كەڭەس اسكەرىنىڭ اۋعانستان اۋماعىنان شىعارىلعانىنا 32 جىل تولۋىنا وراي ەلورداداعى ينتەرناتسيوناليست-جاۋىنگەرلەرگە ارنالعان ەسكەرتكىشكە گۇل شوعىن قويۋ ءراسىمى ءوتتى. بۇل تۋرالى قالا اكىمدىگىنىڭ رەسمي سايتى ەلوردا ينفوعا سىلتەمە جاساپ حابارلايدى.

شاراعا نۇر-سۇلتان قالاسى اكىمىنىڭ ورىنباسارى باقتيار ماكەن مەن قازاقستاننىڭ تۇڭعىش عارىشكەرى توقتار اۋباكىروۆ، اسكەري قايراتكەر، گەنەرال-لەيتەنانت باقىتجان ەرتاەۆ، اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ توراعاسى باقىتبەك سماعۇل جانە باسقا دا اۋعان سوعىسىنىڭ ارداگەرلەرى مەن سوعىستا وپات بولعان جاۋىنگەرلەردىڭ اتا-انالارى، اسكەريلەر، جاس ساربازدىقتار، قالا تۇرعىندارى قاتىستى.

«بۇگىن ءبىز اۋعان سوعىسىندا وپات بولعان جاۋىنگەرلەرىمىز بەن ارداگەرلەرىمىزدىڭ ەرلىگىن ەسكە الۋعا جينالىپ تۇرمىز. سول ءبىر قاتىگەز سوعىستىڭ اياقتالعانىنا بيىل 32 جىل تولىپ وتىر. بۇل – ءبىزدىڭ تاريحىمىزداعى ەلەۋلى وقيعالاردىڭ ءبىرى. قانشاما جاۋىنگەر بۇگىندە ورتامىزدا جوق. الايدا ولاردىڭ جاساعان ەرلىگى ەشقاشان ۇمىتىلمايدى»، – دەدى باقتيار ماكەن.

سونىمەن قاتار قالا اكىمىنىڭ ورىنباسارى جاستارعا پاتريوتتىق تاربيە بەرۋدە ەڭبەك ەتىپ جۇرگەن ينتەرناتسيوناليست جاۋىنگەرلەرگە ريزاشىلىعىن ءبىلدىرىپ، دەندەرىنە ساۋلىق تىلەدى.

ءوز كەزەگىندە باقىتجان ەرتاەۆ بۇگىنگى جاستار تاريحپەن ماقتانۋى كەرەكتىگىن، ەل ءۇشىن ەرلىك كورسەتكەن، جانىن قيعان جاۋىنگەرلەردى ءاردايىم ەستە ساقتاۋ كەرەكتىگىن اتاپ ءوتتى.

ال توقتار اۋباكىروۆ اۋعان سوعىسىنىڭ ارداگەرلەرىنە زور ريزاشىلىعىن ءبىلدىردى.

«اۋعان سوعىسىنا قاتىسقان ازاماتتار – ەرەكشە ازاماتتار. سىزدەرگە قۇرمەتىم زور. جاساعان ەرلىكتەرىڭىز ءۇشىن سىزدەر قانداي قۇرمەتكە دە لايىقسىزدار. سىزدەر جاستارعا ۇلگىسىزدەر»، – دەدى ت.اۋباكىروۆ.

باقىتبەك سماعۇلدىڭ ايتۋىنشا، بيىلعى كوكتەمدە اۋعان سوعىسى جاۋىنگەرلەرىنە ارنالعان ەسكەرتكىشكە جوندەۋ جۇرگىزىلەدى.

«قالا باسشىلىعىنىڭ قولداۋىمەن وسى كوكتەمدە مىنا ەسكەرتكىشكە جوندەۋ جۇرگىزىلەتىن بولدى. كوپتەگەن قازاق باۋىرلارىمىزدىڭ ەسىمدەرى تاقتايشاعا ەنگىزىلەدى. بۇل – بىزگە دەگەن قۇرمەت. سونداي-اق ارداگەرلەرگە تەمىرجول بيلەتتەرى 30 پايىزدىق جەڭىلدىكپەن ساتىلاتىن بولدى. سونىمەن قاتار ەكى جىلدان بەرى بۇل كۇن رەسمي مەرەكە بولىپ سانالادى. بۇل دا اۋعان سوعىسىنىڭ ارداگەرلەرى مەن سولاقاي ساياساتتىڭ قۇربانىنا اينالىپ، تاۋەلسىزدىك تاڭىن جاقىنداتۋ جولىندا وپات بولعان جاۋىنگەرلەر ءۇشىن عانا ەمەس، بولاشاق جاستار مەن قارۋلى كۇشتەردىڭ انتىنا ادال بولۋعا ۇندەيتىن مەرەكە»، – دەدى ول.

جينالعاندار ەسكەرتكىش الدىنا گۇل شوقتارىن قويىپ، ەرلىكپەن وپات بولعان جاۋىنگەرلەردى ءبىر مينۋتتىق ۇنسىزدىكپەن ەسكە الدى.

وسىناۋ كۇندى جانە قارۋلاستارىن ەسكە الۋعا كەلگەن اۋعان سوعىسى ارداگەرلەرىنىڭ ءبىرى – مۇحتار سۇلتانمۇراتوۆ. ول سوعىسقا 18 جاسىندا اتتانعان ەكەن.

«تۇركىمەنستاندا وقۋ-جاتتىعۋدا بولىپ، ودان كەيىن سوعىس الاڭىنا باردىق. قارسى جاقتان اتىلعان وق باسىمدى جاناپ ءوتىپ، جاراقات الدىم. سودان امان-ەسەن ەلگە ورالدىق. بىراق ەشكىم دە، ەشتەڭە دە ۇمىتىلمايدى. ەندى سوعىس بولماسىن! ەلىمىز امان بولسىن! جاستارىمىزعا پاتريوتتىق تاربيە بەرۋگە اتسالىسامىز»، – دەدى م.سۇلتانمۇراتوۆ ەلوردا ينفو تىلشىسىنە بەرگەن سۇحباتىندا.

Abai.kz