الماتى وبلىسىنا قاراستى ىلە اۋدانىندا قونىس توي! الماتى ىرگەسىندە تۇرعان داعى بورالداي كەنتىندە  130 پاتەرلى  كوپقاباتتى ءۇي پايدالانۋعا بەرىلدى.

باسپانا ەڭ اۋەلى  ءبىرىنشى كەزەكتە كوپبالالى انالارعا، جاس ماماندارعا، ءۇي كەزەگىندە تۇرعان اۋدان تۇرعىندارىنا «7-20-25» جانە «5-10-20» مەملەكەتتىك باعدارلاماسىمەن بەرىلدى. اۋدان اكىمى باعدات قاراساەۆ بۇل مەملەكەت باسشىسىنىڭ الەۋمەتتىك ماسەلەگە نازار اۋدارۋىنىڭ جەمىسى دەيدى.

«پرەزيدەنتىمىز قاسىم-جومارت توقاەۆ ەلدى قولجەتىمدى باسپانامەن قامتاماسىز ەتۋدى كۇن تارتىبىنەن تۇسىرگەن ەمەس. مىنە، بۇگىن ۇلى مەرەكە قارساڭىندا «ازار» جاۋاپكەرشىلىگى  شەكتەۋلى سەرىكتەستىگى سالعان كوپقاباتتى تۇرعىن ءۇي كەشەنىنىڭ پاتەرلەرى ءوز يەلەرىن تاپتى» – دەپ، مۇنداي يگى شارا الداعى ۋاقىتتا جالعاسىن تاباتىنىن سەنىممەن ايتتى.

ازاتتىق كۇنى باسپانى بولىپ جاتقاندار تاۋەلسىزدىككە ءتاۋ ەتىپ، بۇل ەڭ بىرىنشىدەن دەربەستىكتىڭ ارقاسى دەدى.

«بۇل – ءبىز ءۇشىن زور قۋانىش. تۇرمىسقا شىققالى 13 جىلدىڭ ءجۇزى بولىپتى. باسىمىزدا ءبىر پاتەر بولسا ەكەن دەپ ارمانداۋشى ەدىك. مىنە، بۇگىن سول ارمانىمىزعا قول جەتكىزدىك. «7-20-25» مەملەكەتتىك باعدارلاماسى ارقىلى  15 جىلعا نەسيەمەن الدىق. ءۇي كەزەگىندە 7 جىل تۇردىم. وسى كۇنگە دەيىن پاتەر جالداپ جۇرگەنبىز. قۋانىشتىمىز. تاۋەلسىزدىك مەرەكەسى قۇتتى بولسىن! ءۇش ۇلىم، ءبىر قىزىم بار. ەلىمىز تاۋەلسىز بولماسا وسىنداي جاعدايعا جەتەرمە ەدىك. وتە جاقسى كوڭىل كۇيدەمىز»، – دەدى.  جاڭادان پاتەر الىپ قۋانىشقا كەنەلگەن كەنت تۇرعىنى فاريدا ەسەنگەلدىقىزى.

قۋانىشقا كەنەلگەندەر اراسىندا ءومىر ساپارى مەن ەڭبەك ساپارىنا جاڭادان شىققان جاستار دا بار.

«مەن باقىتتى جانداردىڭ ءبىرىمىن. سەبەبى مەنىڭ جاڭا پاتەرمى بار. مەن بۇل ۇيگە مەملەكەتتىك باعدارلامالار اياسىندا قول جەتكىزدىم. ءتورت جىلدان بەرى كەزەكتە تۇردىم. تاۋەلسىزدىك كۇنى قۋانىشقا كەلەلىپ وتىرمىن»، – دەپ قۋانىشىن جاسىرا المادى جاس مامان  دانا قارجاۋبەكقىزى.

الماتىداي مەگاپوليسكە جاقىن ورنالاسقان ىلە اۋدانى الماتى وبلىسىنداعى ەڭ ءىرى اۋدانداردىڭ ءبىرى. جىل سايىن حالقىنىڭ سانى دا ارتىپ كەلە جاتىر. بۇگىندە حالقىنىڭ سانى 215 مىڭنان اسىپ كەتكەن. باسپانا كەزەگىندە تۇرعاندار سانى ءتورت مىڭعا جۋىق. بيىل ەلۋ مىڭ شارشىدان اساتىن باسپانا حالىققا بەرىلدى. دەسەدە،  قۇرىلىس سالاسى توقتايتىن ەمەس. كەلەسى جىلى الپىس مىڭ شارشى مەتر كوپ قاباتتى ءۇي مەن جەكە ۇيلەر سالۋ جوسپاردا بار ەكەن.

«كەلەسى جىلى دا وسى «ازار» قۇرىلىس كومپانياسىمەن بورالداي كەنتىندە تاعى دا ءۇش كوپ قاباتتى تۇرعىن ءۇي سالىنادى. ءجۇز ون پاتەر بولادى. ۇكىمەتتەن توقسان ميلليون ءۇيدىڭ جىلۋىنا كارىزىنە اقشا بولىنگەن. ول دايىن. ەندى ءۇيدىڭ تەك قۇرىلىسى جۇرەدى.سودان كەيىن جوبالىق-سمەتالىق قۇجاتى دايىن  ءۇش توعىز قاباتتى 72 پاتەرلى ءۇي سالۋ جوسپاردا بار»، – دەدى اۋدان باسشىسى باعدات قاراساەۆ.

قۇرىلىس ءبىلىم سالاسىندا دا قارقىندى ءجۇرىپ جاتىر. وتەگەن باتىر كەنتىندەگى 1957 جىلى پايدالانۋعا بەرىلگەن  «قۋات» بالاباقشاسى كۇردەلى جوندەۋدەن ءوتىپ پايدالانۋعا سالتاناتتى تۇردە بەرىلدى. ساپالى جوندەۋدەن وتكەن بالاباقشاعا زاماناۋي قاجەتتى بارلىق زاتتار الىندى. ءۇش اۋىسىمدى مەكتەپتەردى ازايتىپ، ءبىلىم سالاسىن جاقسارتۋ ءۇشىن اۋداندا جاسالىپ جاتقان جۇمىستار دا بار.

اششىبۇلاق اۋىلدىق وكرۋگىندەگى №19 ورتا مەكتەپتىڭ جانىنا سالىنعان 300 ورىندىقتى جاپسارجاي اشىلدى.  ءبىلىم ورداسىنىڭ جاپسارجايى زاماناۋي جابدىقتارمەن قامتىلعان. اعىلشىن، حيميا، فيزيكا جانە ينفورماتيكا كابينەتتەرىمەن قاتار، ۇلدار مەن قىزدارعا ارنالعان ەڭبەك ءپانى كابينەتتەرى، سپورت زال مەن اسحانا دا سالىنىپتى. سونىمەن قاتار، ۇستازدارعا ارنالعان ءماجىلىس زالى دا بار. بۇل زالدا كەز كەلگەن ءىس-شارالاردى وتكىزۋ ءۇشىن ۇستازدار مەن وقۋشىلارعا بارلىق جاعداي جاسالعان. اۋداندا ون توعىز مەكتەپ ءۇش اۋىسىمدا وقىپ جاتىر ەكەن. بىراق ولاردى سانى قىسقارا بەرمەك.

«ءبىزدىڭ اۋدانىمىزعا جىل سايىن ءۇش جارىم مىڭ بالا مەكتەپ تابالدىرىعىن اتتايدى.سوڭعى جىلدارى جاڭا جيىرما مەكتەپ سالىندى. ءۇش جاپسارجاي سالىندى. ونىڭ بىرەۋى بۇگىن اشىلىپ وتىر.تاعى دا جەتى مەكتەپ سالىنىپ جاتىر. ونىڭ تورتەۋى كەلەسى جىلى ءبىرىنشى قىركۇيەكتە اشىلادى. تاعى ۇشەۋى 2021 جىلدىڭ جەلتوقسان ايىندا اشىلادى دەپ جوسپارلانۋدا»، – دەيدى ىلە اۋدانى ءبىلىم ءبولىمىنىڭ باسشىسى ءلاززات كاتكەەۆا.

اۋدان باسشىلىعى تەك قانا بيۋدجەتكە عانا بايلانباي باسپانا سالۋ جۇمىستارىن جەكەلەگەن دەمەۋشىلەر ارقىلى دا جانداندىرماق. ماسەلەن، كەلەر جىلى “ەتالون” كومپانياسى ون گەكتار جەرگە ءجۇز باسپانا سالىپ، كوتتەدجدەر قالاشىعى بوي كوتەرمەك.

Abai.kz