سەناتور مۇرات باقتيارۇلى ءبىلىم جانە عىلىم مينيسترلىگىن ەكى ءتۇرلى ۆەدومستۆوعا ءبولۋدى ۇسىندى. 

دەپۋتاتتىڭ پىكىرىنشە، ءبىلىم جانە عىلىم مينيسترلىگىنە كوپ جۇمىس جۇكتەلگەن.

«ءبىلىم جانە عىلىم مينيسترلىگى بالاباقشادان باستاپ جوعارى وقۋ ورنىنان كەيىنگى بىلىمگە دەيىنگى ۇزدىكسىز ءبىلىم بەرۋ جۇيەسىنىڭ بارلىق ماسەلەسىمەن اينالىسادى. بۇل وتە ۇلكەن جۇكتەمە. بۇل ماسەلە ەل حالقىنىڭ جارتىسىن قامتيدى. مۇنداي جۇكتەمە باسقا مينيسترلىكتە جوق. سوندىقتان، مەنىڭ ويىمشا، ءبىلىم جانە عىلىم مينيسترلىگىنىڭ بازاسىندا ەكى مينيسترلىك قۇراتىن كەز كەلدى: شتات سانىن كوبەيتپەي، ءبىلىم مينيسترلىگى مەن جوعارى ءبىلىم جانە عىلىم مينيسترلىگى دەپ بولگەن ءجون»، - دەدى مۇرات باقتيارۇلى سەنات وتىرىسىندا.

سونىمەن قاتار، دەپۋتات الەمنىڭ كوپتەگەن ەلدەرى مەكتەپ وقۋشىلارى مەن ستۋدەنتتەردى ءداستۇرلى فورماتتا وقىتىپ جاتقانىن ايتتى.

«بايقوڭىر قالاسىندا جەتى ورىس مەكتەبىنىڭ بارلىق سىنىپ وقۋشىلارى ءداستۇرلى تۇردە وقيدى، ال قازاقستاندىق مەكتەپ وقۋشىلارى قاشىقتان وقيدى. مۇنى قالاي تۇسىنۋگە بولادى؟ ەكى سەمەستر بويى ءبىلىم الماعان بالالار ءۇشىن ونى قالپىنا كەلتىرۋ قيىنعا سوعاتىنى انىق، اسىرەسە اۋىل مەكتەپتەرىندە. ءتىپتى ءبىلىم ساپاسى بىرنەشە جىلعا كەشەۋىلدەۋى مۇمكىن. سوندىقتان ەلىمىزدىڭ بارلىق اۋىلدارى مەن ايماقتارىنداعى وقۋشىلار ءداستۇرلى ءبىلىم بەرۋ جۇيەسىنە قايتا كوشۋى قاجەت»، - دەدى دەپۋتات.

ول سونىمەن قاتار ۋنيۆەرسيتەت رەكتورلارى ءۇشىن ناقتى وكىلەتتىك مەرزىمىن بەلگىلەۋدى ۇسىندى.

«ەلدە ونداعان جىلدار بويى رەكتور بولىپ جۇمىس ىستەيتىن ادامدار بار. مەنىڭ ويىمشا، بۇل نارىقتىق داۋىردە دۇرىس ەمەس. ءبىز ۋنيۆەرسيتەتتە رەكتورلار ەكى مەرزىمنەن ارتىق رەكتور بولا المايتىنداي ەتىپ، كەم دەگەندە ءتورت جىلعا تاعايىندالادى دەگەن قاعيدانى ەنگىزۋىمىز كەرەك»، - دەپ قوستى سەناتور.

Abai.kz