تۇيەتاۋىققا ارىز
ارىز
(انسامبل «ەيا» جونىندە)

تۇيەتاۋىققا ارىز
ارىز
(انسامبل «ەيا» جونىندە)

بىزدەر بۇلبۇلدار، اۋەلدەن، ءانشى قاۋىمبىز. باسقاسىن باسقا، ءان جاعىنان كەلگەندە سۇيەمەلدەۋشىنىڭ بىزگە قاجەتى جوق. ءوزىڭىز بىلەسىز، ءبىراز جىل بولدى، ءبىزدىڭ قاۋىمعا قۇدايعا دا قۇسقا دا كەرەگى جوق ءبىر انسامبل «ەيا»-نى قوسىپ قويدى. (بۇل ءانسامبلدىڭ اتى سىزگە قىزىق بولىپ كورىنىپ تۇرعان شىعار، بىراق بۇندا ەشقانداي سىر جوق، ءبىر توپاس توقىلداق قاتە جىبەرگەن. قايتەسىز ەندى، ونىڭ قاسىندا بىزدەن گورى الدەقايدا دامىعان دەگەن ادامداردىڭ ءوزىنىڭ ەسىمدەرىندە قاتە دەگەن ءورىپ ءجۇر; ادامدى قويشى، ەلىنىڭ اعىلشىنشا اتىندا قاتە بار مەملەكەت تە بار، بۇل تاقىرىپقا وسىدان سوڭ تەرەڭدەمەيىك). اقيقاتىن ايتىڭىزشى، رەپەرتۋارىندا «قۇستار دوستىعى» دەگەن جالعىز ءان بار 350-گە جۋىق مۇشەدەن تۇراتىن انسامبل «ەيا»-نىڭ شىعىنىن  قاشانعا كوتەرە بەرەمىز. بىزدەر بۇلبۇلدار بۇل ءاندى ەشقانداي انسامبل «ەيا»سىز-اق تا تاماشا ايتا الامىز. جانە وسى ءاندى قويماستان شىرقاي بەرەتىندەي قاجەتتىلىك تە كورىپ تۇرعان جوقپىن; ;جوقتان وزگە دە تالاساتىن قارعالار ويتسە ءبىر ءجون. حوش دەلىك، انسامبل «ەيا» اسىن ءىشىپ، ءانىن ايتىپ تىنىش جۇرسە ەكەن. جوق، ولار بيلىككە دە ارالاسىپ جاتىر، بىرنەشە جىل بۇرىن انسامبل «ەيا» جاڭا مارتەبەگە يە بولىپ، ورمانىمىزدىڭ باس زاڭ شىعارۋشى ورگانىنا ءوز وكىلدەرىن سايلاۋ قۇقىعىن يەلەندى. انسامبل «ەيا»-نىڭ جارعىسىندا «ورمانسۇيگىشتىكتى قالىپتاستىرۋ، قۇسارالىق قاتىناستاردى قاداعالاۋ نەگىزىندە قۇسارالىق تاتۋلىق پەن كەلىسىمدى نىعايتۋ» دەپ كورسەتىلگەن. قۇدايعا شۇكىر، انسامبل «ەيا» بولماعان كەزدە دە ورمانسۇيگىشتىگىمىز كەمىپ ايدالاعا كەتىپ قالعان جوقپىز، قۇسارالىق ارازدىق ءورشىپ ءبىر-ءبىرىمىزدىڭ كوزىمىزدى شوقۋ دا بولعان ەمەس. جانە ورمان ورتالىعىنداعى ءبىر باس انسامبل «ەيا»-مەن شەكتەلسەك ءبىر ءسىرا، شوق توعايلاردا دا كىشى انسامبل «ەيا»-لاردى قاپتاتىپ قويۋ ءتىپتى اقىلعا سىيمايدى. انسامبل «ەيا» تۋرالى ءبارى تەك مەن سياقتى ويلايدى، - دەۋ وتىرىك بولار ەدى. مىسالى، «توعايداعى تىنىشتىق جىلدار بويى بەرى جۇمىس ىستەپ تۇرعان انسامبل «ەيا» ارقاسى»،- دەگەن دە پىكىر دە بار. دەگەنمەن، قاراپايىم قۇستار اراسىندا  «انسامبل «ەيا» - قولدان جاسالىنعان ويىنشىق دۇنيە»، «قۇسارالىق جاقسىلىق پەن تىنىشتىقتى انسامبل «ەيا» جاسادى دەۋ بۇلبۇلعا توپىراق شاشۋمەن بىردەي. بۇل تىنىشتىق - بۇلبۇلدىڭ كەڭدىگىنىڭ ارقاسى» دەگەن پىكىرلەر باسىم دەپ سانايمىن.
جوعارى مارتەبەلى تۇيەتاۋىق! وسى جوعارىدا باياندالعانداردىڭ نەگىزىندە «انسامبل «ەيا»نىڭ قوعامدىق ينستيتۋت رەتىندە قاجەتتىلىگى، جالپى، ونىڭ قىزمەتىنىڭ، سونىڭ ىشىندە ونىڭ ورمان بيۋدجەتىنەن قارجىلاندىرۋىلۋىنىڭ زاڭدىلىعى تۋرالى باعا بەرۋىڭىزدى سۇرايمىن.

قاتارداعى بۇلبۇل نۇر
مۇستاجاپوۆ
"اباي-اقپارات"