ازەربايجان قورعانىس مينيسترلىگى ارميان قارۋلى توبىنىڭ قاراباقتاعى پوزيتسيالارعا شابۋىل جاساعانىن حابارلادى. اسكەري ۆەدومستۆو مالىمەتىنشە، ءبىر ادام قازا تاۋىپ، تاعى ءبىر ادام جاراقات العان.

"27 جەلتوقساندا ساعات 15.30-دا (استانا ۋاقىتى بويىنشا 17.30-دا) زاڭسىز ارمەنيالىق قارۋلى توپ نە ايماقتا قالعان وترياد اگدام اۋىلى باعىتىنا شابۋىل جاسادى. ناتيجەسىندە ازەربايجان اسكەري قىزمەتشىسى گانباروۆ ەلمير رايل وگلۋ قازا تاۋىپ، اسكەري قىزمەتشى اليەۆ ەمين سۋلەيمان وگلۋ جارالاندى", - دەلىنگەن ۆەدومستۆو حابارلاماسىندا.

قورعانىس مينيسترلىگىنىڭ مالىمەتىنشە، جاراقات العان اسكەري قىزمەتشى العاشقى مەديتسينالىق كومەك كورسەتىلگەننەن كەيىن مەديتسينالىق مەكەمەگە جەتكىزىلگەن.

ەسكە سالايىق، قىركۇيەك ايىنىڭ سوڭىندا تاۋلى قاراباقتا ەكى ەل اراسىنداعى جانجال قايتا ءورشي تۇسكەن بولاتىن. ازەربايجان مەن ارمەنيا سوعىستى توقتاتۋ تۋرالى كەلىسىمگە كەلدى. ودان بولەك، رەسەيلىك بىتىمگەرلەر وڭىردەگى جاعدايدى باقىلاۋعا العان بولاتىن.

Abai.kz