26 قاراشا كۇنى سەنات دەپۋتاتتارى نۇرلان ءابدىروۆ، رىسقالي ابدىكەروۆ جانە سەرگەي ەرشوۆ ەلىمىزدەگى اۆتوجولداردىڭ ساپاسىنا قاتىستى پرەمەر-مينيستر اسقار مامينگە دەپۋتاتتىق ساۋال جولدادى.

سەناتورلاردىڭ ايتۋىنشا، سالىنعان جانە جوندەلگەن جولداردىڭ مەرزىمىنەن بۇرىن بۇزىلۋىنا جۇك اۆتوكولىكتەردىڭ بەلگىلەنگەن بىلىكتىك (وستىك) جۇكتەمەلەرىنىڭ اسىپ كەتۋى سەبەپ بولىپ وتىر.

«رەسمي ستاتيستيكانىڭ دەرەكتەرىنە سايكەس، تەحنيكالىق ساناتتار بولىنىسىندە ەل جولدارىنىڭ 9,3 پروتسەنتى عانا بىلىككە (وسكە) 10 توننادان استام جۇكتەمەنى قابىلداي الادى. ناقتىلاپ ايتقاندا، جالپى پايدالانىمداعى جولداردىڭ 90,7 پروتسەنتى قولدانىستاعى جۇك كولىكتەردىڭ ەڭ از جۇكتەمەلەرىن دە قابىلداي المايدى.  

سونىمەن قاتار، زاڭناما تالاپتارىنا سايكەس جالپى پايدالانىمداعى اۆتوكولىك جولدارى بويىنشا ساموسۆالمەن 25 توننادان استام جۇك تاسىمالداۋعا تىيىم سالىنعانىمەن، وسى جولداردا سالماعى 30-40 توننا بولاتىن جۇكتى كوتەرەتىن كولىكتەردىڭ قوزعالىسى توقتاماي تۇر»،- دەيدى سەناتورلار.

اتالعان ماسەلەنى شەشۋ كولىكتىك باقىلاۋ ينسپەكتسياسىنىڭ مىندەتىنە جاتادى. الايدا، بۇل شارۋا ولاردىڭ قولىنان كەلمەي وتىرعان كورىنەدى.

«رەسمي ستاتيستيكاعا سۇيەنسەك، 2019 جىلى ينسپەكتسيا قىزمەتكەرلەرىنىڭ 1/3 ءىرى گاباريتتى اۆتوكولىكتەردىڭ كەدەرگىسىز جۇرگەنى ءۇشىن تارتىپتىك جاۋاپكەرشىلىككە تارتىلعان.

سول سەبەپتى بۇل قىزمەتتىڭ ۇيىمداستىرىلۋى مەن ساپاسى ۇكىمەت تاراپىنان قاتان قاداعالاۋدى تالاپ ەتەدى دەپ ەسەپتەيمىز»،- دەدى سەنات دەپۋتاتتارى.

سونىمەن قاتار، 2018-2020 جىلدارى اۋىر سالماقتى جانە ءىرى كولەمدى اۆتوكولىكتەر وبلىستىق جانە اۋداندىق اۆتوكولىك جولدارىنا 11 ملرد-قا جۋىق زيان كەلتىرسە، ول بويىنشا تەك 1 ملرد. تەڭگە عانا ايىپپۇل سالىنعان. ال، قازاقستاننىڭ اۆتوجولدارىندا جۇرەتىن اۋىر سالماقتى اۆتوكولىكتەردىڭ 10 پروتسەنتى عانا باقىلاۋ بەكەتتەرىندە تەكسەرىلەدى ەكەن. بۇل دا اۆتوكولىك جولدارىنىڭ جىلدام بۇزىلۋىنا ءوز اسەرىن تيگىزەتىن كورىنەدى.

جاھاندىق باسەكەگە قابىلەتتىلىك يندەكسىنىڭ نۇسقاسى بويىنشا ۇزدىك جانە ناشار جولدارى بار ەلدەر رەيتينگىسىندە 2019 جىلى قازاقستان 100-دەن 43,2 بالل جيناپ، 141 ەلدىڭ ىشىندە 93-ورىنعا يە بولدى.

اتالعان كورسەتكىش بويىنشا، كورشىلەس – تاجىكستان 50-ءشى ورىندا بولسا، ءازىربايجان – 27-ورىن العان.

ال، وسى جىلدىڭ ءساۋىر ايىندا قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ 2020 جىلى جول سالاسىنا بيۋدجەتتەن 680 ميلليارد تەڭگە بولىنگەنىن مالىمدەدى.

ايتا كەتەيىك، بۇعان دەيىن Abai.kz سايتىندا «قازاقستانداعى جول ساپاسى نەگە ناشار؟» دەگەن ساۋالعا مۇناي-حيميا سالاسىنىڭ مامانى عالىمجان جۋسانباەۆ جاۋاپ بەرگەن بولاتىن.

Abai.kz