رەسەي مەن قازاقستان اراسىندا شەكاراعا قاتىستى ەشقانداي شاعىم جوق. بۇل تۋرالى رەسەيدىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين «حابار 24» تەلەارناسىنا بەرگەن سۇحباتىندا ايتتى.

ول 2020 جىلى رەسەي دەپۋتاتتارىنىڭ قازاق جەرىنە قاتىستى داۋلى مالىمدەمەسى تۋرالى سۇراققا پىكىر ءبىلدىرىپ، دەپۋتاتتاردىڭ ءسوزىن ورىنسىز دەپ باعالادى.

«مەن بۇل مالىمدەمەلەردى كۇردەلەندىرگىم كەلمەيدى. مەنىڭ ويىمشا، بۇل وعان تۇرمايدى دا. بىراق مەن بۇل ورىنسىز مالىمدەمەلەر رەسەيدىڭ رەسمي ۇستانىمىنا قايشى كەلەتىنىن اتاپ وتكىم كەلەدى. ءبىزدىڭ ەلدەرىمىزدىڭ شەكاراسى كەلىسىمشارتپەن بەكىتىلگەن. ول سونىمەن بىرگە شەكتەلگەن. رەسەي مەن قازاقستاننىڭ كۇن تارتىبىندە شەكاراعا قاتىستى شاعىمدار مۇلدەم جوق. بۇل تالقىلانبايتىن ماسەلە»، - دەدى بوروداۆكين.

ونىڭ ايتۋىنشا، رەسەي قازاقستاننىڭ ەگەمەندىگىن، تاۋەلسىزدىگى مەن اۋماقتىق تۇتاستىعىن قۇرمەتتەيدى.

سونىمەن قاتار ەلشى اسكەري ىنتىماقتاستىق تۋرالى كەلىسىمگە سايكەس، قازاقستان مەن رەسەي ءبىر-ءبىرىنىڭ اۋماقتىق تۇتاستىعىن ءوزارا قورعاۋعا مىندەتتى ەكەنىن اتاپ ءوتتى.

ايتا كەتەيىك، بۇعان دەيىن «پەرۆىي كانال» تەلەارناسىنداعى «بولشايا يگرا» باعدارلاماسىندا رەسەي مەملەكەتتىك دۋماسىنىڭ دەپۋتاتى ۆياچەسلاۆ نيكونوۆ «قازاقستان تەرريتورياسى – رەسەي مەن سوۆەت وداعىنىڭ بەرگەن سىيلىعى» دەگەن بولاتىن.

Abai.kz