الماتى قالاسى تۇركسىب اۋداندىق سوتى قر ساۋدا جانە ينتەگراتسيا مينيستىرلىگى تۇتىنۋشىلاردىڭ قۇقىقتارىن قورعاۋ كوميتەتىنىڭ «بەك ەير» اق-عا دەگەن ءتورتىنشى تالاپ ارىزىن قاناعاتتاندىردى. وندا 153 ادامنىڭ مۇددەسىن قورعاۋ ءۇشىن 9,3 ملن تەڭگە قارجىنى قايتارۋ كوزدەلگەن.

كوميتەت قابىلداعان شارالار ناتيجەسىندە سوت تارتىبىمەن 1678 ادامنىڭ قۇقىقتارى قورعالدى. «بەك ەير» اۋەكومپانياسى تۇتىنۋشىلارعا 103,3 ملن تەڭگە قايتارۋى ءتيىس.

كوميتەتكە كۇن سايىن تۇتىنۋشىلاردىڭ شاعىمدارى كەلىپ تۇسۋىنە بايلانىستى بەسىنشى تالاپ سوتقا بەرىلەدى.

تۇتىنۋشىلاردىڭ قۇقىقتارىن قورعاۋ كوميتەتىنىڭ «بەك ەير» اق-عا العاشقى ەكى تالابى زاڭدى كۇشىنە ەنگەنىن ەسكە سالامىز. زاڭناما تالاپتارىنا سايكەس سوت شەشىمدەرىن ورىنداۋعا تەك سوت ورىنداۋشىلارىنا عانا ۋاكىلەتتىك بەرىلگەن.

«اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» قازاقستان رەسپۋبليكاسىنىڭ زاڭىنا سايكەس اتقارۋشىلىق ءىس جۇرگىزۋ، مەرزىمدىك جازالار تۋرالى اتقارۋشىلىق قۇجاتتاردى قوسپاعاندا، سونداي-اق زاڭنامالىق اكتىلەردە وزگە دە ورىنداۋ مەرزىمدەرى بەلگىلەنگەن جاعدايلاردى قوسپاعاندا، ول قوزعالعان كۇننەن باستاپ ەكى ايدان اسپايتىن مەرزىمدە اياقتالۋعا ءتيىس.

سوندىقتان تۇتىنۋشىلار سوت شەشىمدەرىن ورىنداۋ بويىنشا قاجەتتى جانە ۋاقتىلى شارالار قابىلدايتىن سوت ورىنداۋشىلارىنا جۇگىنۋگە قۇقىلى.

اتقارۋ پاراعى بەرىلگەن سوت ورىنداۋشىسى تۋرالى مالىمەتتەردى الۋ ءۇشىن تۇتىنۋشىلار الماتى قالاسىنىڭ جەكە سوت ورىنداۋشىلارىنىڭ پالاتاسىنا جۇگىنۋى قاجەت.

Abai.kz