ءبىراز ءدىنشىل ادامنىڭ شامىنا ءتيىپ كەتەم، بىلەم. اڭگىمەگە ارقاۋ بولاتىن ايشا - مۇحاممەد پايعامباردىڭ ءۇشىنشى ايەلى. جاقىندا ءبىر مولدا «قىزدارىمىزعا ايشا انامىزدىڭ عيبراتتى جولىن بەرۋدى ءناسىپ ەتسىن»، دەدى. بۇل ءسوزى شىمبايىما باتتى.

ايشانىڭ يسلام الەمىندە «شىنشىل»، «مۇمىندەردىڭ اناسى» دەگەن اتى بار. بىراق ايشانىڭ ومىرىندە ونىڭ داڭق-داقپىرتىنا كولەڭكە تۇسىرەتىن جايتتار دا از ەمەس. ونىڭ ءبىرى - مۇحاممەد پايعامباردىڭ نەمەرە ءىنىسى ءارى كۇيەۋ بالاسى، ەركەك كىندىكتىدەن يسلامدى تۇڭعىش قابىلداعان دەپ سانالاتىن ءالي يبن ءابۋ تاليبپەن بيلىككە تالاسىپ سوعىسقانى.

بۇل سوعىس تاريحشىلارعا «تۇيە سوعىسى» دەگەن اتپەن بەلگىلى. جانە سول سوعىستا ەكى جاقتان كەمىندە 30 مىڭعا جۋىق مۇسىلمان قازا تاپقان دەيتىن دەرەك بار. ال قازاقتىڭ اڭىز-ءافساناسىندا ۇلت اناسى دەڭگەيىنە كوتەرىلە العان ايەلدەر جاۋلاسقانداردىڭ ورتاسىنا اق ورامالىن سالىپ، قاستاسقانداردى بىتىمگە شاقىرۋعا ۇمتىلعانى تۋرالى جاعداياتتار كوپ كەزدەسەدى.

قازاق قىزدارىنا ۇلگى تۇتاتىن انا وبرازىنا لايىقتى تۇلعالار وزىمىزدە دە جەتىپ ارتىلادى. تۇركى زامانىندا ەرەكشە قاستەر تۇتقان ۇماي انادان باستاپ، دومالاق انا، ايشا ءبيبى مەن قاراشاش انا، بەرگىدەگى زەرە، ۇلجاندار بىزگە الىستاعى ارابيادا تۋعان، كۇيەۋى ولگەن سوڭ ونىڭ تۋىستارىمەن بيلىك ءۇشىن سوعىسقان ايەلدەن الدەقايدا جاقىن، ءبىز ءۇشىن الدەقايدا قاستەرلى بولۋى ءتيىس.

دانەش بايبولاتوۆتىڭ جازباسى

Abai.kz