قازاقستاندا كەدەيلىك دەڭگەيى 2020 جىلدىڭ ءۇشىنشى توقسانىندا 5,7% قۇرادى. بۇل وتكەن جىلدىڭ سايكەس كەزەڭىمەن سالىستىرعاندا 1,2 پايىزعا جوعارى. 

ستراتەگيالىق جوسپارلاۋ جانە رەفورما اگەنتتىگى ۇلتتىق ستاتيستيكا بيۋروسىنىڭ مالىمەتىنشە، ءۇشىنشى توقساندا كەدەيلىك دەڭگەيىنىڭ ەڭ جوعارى كورسەتكىشى بويىنشا تۇركىستاندا وبلىسى - 11,2%، سولتۇستىك قازاقستان وبلىسى - 8,3%، جامبىل وبلىسى - 7,2% جانە قىزىلوردا وبلىسى - 7% بولعان. ال ەڭ تومەنگى كورسەتكىش - نۇر-سۇلتاندا (2%).

« 2020 جىلعى III توقساندا ازىق-تۇلىك تاۋارلارىنا جۇمساعان شىعىستار دەڭگەيىندەگى 10% ەڭ از جانە 10% ەڭ كوپ قامتاماسىز ەتىلگەن حالىقتىڭ اراسىنداعى ايىرماشىلىق 5 ەسەنى، ازىق-تۇلىك ەمەس تاۋارلارعا – 6,8 ەسەنى، ال اقىلى كورسەتىلەتىن قىزمەتتەرگە – 6,3 ەسەنى قۇرادى»,  - دەلىنگەن حابارلامادا.

بۇعان دەيىن ءۇشىنشى توقساندا رەسپۋبليكا ەكونوميكاسىندا 8,7 ميلليون ادام جۇمىسپەن قامتىلدى دەپ حابارلانعان بولاتىن. جۇمىسپەن قامتىلعان حالىقتىڭ ىشىندە 6,7 ميلليون ادام (جۇمىسپەن قامتىلعانداردىڭ جالپى سانىنىڭ 76,5%) جۇمىسقا ورنالاستىرىلعان.

ال، حالىقارالىق ەڭبەك ۇيىمىنىڭ ادىستەمەسى بويىنشا جۇمىسسىزدار سانى  454,8 مىڭ ادامدى قۇراپ، جۇمىسسىزدىق دەڭگەيى 5% بولعان.

«ءۇشىنشى توقساندا COVID-19 پاندەمياسىنىڭ قازاقستانداعى ەڭبەك نارىعىنا اسەرى ساقتالدى. ەكىنشى توقسانمەن سالىستىرعاندا ۋاقىتشا جۇمىسسىزداردىڭ سانى ءىس-ارەكەتتىڭ توقتاتىلۋىنا بايلانىستى 52% تومەندەپ، 131,7 مىڭ ادامدى قۇرادى. ونىڭ 25% -ى ساۋدا قىزمەتكەرلەرى، 21,4% -ى ءبىلىم بەرۋ، 10,3% -ى باسقا قىزمەتتەر (شاشتاراز، سۇلۋلىق سالونى، تۇرمىستىق قىزمەت كورسەتۋ)»، - دەلىنگەن حابارلامادا.

ايتا كەتەيىك، 2020 جىلعى قاراشادا ورتاشا ايلىق جالاقى 211 033 تەڭگەنى قۇرادى. ال،  2019 جىلدىڭ سوڭىندا ءبىر قىزمەتكەردىڭ ورتاشا ايلىعى 186 815 تەڭگە بولعان.

Abai.kz