ارمەنيا وپپوزيتسياسى بيلىككە باعىنباۋ اكتسياسى باستالعانىن مالىمدەدى. بۇعان دەيىن ولار پرەمەر-مينيستر نيكول پاشينياننىڭ بيلىكتەن كەتۋىن تالاپ ەتىپ، 8 جەلتوقسانعا دەيىن ۋاقىت بەرگەن. 

پاشينياننىڭ وتستاۆكاسىن «وتاندى قۇتقارۋ قوزعالىسىن» قۇرعان 17 پارتيا تالاپ ەتىپ كەلەدى.

ال، اتالعان قوزعالىستىڭ مۇشەسى، «داشناكتسۋتيۋن» پارتياسىنىڭ وكىلى يشحان ساگاتەليان نارازىلىق اكتسياسىن زاڭ اياسىندا وتكىزۋگە شاقىردى.

«نيكول پاشينيان وتستاۆكاعا كەتپەدى. سول سەبەپتەن ارمەنيا ازاماتتارى نارازىلىعىن ءبىلدىرىپ، بەيبىت تۇردە بيلىككە باعىنباۋ اكتسياسىن وتكىزۋگە قۇقىعى بار»، – دەپ مالىمدەدى ول.

وسىدان سوڭ، 8 جەلتوقسان كۇنى ەرەۆاندا وپپوزيتسيا وكىلدەرى نارازىلىققا شىعىپ، «نيكول - ساتقىن» دەپ ايقايلاعان. ولاردى كوشەدەگى كولىك جۇرگىزۋشىلەرى سيگنال بەرىپ، قولدادى. بۇدان كەيىن پوليتسيا نارازىلىق بىلدىرۋشىلەردى ۇستاعان. ۇستالعانداردىڭ اراسىندا «داشناكتسۋتيۋن» پارتياسىنىڭ مۇشەلەرى دە بار.

ايتا كەتەيىك، 5 جەلتوقسان كۇنى ارمەنيانىڭ بوستاندىق الاڭىندا وپپوزيتسيا وكىلدەرى پرەمەر-مينيستر نيكول پاشينياننىڭ وتستاۆكاسىن تالاپ ەتتى. «ارمەنيا ساتقىن نيكولسىز» دەپ ۇرانداعان ولار، پرەمەر-مينيسترگە ءۇش كۇن ۋاقىت بەرگەن.

جالپى، ارمەنياداعى پاشينيانعا قارسى نارازىلىق ونىڭ تاۋلى قاراباقتاعى سوعىستى توقتاتۋ جونىندە كەلىسىمگە كەلگەننەن كەيىن باستالىپ، كۇنى بۇگىنگە دەيىن جالعاسىپ كەلەدى. ال، پاشينيان سوعىستى قۇجاتقا قول قويۋ ارقىلى عانا توقتاتۋ مۇمكىن بولعانىن ايتقان.

«ءبىز ديپلوماتيادا ساتسىزدىككە ۇشىراعان جوقپىز. ءبىز سوڭعى 20-25 جىلداعى ديپلوماتيالىق ساتسىزدىكتەردىڭ اۋىرتپالىعىنان جەڭىلىس تاپتىق»، - دەگەن پاشينيان.

Abai.kz