پرەمەر-مينيستر اسقار مامين قاراعاندى وبلىسىنىڭ ساران قالاسىندا اۆتوبۋستار، ەلەكتروبۋستار مەن ارنايى تەحنيكا شىعاراتىن «QazTehna» زاۋىتىنىڭ اشىلۋ راسىمىنە قاتىستى. بۇل تۋرالى ۇكىمەتتىڭ ءباسپاسوز قىزمەتى حابارلادى.

كاسىپورىن الەمدەگى اسا ءىرى اۆتوبۋس ءوندىرۋشى «Yutong» كومپانياسىمەن سەرىكتەستىكتە قۇرىلعان. جوبانىڭ قۇنى شامامەن 23 ملرد تەڭگەنى قۇرايدى، مىڭنان استام جاڭا جۇمىس ورنى قۇرىلادى. جىلدىق جوبالىق قۋاتى – 1200 اۆتوبۋس پەن ەلەكتروبۋس، سونداي-اق 500 بىرلىك ارنايى تەحنيكا.

زاۋىتتا بىرنەشە وندىرىستىك تسيكلداردى: دانەكەرلەۋدى، بوياۋدى، قۇراۋىشتاردى شىعارۋدى، زەرتتەۋ ورتالىعىن، سونداي-اق تەحنيكانى سىناۋ جانە تەكسەرۋگە ارنالعان ترەكتى ىسكە قوسۋ قاراستىرىلعان.

«Yutong» ماركالى اۆتوبۋستار بارلىق كونتينەنتتە 30-دان استام ەلدە پايدالانىلادى. تەحنيكا قوعامدىق تاسىمالداۋ سالاسىنداعى بارلىق الەمدىك ساپا ستاندارتتارىنا سايكەس كەلەدى. اۆتوبۋستار مۇمكىندىگى شەكتەۋلى جاندارعا ارنالعان ارنايى پاندۋستارمەن، ورىندارمەن، ەلەكتروندى بيلەت بەرۋ جانە باقىلاۋ جۇيەسىمەن جابدىقتالعان.

جاڭا جوبا قاراعاندى وبلىسىنىڭ ەكونوميكاسىنىڭ دامۋىنا جانە وتاندىق اۆتوبۋستارمەن قوعامدىق كولىكتى جاڭارتۋ جانە جاڭعىرتۋ باعدارلاماسىن ىسكە اسىرۋعا سەرپىن بەرەدى.

ۇكىمەت باسشىسىنا ساران قالاسىنداعى يندۋستريالىق ايماقتى ودان ءارى دامىتۋ پەرسپەكتيۆاسى، سونداي-اق «وڭاي» ەلەكتروندى بيلەتتەندىرۋ جۇيەسى تۋرالى باياندالدى.

جۇمىس ساپارى اياسىندا ۇكىمەت باسشىسى سونىمەن قاتار تمد-داعى بىردەن-ءبىر «Caterpillar» ماركالى ارنايى تەحنيكا سەرۆيسىنىڭ جانە اۋىر تەحنيكا كومپونەنتتەرىن قالپىنا كەلتىرۋدىڭ تولىق تسيكلى بار «بورۋسان ماكينا قازاقستان» جشس-ىندا بولدى.

Abai.kz