پارادقا ەكى ەلدەن ءۇش مىڭعا جۋىق اسكەري قىزمەتكەر قاتىسىپ، 150-گە تارتا سوعىس تەحنيكالارىن الىپ ءجۇردى.

وسىنىڭ الدىندا اليەۆ جىل سايىن 8 قاراشانى جەڭىس كۇنى دەپ اتاپ ءوتۋ جونىندە جارلىق شىعارعان. نەگىزى سوعىستى توقتاتۋ جونىندەگى كەلىسىمگە 10 قاراشادا كەلگەن. بىراق بۇل كۇن تۇركيا مەملەكەتى ءۇشىن مۇستافا كەمال اتاتۇرىكتى ەسكە الۋ كۇنى بولعاندىقتان وزگەرتىلگەن.

بۇل ۋاقىتتا ارمەنيادا وپپوزيتسيا پرەمەر-مينيستر نيكول پاشينياننىڭ وتستاۆكاسىن تالاپ ەتىپ جاتىر.

ازەربايجان قورعانىس مينيسترلىگى تاۋلى قاراباقتا سوڭعى قاقتىعىس كەزىندە 2 783 ساربازدىڭ قازا بولعانىن حابارلاعان.

تاۋلى قاراباقتاعى شيەلەنىس قىركۇيەكتىڭ سوڭىندا باستالعان قاقتىعىسپەن قايتا ورشىگەن. قاقتىعىس ەندى باستالعاندا باكۋ مەن ەرەۆان جاعدايدىڭ ۋشىعۋىن ءبىر-بىرىنەن كورگەن. 9 قاراشا كۇنى رەسەي، ازەربايجان پرەزيدەنتتەرى جانە ارمەنيا پرەمەر-ءمينيسترى تاۋلى قاراباقتاعى اسكەري قيمىلداردى توقتاتۋ تۋرالى ورتاق مالىمدەمە جاسادى.

مالىمدەمەگە سايكەس، ازەربايجان مەن ارمەنيا كۇشتەرى قازىرگى پوزيتسيالارىندا قالىپ، ايماققا رەسەيدىڭ بىتىمگەر اسكەرى كىرگىزىلەتىن بولدى. تاۋلى قاراباقتى قورشاي ورنالاسقان ايماقتاردىڭ ءبارى ازەربايجانعا قايتارىلىپ، ارمەنياعا قاراباققا، ازەربايجانعا ناحيچەۆانعا ترانسپورت كوريدورى بەرىلەتىن بولدى.

كەلىسىمگە قول قويىلعان سوڭ ارمەنيادا پاشينياننىڭ وتستاۆكاعا كەتۋىن تالاپ ەتكەن قارسىلىق اكتسيالارى باستالدى. 17 وپپوزيتسيالىق پارتيا پرەمەر-مينيستر قىزمەتىنە ارمەنيا ۇكىمەتىن 1990-1991 جىلدارى باسقارعان ۆازگەن مانۋكياندى ۇسىندى.

Abai.kz