اقش مەملەكەتتىك دەپارتامەنتى King Air بارلاۋ ۇشاقتارىن قازاقستانعا 128 ميلليون دوللارعا ساتۋعا رۇقسات بەردى. بۇل تۋرالى اقش-تىڭ قورعانىس سالاسىنداعى ىنتىماقتاستىق جانە قاۋىپسىزدىك اگەنتتىگى حابارلادى.

«مەملەكەتتىك دەپارتامەنت قازاقستان ۇكىمەتىنە بارلاۋ جانە قاداعالاۋ (ISR) جۇيەلەرىمەن جانە سوعان قاتىستى جابدىقتارمەن King Air B300ER Scorpion ۇشاعىن سمەتالىق قۇنى 128,1 ميلليون دوللارعا ساتۋدى ماقۇلداۋ تۋرالى شەشىم قابىلدادى. قورعانىس ىنتىماقتاستىعى جانە قاۋىپسىزدىك اگەنتتىگى كەشە كونگرەسستى ىقتيمال ساتۋ تۋرالى حاباردار ەتە وتىرىپ، قاجەتتى سەرتيفيكات بەردى»،- دەلىنگەن امەريكالىق بيلىكتىڭ حابارلاماسىندا.

وسىلايشا، قازاقستان ۇكىمەتى Raytheon AST TITAN Communications Intelligence (COMINT) سەنسورلارىنىڭ ءۇش جيىنتىعىن ساتۋدى سۇرادى (ەكەۋى ورناتىلعان، بىرەۋى قوسالقى).

«ۇسىنىلعان ساتىلىم ورتالىق ازياداعى ساياسي تۇراقتىلىق پەن ەكونوميكالىق پروگرەسستىڭ قوزعاۋشى كۇشى بولىپ تابىلاتىن سەرىكتەس ەلدىڭ قاۋىپسىزدىگىن ارتتىرۋ ارقىلى اقش-تىڭ سىرتقى ساياساتى مەن ۇلتتىق قاۋىپسىزدىك ماقساتتارىن قولدايدى.

ۇسىنىلىپ وتىرعان ساتۋ قازاقستاننىڭ ايماقتىق قاۋىپ-قاتەرلەرگە توسقاۋىل قويۋ جانە شەكارا قاۋىپسىزدىگى وپەراتسيالارىن جۇرگىزۋ قابىلەتىن ارتتىرۋ ارقىلى قازىرگى جانە بولاشاقتاعى قاۋىپ-قاتەرلەرگە توتەپ بەرۋ قابىلەتىن ارتتىرادى.

قازاقستان بۇل قۇرال-جابدىقتار مەن قىزمەتتەردى ءوزىنىڭ قارۋلى كۇشتەرىنە قابىلداۋدا قيىنشىلىق كورمەيدى. ۇسىنىلعان وسى جابدىقتى ساتۋ جانە قولداۋ ايماقتاعى نەگىزگى اسكەري تەڭگەرىمدى وزگەرتپەيدى», - دەپ قوستى اقش اگەنتتىگى.

ايتا كەتەيىك، King Air بارلاۋ ۇشاقتارىنىڭ باس مەردىگەرى -  Sierra Nevada Corporation كومپانياسى.

Abai.kz