"وسى كەلىسىم بويىنشا اعىلشىن سوتىنىڭ وتەمۇراتوۆ اكتيۆتەرىن بۇعاتتاۋ تۋرالى بۇيرىعىنىڭ كۇشى جويىلدى" دەدى كومپانيا وكىلدەرى. كومپانيا حابارلاماسى Informburo سايتىندا جاريالاندى.
وتكەن اپتادا ۇلىبريتانيا سوتى بتا بانك شاعىمى نەگىزىندە وتەمۇراتوۆتىڭ اكتيۆتەرىن بۇعاتتاعان. اقپارات بويىنشا، "بتا" بيزنەسمەندى باسقالارمەن بىرگە "بانكتەن ۇرلانعان اقشانى جاسىرۋعا كومەكتەستى" دەپ ايىپتاعان.
9 جەلتوقساندا جاريالانعان "ۆەرنىي كاپيتال" مالىمدەمەسىندە بولات وتەمۇراتوۆ پەن بتا بانك وكىلدەرى اراسىندا قۇپيا كەلىسىم جاسالعانى، بانكتىڭ سوتقا تۇسىرگەن شاعىمىن قايتارۋعا كەلىسكەنى جازىلعان. وندا جاۋاپكەر جاقتىڭ وتەمۇراتوۆ پەن ونىمەن بايلانىستى ادامداردىڭ "بانك اقشاسىن ۇرلاۋ ىسىنە قاتىسى جوقتىعىن دالەلدەيتىن" قۇجاتتاردى كورسەتۋگە ۋادە بەرگەنى جانە كەلىسىم جاسالعانعا دەيىن كەيبىر قۇجاتتاردىڭ بەرىلگەنى جازىلعان.
وسىعان دەيىن "ۆەرنىي كاپيتال" مالىمدەمە تاراتىپ، بۇعاتتاۋ تۋرالى سوت شەشىمى "جالعان قۇجاتتار نەگىزىندە شىعارىلدى، سوت شەشىمىن اپەللياتسياعا بەردىك" دەپ حابارلاعان. ال بتا بانكتىڭ ءوزى ازاتتىققا ازىرگە تۇسىنىكتەمە بەرمەيتىنىن ايتقان.
"وتەمۇراتوۆ اكتيۆتەرىنىڭ بۇعاتتان بوساتىلعانى" جايلى اقپاراتتى "ۆەرنىي كاپيتالدان" باسقا ازىرگە ەشكىم تاراتقان جوق. بتا بانكتىڭ رەسمي سايتىندا كەلىسىم جايلى حابارلاما جوق.
امەريكالىق Wall Street Journal باسىلىمىنىڭ جازۋىنشا، بۇعاتتالعان اكتيۆتەر اراسىندا شەتەلدىك ءىرى بانكتەردەگى شوتتاردا جاتقان اقشا جانە ماسكەۋدە، ۆەنادا جانە قازاقستان استاناسىندا ورنالاسقان Ritz-Carlton قوناقۇيلەرىنە جارتىلاي يەلىك ەتەتىن كومپانيالار، سونىمەن بىرگە وتەمۇراتوۆقا جانە ونىڭ ۇلى انۋارعا تيەسىلى Burger King فاستفۋد مەيرامحانالار جەلىسىنىڭ قازاقستاندىق فرانشيزاسى بولعان.
"Forbes – قازاقستان" جۋرنالىنىڭ مالىمەتىبويىنشا، بولات وتەمۇراتوۆ قازاقستانداعى ەڭ باي ادامداردىڭ قاتارىندا ءتورتىنشى ورىندا تۇر. جۋرنالدىڭ جازۋىنشا، ول اكتيۆتەرىنىڭ كولەمى بويىنشا قازاقستانداعى ەڭ ءىرى ۇشتىككە كىرەتىن ForteBank-ءتى باقىلايدى (مامىر ايىنداعى دەرەك). 2019 جىلدىڭ سوڭىنداعى مالىمەت بويىنشا، بانك اكتيۆتەرىنىڭ اۋقىمى 2,07 ميلليارد تەڭدە بولعان. سونىمەن قاتار ونىڭ تاۋ-كەن، مۇناي-گاز جانە تەلەكوممۋنيكاتسيا سالالارىندا اكتيۆتەرى بار.
Abai.kz
