قر دەنساۋلىق ساقتاۋ مينيسترلىگى مەن رەسەيدىڭ تىكەلەي ينۆەستيتسيالار قورى (رفتيق)  الەمدە العاشقى تىركەلگەن كوروناۆيرۋسقا قارسى «سپۋتنيك V» ۆاكتسيناسىن تىركەپ، سونداي-اق ونى ءوندىرۋ جانە تاراتۋ ءراسىمىن جۇرگىزۋ ءۇشىن ىنتىماقتاستىق تۋرالى كەلىسىم جاسالدى. 

كەلىسىمگە دەنساۋلىق ساقتاۋ ءمينيسترى الەكسەي تسوي مەن رفتيق باس ديرەكتورى كيريلل دميتريەۆ قول قويدى.

قازاقستان رەسپۋبليكاسىنىڭ رەتتەۋشى ورگاندارى قاجەتتى راسىمدەردى اياقتاعاننان كەيىن رەسەي فەدەراتسياسى تەحنولوگيا ترانسفەرىن جۇرگىزەدى جانە ەل اۋماعىندا «سپۋتنيك V» ۆاكتسيناسىنىڭ كەمىندە 2 ملن دوزاسىن وندىرۋگە ارنالعان سۋبستانتسيانى جەتكىزەدى.

«پرەزيدەنت قاسىم-جومارت توقاەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن قازاقستان رەسپۋبليكاسىنىڭ اۋماعىندا «سپۋتنيك V» ۆاكتسيناسىن شىعاراتىن زاۋىت سالۋ تۋرالى كەلىستى. بۇل كەلىسىم ەكىجاقتى قارىم-قاتىناسقا سەرپىن بەرەدى، سونداي-اق كوروناۆيرۋس ينفەكتسياسى پاندەمياسىمەن تەزىرەك كۇرەسۋگە مۇمكىندىك تۋادى دەپ سەنەمىن»، - دەدى ا.تسوي.

«رفتيق  مەن قازاقستان رەسپۋبليكاسى اراسىنداعى كەلىسىمنىڭ ارقاسىندا  حالىققا ادامنىڭ ادەنوۆيرۋستىق ۆەكتورلارىنىڭ تەكسەرىلگەن جانە جاقسى زەرتتەلگەن پلاتفورماسىندا قۇرىلعان تيىمدىلىگى 91% اساتىن كوروناۆيرۋسقا قارسى ۆاكتسينا قولجەتىمدى بولادى. قازاقستان اۋماعىندا «سپۋتنيك V» ۆاكتسيناسىن شىعارۋ لوگيستيكالىق شىعىنداردى ازايتۋعا جانە قىسقا مەرزىمدە ۆاكتسينانى مەديتسينالىق مەكەمەلەرگە جەتكىزۋگە مۇمكىندىك بەرەدى. سونىمەن قاتار، ەكى ەل اراسىندا تەحنولوگيالىق، عىلىمي جانە مەديتسينالىق تاجىريبە الماسۋ كەڭەيەدى»، - دەدى رفتيق باس ديرەكتورى ك. دميتريەۆ.

قازىرگى ۋاقىتتا بەلارۋس رەسپۋبليكاسىندا، ءباا، ۆەنەسۋەلادا جانە بىرقاتار باسقا ەلدە «سپۋتنيك V» ۆاكتسيناسىنىڭ III كلينيكالىق زەرتتەۋ فازاسى، سونداي-اق ءۇندىستاندا II-III فازا ماقۇلداندى جانە جۇرگىزىلۋدە. 50-دەن استام ەلدەن 1,2 ملرد استام دوزا ساتىپ الۋ تۋرالى ءوتىنىم ءتۇستى. شەتەلدىك نارىققا  ارنالعان ۆاكتسينانى رفتيق  حالىقارالىق سەرىكتەستەرى ءۇندىستان، برازيليا، قىتاي، وڭتۇستىك كورەيا جانە تاعى ءتورت ەل شىعاراتىن بولادى.

ەستەرىڭىزگە سالا كەتەيىك، 24 قاراشادا  ن. ف. گامالەي اتىنداعى ەمۇعو مەن رفتيق راندوميزاتسيالانعان پلاتسەبو-باقىلاناتىن كلينيكالىق تىركەۋدەن كەيىنگى كوروناۆيرۋسقا قارسى «سپۋتنيك V» ۆاكتسيناسى 40 000 ەرىكتىنىڭ قاتىسۋىمەن زەرتتەۋدىڭ III كەزەڭىنىڭ ەكىنشى ارالىق تالداۋىنىڭ وڭ ناتيجەلەرىن جاريالادى.  زەرتتەۋدىڭ ارالىق ناتيجەلەرى تاعى ءبىر رەت ادامنىڭ ادەنوۆيرۋستىق ۆەكتورلارىنىڭ جاقسى زەرتتەلگەن پلاتفورماسىندا قۇرىلعان الەمدەگى العاشقى تىركەلگەن كوروناۆيرۋسقا قارسى  ۆاكتسينا «سپۋتنيك V» ۆاكتسيناسىنىڭ جوعارى تيىمدىلىگىن كورسەتتى. تيىمدىلىكتى باعالاۋ ۆاكتسينانىڭ ءبىرىنشى ينەكتسياسىن (ەكىنشى ينەكتسيانى العاننان كەيىنگى 7-ءشى كۇن) نەمەسە كلينيكالىق زەرتتەۋ حاتتاماسىنا سايكەس ەكىنشى باقىلاۋ نۇكتەسىنە جەتكەندە پلاتسەبو العاننان كەيىنگى 28-ءشى كۇنى 18 794 ەرىكتى اراسىندا جۇزەگە اسىرىلدى. تالداۋ قورىتىندىسى بويىنشا «سپۋتنيك V» تيىمدىلىگى 91,4%  قۇرادى.

Abai.kz