگە كوشۋ پروتسەسى اقىرىنداپ باستالعانداي.

ارينە ءار ادامنىڭ، وتباسىنىڭ ءوز تاڭداۋى. دەگەنمەن ويلاناتىن جاعداي. بۇكىل الەم مەن جەر پلانەتاسىن ادامزاتقا ورتاق دۇنيە دەپ قارايتىن، شەت ءتىلىن ەركىن مەڭگەرگەن ۇرپاق ءوسىپ كەلەدى. وسىلاي كەتە بەرسە كەيىنگى بۋىن ەسەيگەندە بۇل پروتسەسس ەسەلەپ ارتۋى مۇمكىن.

جالپى نە ءۇشىن قازاقتار شەتەلگە كوشە باستادى؟ قانداستاردى شاقىرىپ الىپ ءوزىمىز كەتىپ جاتقان جوقپىز با؟ مۇنىڭ الەۋمەتتىك، پسيحولوگيالىق استارى قايدا جاتىر؟ ويلاناتىن دۇنيە...

باۋىرجان سەرىكبايدىڭ جازباسى

Abai.kz