سوتتىڭ ءباسپاسوز قىزمەتى حابارلاعانداي، ەكس-پرەزيدەنت المازبەك اتامباەۆتىڭ ادۆوكاتتارى ونى ۇيقاماققا شىعارۋ جونىندە ءوتىنىش بەرگەن. بىراق سوت بۇل ءوتىنىشتى اشىق قالدىرعان.

اتامباەۆ سوتقا جەتكىزىلمەگەندىكتەن سوت وتىرىسى 3 اقپانعا شەگەرىلدى.

بىلتىر 30 قاراشادا قىرعىزستاننىڭ جوعارعى سوتى بۇل ىسكە قاتىستى سوت ۇكىمىن جويىپ، قايتا قاراۋعا ءبىرىنشى ماي اۋداندىق سوتىنا جىبەرگەن. سول كەزدە دە اتامباەۆتى ۇيقاماققا شىعارۋ جونىندە ءوتىنىش جولدانعان. بىراق قاناعاتتاندىرىلمادى.

جەلتوقسان ايىندا ەكس-پرەزيدەنتتىڭ دەنساۋلىعىنىڭ ناشارلاۋىنا بايلانىستى ونى ۇقك تەرگەۋ اباقتىسىنان №47 كولونياعا اۋىستىرعان.

2019 جىلدىڭ 7-8 تامىزىندا باتۋكاەۆتى زاڭسىز بوساتۋ ءىسىن تەرگەۋ اياسىندا كوي-تاش اۋىلىندا المازبەك اتامباەۆتى ۇستاۋ وپەراتسياسى جۇرگەن. سول كەزدە ارنايى جاساقتىڭ جاۋىنگەرى قازا تاۋىپ، 200-دەن استام ادام جارالانعان.

بۇل وقيعاعا قاتىستى 19 ادامعا ايىپ تاعىلدى. ولاردىڭ اراسىندا المازبەك اتامباەۆ تا بار. ەكس-پرەزيدەنتكە بۇدان بولەك كوي-تاشتاعى جەر ۋچاسكەسىن زاڭسىز يەلەندى، بىشكەكتەگى جىلۋ ەلەكتر ورتالىعىن مودەرنيزاتسيالاۋدا كوررۋپتسياعا جول بەردى، "تەرەك" كەنىشىن زاڭسىز يەلەندى دەگەن ايىپتار تاعىلعان.

Abai.kz