جەكسەنبى كۇنى جاڭاوزەندىك ەكى بەلسەندى مۇراتباي جۇماعاليەۆ پەن نۇرجان نارەنوۆتىڭ 7 كۇنگە قامالعانى جايلى اقپارات تاراعان ەدى. كەي اقپاراتقا قاراعاندا، ولار الەۋمەتتىك جەلىدە تاۋەلسىزدىك كۇنى الاڭعا كەلىپ، "جاڭاوزەن وقيعاسى قۇرباندارىن ەسكە الىپ، قۇران باعىشتايتىنىن" جازعان. دۇيسەنبى كۇنى اكىمدىك الدىنا جينالعان ادامدار "ولاردى نە ءۇشىن قامادى، بيلىك ءتۇسىندىرسىن!" دەپ تالاپ ەتتى.
اكىمدىكتەن جاڭاوزەن قالاسى اكىمىنىڭ ورىنباسارى امانعالي نۇرداۋلەتوۆ جانە قالا پروكۋرورى ەرمەك ەلۋباەۆ شىقتى. ولار "ەكى بەلسەندىنىڭ حالىقتى ميتينگىگە شاقىرىپ، زاڭعا قايشى ارەكەت جاساعانى" انىقتالعاننان كەيىن اكىمشىلىك كودەكستىڭ 488-باپ 7-تارماعى بويىنشا ءىس قوزعالعانىن ايتتى. كەيىنىرەك سوت ولاردىڭ ارقايسىسىن 7 تاۋلىككە قاماعان. ولاردىڭ ايتۋىنشا، جاڭاوزەندەگى يزولياتورلاردا ورىن جوق بولعاندىقتان جۇماعاليەۆ - اقتاۋ قالاسىنا، نارەنوۆ تۇپقاراعان اۋدانىنىڭ يزولياتورىنا قامالعان.
ال تۇرعىندار "بۇل شەشىممەن كەلىسپەيمىز. ەگەر قاماۋ كەرەك بولسا، پوليتسيا نەگە "سولتۇستىك قازاقستان جەرى رەسەيدىكى" دەگەن رەسەيلىك دەپۋتاتقا شارا قولدانبايدى؟ بيلىكتىڭ كۇشى تەك قاراپايىم حالىققا عانا جەتەدى" اكىم ورىنباسارىنىڭ سوزىنە نارازى بولدى.
تۇرعىندار اكىمدىك پەن پروكۋراتۋرا وكىلدەرىنە 16 جەلتوقساندا الاڭعا كەلىپ، جاڭاوزەن وقيعاسىنىڭ قۇرباندارىن ەسكە الىپ، قۇران باعىشتايتىنىن دا ەسكەرتتى. ولار ىندەتكە بايلانىستى بارلىق كارانتين تالاپتارىن ساقتايتىنىن ايتتى. ولار وزدەرىنىڭ ەسكەرتۋىنە 14 جەلتوقسان كۇندىزگى ساعات 4-كە دەيىن جاۋاپ كۇتەتىنىن ايتتى. اكىمدىك ەسكەرتۋدى قابىلداعان، بىراق قاشان جاۋاپ بەرەتىنى ازىرگە بەلگىسىز.
16 جەلتوقسان — قازاقستان تاۋەلسىزدىگى كۇنى. بۇل كۇن قازاقستاننىڭ جاڭا تاريحىندا تاعى ەكى وقيعامەن بايلانىستى اتالادى. وسىدان 34 جىل بۇرىن ءدال وسى كۇنى كرەملدەگى بيلىكتىڭ گەننادي كولبيندى سوۆەتتىك قازاقستانعا باسشى ەتىپ تاعايىنداعاننان كەيىن قازاق جاستارى الماتىنىڭ ورتالىق الاڭىنا جينالىپ، نارازىلىق تانىتقان. سوۆەت بيلىگى جاستاردىڭ بەيبىت ميتينگىسىن كۇش قولدانىپ، باسىپ-جانشىعان. ميتينگىدەن كەيىن جۇزگە جاۋاپقا تارتىپ، سوتتاعان، جۇمىستان شىعارعان. 2011 جىلى 16 جەلتوقساندا ماڭعىستاۋ وبلىسىنداعى جاڭاوزەن قالاسىندا ەڭبەك جاعدايىن جاقسارتۋدى تالاپ ەتكەن مۇنايشىلاردىڭ بىرنەشە ايعا جالعاسقان بەيبىت نارازىلىق اكتسياسىن پوليتسيا وق اتىپ تاراتقان. رەسمي مالىمەت بويىنشا، "جاڭاوزەن وقيعاسى" كەزىندە 17 ادام كوز جۇمعان.
Abai.kz
