اقسۋ قالاسىنداعى قالقامان كەنتىندە شەنەۋنىكتەر دەنە شىنىقتىرۋ جانە ساۋىقتىرۋ كەشەنىن پايدالانۋعا بەرىپ، جەرگىلىكتى حالىقتىڭ «تاقياسىن اسپانعا تىك اتقىزامىز» دەپ ءسوز بەرگەلى قاي ۋاقىت؟! بىراق بۇل ۋادەنىڭ قۇمعا سىڭگەن سۋداي، ءىزى دە قالماي وتىر.

اقسۋ قالاسىنداعى قالقامان كەنتىندە شەنەۋنىكتەر دەنە شىنىقتىرۋ جانە ساۋىقتىرۋ كەشەنىن پايدالانۋعا بەرىپ، جەرگىلىكتى حالىقتىڭ «تاقياسىن اسپانعا تىك اتقىزامىز» دەپ ءسوز بەرگەلى قاي ۋاقىت؟! بىراق بۇل ۋادەنىڭ قۇمعا سىڭگەن سۋداي، ءىزى دە قالماي وتىر.
نەگىزى، بۇل تۇرمىسقا اۋاداي قاجەت كەشەن اعىمداعى جىلدىڭ 20 قاڭتارىندا پايدالانۋعا بەرىلىپ، قىزىعىن جەرگىلىكتى حالىق كورۋى قاجەت ەدى. الايدا بۇگىندە پايدالانۋعا بەرمەك تۇگىلى، ول عيماراتتىڭ ىشىنە ادام كىرۋگە قورقادى. Ђيتكەنى مەردىگەرلەر جۇرگىزگەن قۇرىلىستىڭ ساپاسى تىم تومەن، ءتىپتى قابىرعالارىندا جارىقشاقتار پايدا بولعان. جاڭا قۇرىلىس ماتەريالدارىنان سالدىق دەپ ەسەپ بەرەتىن مەردىگەرلەردىڭ ءسوزى اۋاعا ۇشتى. قازىرگى ۋاقىتتا جارىقشاقتاردىڭ ارا-جىگى 3-4 سانتيمەتردى قۇرايدى. ياعني عيماراتتى پايدالانۋعا بەرۋ ماسەلەسىنەن بۇرىن، عيمارات قۇلاپ قالىپ، بىرەۋ-مىرەۋدى جازىم ەتە مە دەگەن قاۋىپ العا شىققان. سول سەكىلدى كوممۋنالدىق جۇيەلەرى دە كوپتىڭ كوڭىلىنەن شىقپاق تۇگىلى پايدالانۋعا جارامسىز. ماسەلەن، تىرشىلىك كوزىمەن جابدىقتاۋعا ارنالعان قۇبىرلارىنان سۋ ساۋلاپ تۇر. ال كەشەندى جىلىتۋعا ارنالعان قازاندىقتاردى قوياتىن جەردىڭ سۇلباسى بار دەمەسەڭ، كوڭىلىڭە قوش بولاتىن تۇك جوق. شەنەۋنىكتەر جىل باسىندا جۇرتتى جارىلقايدى دەگەن ساۋىقتىرۋ ورتالىعىندا ءالى قاجەتتى جابدىقتاردىڭ بارلىعى ورناتىلماعان. ايتا بەرسەك، شيكىلىكتەر جەتەرلىك. بىراق سوعان قاراماستان، عيماراتتى شەنەۋنىكتەر حالىقتىڭ پايدالانۋىنا بەرەمىز دەپ شەشىپ وتىرعانى تاڭعالدىردى. بۇل ىسكە اقسۋ قالالىق پروكۋراتۋراسى ارالاسپاسا، ىشىنە ادام تۇگىلى مال جىبەرۋگە قورقىنىشتى عيمارات جاماعاتتىڭ يگىلىگىنە بەرىلىپ كەتەر مە ەدى، كىم ءبىلسىن؟
مەردىگەرلەر قىستىڭ باستاپقى ايىندا قولدانۋعا بەرەمىز دەگەن ۋادەمەن اسىراپ، اقىرىندا بەلگىلەنگەن مەرزىمدە «قىزۋ» جۇمىستارىن اياقتاي المادى. مەردىگەرلەر جىبەرگەن كەمشىلىكتەرى ءۇشىن ەكى ەسە جاۋاپ بەرەر دەلىك. ونىمەن قازىر قۇزىرلى ورگان ماماندارى اينالىسۋدا. بۇل مەردىگەردىڭ ءوز ويىنا كەلگەنىن جۇزەگە اسىرعانىنىڭ كورىنىسى ەمەي، نەمەنە؟ ونىمەن قويماي، ورىندالماعان جۇمىستار ءۇشىن اقشا تولەنىپ قويىلعان. تەك قانا تەرەزەلەر ءۇشىن 600 مىڭ تەڭگە قاراستىرىلىپتى. الايدا قوماقتى سوما بولىنگەن اينەكتەردىڭ ساپاسى كوڭىلدەن شىقپايدى.
عيمارات – ەلىمىزدەگى سالاۋاتتى ءومىر سالتىن قالىپتاستىرۋ باعىتى بويىنشا سالىنىپ جاتقان نىسان. ياعني ول – مەملەكەتتىك تاپسىرما، ەلباسىنىڭ قولعا العان ستراتەگيالىق جوسپارلارىنىڭ ءبىرى. جوعارىداعىلار جاقسى بولسىن دەپ جۇرگەندە، جەرگىلىكتى «جۋاندار» اقشا تابۋدىڭ امالىنا كوشكەندەي. قازىرگى ۋاقىتتا اقسۋ قالالىق پروكۋراتۋراسى ماماندارى قارجى پوليتسياسىنا تەكسەرۋ تۋرالى ارنايى تاپسىرما بەرگەن. قۇرىلىس ساراپتاماسى دا بەكىتىلدى. وسى ساراپتاما نەگىزىندە جاسالعان جۇمىستارعا شىنىمەن 46 ملن تەڭگە جۇمسالدى ما، جوق پا، سول جاعى انىقتالماق. ەگەر ولاي بولىپ شىقپاسا، وندا جاۋاپتىلار لايىقتى جازاسىن الۋى كەرەك. بىراق تاعى دا مەملەكەتتىڭ اقشاسىنان شاشاۋ شىعارىپ، كوزگە ۇرارلىق كەمشىلىكتەرمەن جۇمىس جۇرگىزەتىن مەردىگەردىڭ ماڭدايىنان سيپاۋعا عانا دارمەنى جەتەتىندەر «اقتالىپ» شىقپاسا جارار ەدى.

بەيبىت بوجەن پاۆلودار قالاسى
«ايقىن» گازەتى 30 ماۋسىم 2009 جىل