قازاقستاننان ءۇش توقسان ىشىندە 15 جاستان اسقان 11,4 مىڭ مامان كەتكەن. بۇل تۋرالى Tengrinews.kz مالىمدەدى.

پاندەمياعا بايلانىستى شەكارالاردىڭ جابىلعانىن ەسكەرسەك، بۇل وتكەن جىلدىڭ سايكەس كەزەڭىمەن سالىستىرعاندا 33,8 پايىزعا از. بۇل رەتتە قازاقستاننان كەتكەن مامانداردىڭ ۇلەسى 54,3 پايىزعا جەتتى، بىلتىر 50,6 پايىز بولعان.

ەل وڭىرلەرىنىڭ ىشىندە ەڭ كوپ مامان قاراعاندى وبلىسىنان كەتكەن: 1,7 مىڭنان استادى. تىزىمدە شىعىس قازاقستان (1,6 مىڭ مامان كەتكەن), قوستاناي (1,4 مىڭ ادام) جانە پاۆلودار (1,4 مىڭ ادام) وبلىستارى دا بار. ەڭ از كەتكەندەر قىزىلوردا جانە تۇركىستان وبلىستارىندا: بارلىعى 23 جانە 29 ادام.

قازاقستاننان شىققان ادامداردىڭ جارتىسىنان استامىنىڭ ماماندىعى تەحنيكالىق (3,3 مىڭ ادام), ەكونوميكالىق (1,7 مىڭ ادام) نەمەسە پەداگوگيكالىق (مىڭ ادام) سالادان بولعان.

سونداي-اق، ەلدەن 561 دارىگەر، 387 زاڭگەر، 280 ساۋلەتشى مەن قۇرىلىسشى، اۋىل شارۋاشىلىعى سالاسىنداعى 155 مامان كەتتى. قالعان ماماندىقتاردان ءتورت مىڭداي ادام بار.

قازاقستانعا 2020 جىلدىڭ قاڭتار-قىركۇيەك ايلارىندا 3,5 مىڭنان كەم مامان كەلدى. ياعني، جاڭادان كەلگەندەر سانى كەتكەن كادرلاردىڭ ۇشتەن ءبىرىن دە جاپپادى.

قازاقستانعا كەلگەن ەكونوميستەردىڭ سانى ەلدەن كەتكەندەردىڭ 18,1 پايىزىن عانا قۇرايدى: 1714 جانە 311. تەحنيكالىق ماماندار اراسىندا كەلگەندەر مەن كەتكەندەردىڭ اراقاتىناسى 19,3 پايىز (3331 جانە 643), زاڭگەرلەر اراسىندا - 21,2 پايىز (387 جانە 82), دارىگەرلەر اراسىندا - ۇشتەن ءبىرى (561 جانە 187).

ال اۋىل شارۋاشىلىعى سالاسىنا جاڭا 68 مامان كەلىپ، 155 ادام كەتتى.

Abai.kz