قالاباەۆ زامانبەك نۇرقادىلۇلى...
ەل شۋلاپ جاتقاننان سوڭ، زامانبەك نۇرقادىلوۆتىڭ تۋىستارىنىڭ شەجىرەسىن قاراپ شىقتىم. سودان ۇققانىم مىناۋ!
قالابايدان كەبەكباي، بايقوجا، نۇرقوجا اتتى ءۇش ۇل تۋعان.
كەبەكبايدان - نۇرقادىل، نۇرقادىلدەن - زامانبەك تارايدى.
دەمەك، قالاباي دەگەن زاكەڭنىڭ اكەسىنىڭ ەمەس، ارعى باباسىنىڭ اتى. قۇجات قاتە تولتىرىلىپ، تەگى مەن اكەسىنىڭ اتى اۋىسىپ كەتكەن.
دۇرىسى بىلاي:
- زامانبەك (بالا)
- نۇرقادىل (اكە)
- كەبەكباي (اتا)
- قالاباي (بابا)
الباندار شەجىرەسىندە دە، قوڭىربورىك تامالار شەجىرەسىندە دە وسىلاي تارقاتىلعان (دۇرىسىن ءبىر اللا بىلەدى).
ال، سىرقات رايا انامىز قالاباي بابانىڭ تاعى ءبىر ۇلى بايقوجادان (قالابايدىڭ بەل بالاسىنان) تۋعان قىز.
رايا اپاي - قالابايعا نەمەرە.
زامانبەك اعا - قالابايعا شوبەرە.
قازاقى جولمەن قۋالاساڭ، سىرقات كىسى زاكەڭنىڭ ەمەس، نۇرقادىلدىڭ قارىنداسى بولىپ شىعادى.
قۇدايبەردىنىڭ بالاسى شاكارىمنىڭ جاسى ابايمەن قارايلاس بولدى عوي. ءدال سول سياقتى زاكەڭنىڭ جاسى كىشى اكەسىنىڭ كەي بالالارىنان ۇلكەن بولىپ تۇر.
دەمەك، رايا انامىزدىڭ كوزىمەن قاراساڭ زاكەڭ ەكەۋىنىڭ اراسى ەكى اتا ارالاپ بارىپ قوسىلادى.
ال، زامانبەك اعانىڭ ۇرپاعى ءۇشىن ارادا ءۇش اتا بار.
نۇرقادىل سوعىستا قازا تاپقان سوڭ، اناسى پانارگۇل مەن زامانبەكتى الىپ، ناعاشىلارىنا كوشىپ كەتكەن.
ەندى امەڭگەرلىك ماسەلەسىنە كەلسەك... قازاق سالتىندا باۋىر باۋىرىنىڭ ايەلىنە امەڭگەر بولا الادى. ال، كىشى اكەسى (بايقوجا) بالاسى نۇرقادىلدىڭ (اعاسى كەبەكبايدىڭ ۇلى) جەسىرىن امەڭگەرلىككە الۋعا حاقىسى جوق.
سوندىقتان انىعىنا كوز جەتكىزبەي جاتىپ، «تۋعان باۋىرى» دەپ شۋلاۋدىڭ قاجەتى جوق-اۋ! «تۋعان باۋىرى» بولعان كۇننىڭ وزىندە ونى اراعا ونداعان جىلدار سالىپ، ءۇي الۋ ماقساتىندا جاريا ەتۋدىڭ نە كەرەگى بار؟
زاكەڭ ناعاشىلارىنىڭ قولىندا وسكەندىكتەن، ءوز تۋىستارىن كەيىننەن تاپسا كەرەك.
راس، ەلدى دۇبىرلەتكەن سۇحباتتى كورىپ شىقتىم. دەرەۋ كوپكە قوسىلىپ، از-ماز اقشا اۋداردىم. ۇلتىم دەپ شەيىت كەتكەن اردا ازاماتتىڭ تۋىسىنىڭ جاعدايى جۇرەكتى اۋىرتتى. زاكەڭ قازىرگى شەندىلەردەي پاراقور بولسا، جاقىندارىن ۇلدە مەن بۇلدەگە وراپ تاستار ەدى عوي دەپ تە ويلادىم. بۇل ءبىر.
ەكىنشىدەن، زاكەڭنىڭ جاماعايىن قارىنداسىنىڭ ءۇيسىز-كۇيسىز ءجۇرۋى زامانبەك نۇرقادىلۇلىنىڭ ارىنىڭ قانداي تازا ەكەنىنە تاعى دا جاريا دالەل بولدى.
سۇحباتتا زاكەڭ جاماعايىن رايا قارىنداسىنا كىشكەنە قىزمەت ۇسىنعانى (تومەننەن باستا دەسە كەرەك), ونى قارىنداسى قابىل الماعانى، كەيىننەن اۋدان باسشىلارىنا حابارلاسىپ، جۇمىسقا تۇرعىزعانى ايتىلىپ قالدى. بۇل دا زاكەڭنىڭ قانداي ءادىل ءھام جاناشىر ادام بولعانىن ايعاقتاي ءتۇستى دەپ ويلايمىن!
دەمەك، ءال-ءازىر بۇلىنگەن ەشتەمە جوق. تەك تۋىستارى تاراپى «ءبىز ولارعا جاردەمدەسىپ تۇرامىز، ءبىزدى نەگە قارالايدى؟» دەپ وكپەلەپ جاتقانىن بايقاپ قالدىم. ەر-توقىمدى باۋىرىڭا الىپ تۋلاعانمەن ەندى ەشتەڭە وزگەرمەيدى. «ءوزىن-ءوزى ءۇش رەت اتتى» دەگەن جالاعا دا شىداعان حالىقپىز عوي! بۇل دا، وتەدى، كەتەدى، ۇمتىلادى...
باستىسى، ەل بولىپ، جاردەم بەرىپ جاتىر. مەنىڭ بىلۋىمشە، ءۇي الاتىن قارجى دا جينالىپ قالسا كەرەك. سىرقات اناسىن ءبىر ءوزى قاراپ جاتقان كەلىنشەكتىڭ دە جاعدايىن تۇسىنەيىك. ونىڭ باستى ماقساتى ءۇي الۋ بولعانى كورىنىپ تۇر. السىن! قۇتتى قونىس بولسىن!
بىراق دەيمىن دە، ەلدىڭ ساناسىنا كوپ كۇدىك ۇيالاتپاي سول ءۇيدى ارۋاقتىڭ اتىن ساۋدالاماي دا الۋعا بولماس پا ەدى؟
مەنى وسى سۇراق مازالايدى؟
ءسىز قالاي ويلايسىز؟
P/S... زاكەڭنىڭ جەتى اتاسى مىنانداي:
- زامانبەك
- نۇرقادىل
- كەبەكباي
- قالاباي
- دوڭباي
- بايقۇلاق
- ساسىق
- قانگەلدى
- بۇقار
- تاما
- جارمان
- قوڭىربورىك
قانات ابىلقايىردىڭ Facebook جەلىسىندەگى جازباسى
Abai.kz
