قازاقستاننىڭ سالىق ورگاندارى ەلدەگى ەكى ءۇكىمەتتىك ەمەس ۇيىم – قازاقستانداعى ادام قۇقىعى جءونىندەگءى حالىقارالىق بيۋرو مەن "حالىقارالىق قۇقىقتىق باستامانىڭ" جۇمىسىن ءۇش ايعا شەكتەدى.

سالىق ورگاندارى ەكى ۇيىمعا اكىمشىلىك ايىپپۇل دا سالدى. بۇل تۋرالى ازاتتىققا ۇيىم وكىلدەرى حابارلادى. سالىق ورگاندارىنىڭ شەشىمى 25 قاڭتاردا الماتىدا قابىلدانعان، ءالى زاڭدى كۇشىنە ەنگەن جوق.

بيۋروعا ەكى ميلليون تەڭگەدەي ايىپپۇل سالىنىپ، ءۇش ايعا جۇمىسى توقتاتىلدى. ۇيىم ديرەكتورى ەۆگەني ءجوۆتيستىڭ سوزىنشە، ءىستى قاراۋ كەزىندە كوپ زاڭ بۇزۋشىلىق بولعان.

- سالىق ورگانىنىڭ قىزمەتكەرى ءىستى قاراعان ادامعا كوپ جاعدايدى ايتىپ وتىردى. ءبىز سول سالىق ورگانى قىزمەتكەرىنە سۇراق قويماق بولدىق. ءبىز كوپتەگەن دايەك ۇسىندىق، بىراق ونى قابىلدامادى. شەشىم ءالى كۇشىنە ەنگەن جوق، مەملەكەتتىك كىرىس دەپارتامەنتىنە شاعىم تۇسىرۋگە ون كۇن ۋاقىتىمىز بار. ودان كەيىن سوتقا بارامىز، ەگەر بۇل ءىستىڭ ساياسي استارى بولسا، ءۇمىت از، - دەيدى ول.

ءجوۆتيستىڭ سوزىنشە، بيۋرو جۇمىسىنىڭ ءۇش ايعا توقتاۋى ۇيىم قىزمەتىنە كوپ زيانىن تيگىزبەك.

- قىزمەتكەرلەرگە قيىن بولماق. بىزدە 44 ادام جۇمىس ىستەيدى، پاندەميا كەزىندە ولار تابىسسىز قالماق. بۇل بيلىككە نە ءۇشىن قاجەت، تۇسىنبەدىم، - دەيدى جوۆتيس.

بيۋرو سياقتى ادام قۇقىعى ماسەلەسىمەن اينالىساتىن "حالىقارالىق قۇقىقتىق باستاما" ۇيىمىنىڭ دا قىزمەتى ءۇش ايعا توقتاپ، 1,1 ميلليون تەڭگە ايىپپۇل سالىندى. ۇەۇ بۇل ءىستى ۇيىم جۇمىسىن بۇزۋ ءۇشىن جاسالعان "ساياسي تاپسىرىس" دەپ سانايدى.

- ءبىزدى بارلىق قۇقىقتان ايىرىپ، جاعدايدى رەتتەۋگە مۇمكىندىك بەرمەدى. ءبىزدى جازالاۋدى عانا ويلادى. بۇل – تاعى ءبىر ساياسي تاپسىرىس، قۋدالاۋ. ولار ءبىزدىڭ بۇۇ، ەقىۇ جانە ەۋروپا وداعىنداعى ەلدەرمەن بايلانىسقانىمىزدى قالامادى. ەل ىشىندە بىردە-ءبىر بىرلەستىكتى حالىقارالىق ۇيىمدارمەن بايلانىستىرماس ءۇشىن ءبىزدىڭ اۋىزىمىزدى جاپتى، - دەيدى "حالىقارالىق قۇقىقتىق باستاما" جەتەكشىسى امانگەلدى شورمانباەۆ.

بۇل ۇيىم دا سالىق ورگاندارىنىڭ شەشىمىنە شاعىم تۇسىرمەك. شورمانباەۆ وسى شەشىمنەن كەيىن ۇيىم مۇلدە جابىلىپ قالۋى مۇمكىن دەپ سانايدى.

ازاتتىق بۇعان دەيىن مەملەكەتتىك كىرىس كوميتەتىنە رەسمي حات جولداپ، ۇەۇ-عا جاسالعان سالىق تەكسەرىسى مەن ولارعا تاعىلعان ناقتى ايىپ تۋرالى سۇراعان. بۇل رەسمي ساۋالعا جاۋاپ كەلگەن جوق.

2019 جىلى قاراشادا سالىق ورگاندارى ەلدەگى 13 قوعامدىق جانە قۇقىق قورعاۋ ورگاندارىنا تەكسەرىسپەن كەلگەن. ۇيىمدار بۇل تەكسەرىستى "نەگىزسىز" دەگەن ەدى. ۇيىمداردىڭ باسىم بولىگى ەلدەگى سايلاۋدى جانە ءسوز بوستاندىعىن قاداعالايدى. سالىق ورگاندارىنىڭ ءبىر ۋاقىتتا باستالعان تەكسەرىسىن ۇيىمدار "ساياسي قىسىم" دەگەن.

15 قاڭتاردا الماتى قالاسى المالى اۋدانىنىڭ سالىق دەپارتامەنتى سايلاۋدى قاداعالاۋمەن اينالىساتىن "ەحو" بىرلەستىگىنىڭ جۇمىسىن ءۇش ايعا توقتاتىپ، 1,1 ميلليون تەڭگە ايىپپۇل سالعان.

19 قاڭتاردا نۇر-سۇلتانداعى ەسىل اۋداندىق سالىق باسقارماسى "ەركىندىك قاناتى" ۇيىمىنا "سالىق ەسەبىن ۋاقىتىندا تاپسىرمادى" دەپ 277 مىڭ تەڭگە ايىپپۇل سالعان.

سالىق ورگاندارى الداعى كۇندەرى تاعى دا بىرنەشە ۇيىمنىڭ ءىسىن قاراماق.

جاقىندا Human Rights Watch (HRW) حالىقارالىق قۇقىق قورعاۋ ۇيىمى قازاقستاندىق مەملەكەتتىك ورگانداردىڭ ءىس-ارەكەتىن "رەپرەسسيۆتى شارالار" دەپ باعالاپ، قاتتى سىناعان.

دەرەككوز: Centralasian

Abai.kz