ەلوردانى گازداندىرۋ ءۇش كەزەڭمەن جۇزەگە اسادى. بيىلعى جىلىتۋ ماۋسىمىندا گازعا كوشۋ مۇمكىندىگىنە تەمىرجول، كوكتال-2 تۇرعىن الاپتارىنىڭ تۇرعىندارى، اگروقالاشىقتىڭ ءبىر بولىگى يە بولدى. بۇل تۋرالى استانا اكىمى التاي كولگىنوۆ حالىققا ەسەپ بەرۋ كەزدەسۋىندە ايتتى.

«گاز تارتۋ بويىنشا اۋقىمدى جۇمىستار اتقارىلدى  - 300 كم گاز تاراتۋ جەلىسى سالىندى. بىرقاتار تۇرعىن الاپ تۇرعىندارى بيىلعى جىلىتۋ ماۋسىمىندا گازعا كوشۋ مۇمكىندىگىن الدى. بۇعان قوسا، قازىر كوكتال-1, ءوندىرىس، وڭتۇستىك-شىعىس تۇرعىن الاپتارىندا قۇرىلىس-مونتاج جۇمىستارى ءجۇرىپ جاتىر.

كومىردەن گازعا كوشۋدىڭ ارتىقشىلىعى كوپ: تۇرعىندارعا كومىر ساتىپ الۋ، ساقتاۋ، ونىڭ ساپاسى، كۇنىنە بىرنەشە رەت پەش جاعۋ جايلى ويلاۋدىڭ قاجەتى بولمايدى. قالا ەكولوگياسى جاقسارادى، بۇل ارينە، قالالىقتارعا وڭ اسەر  ەتەدى. گازداندىرۋ زياندى قالدىقتاردىڭ اتموسفەراعا تاراۋىن بىرنەشە ەسە ازايتۋعا مۇمكىندىك بەرەدى. بۇعان قوسا، جەو-1 جانە جەو-2  قازاندىقتارىنىڭ ءبىر بولىگى گازعا اۋىستى»، - دەدى نۇر-سۇلتان قالاسىنىڭ  اكىمى التاي كولگىنوۆ.

جوبانىڭ الەۋمەتتىك ماڭىزىن ەسكەرە وتىرىپ، اكىمدىك مونتاج جۇمىستارىنىڭ قۇنىن تومەندەتۋ بويىنشا  جەكە ۇيىمدارمەن كەلىسسوزدەر جۇرگىزدى. وسىلايشا، ءۇي ىشىنە گاز تارتۋ باعاسى ورتاشا العاندا 30%-عا ارزاندادى (گاز قۇرىلعىسى مەن قۇرامداستارىنىڭ قۇنى كىرمەيدى). ەسەپتەگىشتەردى مەملەكەت قالالىقتارعا تەگىن بەرەدى.

ەسكە سالساق، تۇرعىن الاپتارىنا گاز تاراتۋ جەلىلەرىن سالۋ، ونىڭ ىشىندە ءۇي  ماڭىنداعى كۆارتالىشىلىك جەلىلەردى سالۋمەن نۇر-سۇلتان اكىمدىگى اينالىسادى. ال ءۇيدىڭ ىشىنە جۇرگىزۋمەن جەكە ۇيىمدار اينالىسادى. تۇرعىندار كەز كەلگەن مامانداندىرىلعان كومپانيانى تاڭداۋعا قۇقىلى.

گازبەن قامتۋدىڭ ىشكى جەلىلەرى تارتىلعان تۇرعىن الاپتارىنىڭ تۇرعىندارى گازعا قوسىلۋ ءۇشىن «قازترانسگاز ايماق» اق-قا (رەسپۋبليكا داڭعىلى، 24, «پاراسات» بو) بارا الادى. بۇل ۇيىم گازبەن قامتۋدىڭ ىشكى جەلىلەرىنىڭ قاۋىپسىزدىگىن تەكسەرۋمەن جانە قوسۋمەن اينالىسادى، سونداي-اق ونىڭ ودان ارعى پايدالانىلۋىنا جاۋاپ بەرەدى.

قالانى گازداندىرۋ - ەل باسشىلىعىنىڭ باقىلاۋىنداعى ماسەلە.

Abai.kz