دەپۋتات مىرزا, 6 ميلليون قازاقتىڭ 4 ميلليونى مەملەكەت مالىن تارتىپ الىپ، قولدان ۇيىمداستىرعان اشارشىلىقتان ءولمەسە، نەدەن ءولدءى, ايتىڭىزشى!?

ۋكراينا «گولودومور - جوسپارلانىپ جاسالعان ساياسي شارا» دەپ، اشتان ولگەن 3 ملن.ادامعا ومىرگە كەلە الماي قالعانداردى قوسا ەسەپتەپ، «گولودومور قۇربانى - 8 ملن.ادام» دەپ ساناپ، كسرو-نىڭ مۇراگەرى رەسەيدەن 10 ملرد.دوللار قۇن تالاپ ەتىپ وتىر. ۋكراين ۇلتىنىڭ 10 پايىزى ولسە، قازاق ۇلتىنىڭ 70 پايىزى ءولدى! تاريحشى رەتىندە بىلۋگە ءتيىسسىز - بەيبىت زاماندا مەملەكەتتىڭ جوسپارلى ساياساتىنىڭ سالدارىنان ءوزىنىڭ وسىنشاما كوپ بولىگىن جوعالتقان بىزدەن باسقا ءبىر دە ءبىر ۇلت جوق. ءسىز بولساڭىز «ساياسيلاندىرۋعا بولمايدى» دەيسىز...

كەڭەس وكىمەتىنىڭ قۇلاعانىنا 30 جىل، ال، ءبىزدىڭ بيلىك قۇرباندار سانىن 2 ملن.ادام دەگەننەن اسىرار ەمەس. الەمنىڭ 23 ەلىندە «گولودومور - ۋكراين حالقىنا جاسالعان گەنوتسيد» دەپ رەسمي مويىندالىپ وتىر. ۋكراينا گولودومور جايلى 2006 جىلى ارنايى زاڭ قابىلدادى. ءسىز ايتقانداي گيتلەر «ەۆرەيدى، سلاۆيانداردى قىرىڭدار» دەپ تاپسىرما بەرسە، زۇلىمدىعىن اشىق ىستەسە، ستالين ونداي تاپسىرما بەرمەدى، زۇلىمدىعىن جاريالاماي ىستەدى، بىراق، ودان ناتيجە وزگەردى مە؟ جانە گولوششەكيننىڭ قازاقستاندا «كىشى وكتيابر ورناتۋ كەرەك» دەگەن ۇسىنىسىن قولداۋى تاپسىرما ەمەس پە؟

«بۇۇ «گەنوتسيد» دەپ ءبىر ۇلتتىڭ باسقا ۇلتتى قاساقانا قىرۋىن عانا ەسەپتەيدى»، دەپسىز. زۇلىمدىق اتاۋلىنىڭ 100 پايىزعا جۋىعى جاسىرىن تۇردە، كوبىنە بۇركەمەلەنىپ، ءتىپتى جالعان يگى نيەتتى جامىلىپ جاسالمايتىن با ەدى؟..

ەكىنشىدەن، الەمدى بەيرەسمي تۇردە بيلەپ وتىرعان اعىلشىن-ساكسون بيلىگى باردا، بۇۇ-نى ءىس جۇزىندە «اسىراپ وتىرعان» اقش تۇرعاندا بۇۇ-نىڭ باسقاشا سويلەۋى مۇمكىن دە ەمەس، ويتكەنى ول كەزدە ۇندىستەردى باعىندىرا الماعان اعىلشىنداردىڭ بيزونداردى قىرىپ تاستاۋىنىڭ سالدارىنان ۇندىستەردىڭ قىرىلۋىن اعىلشىندار تاراپىنان جاسالعان گەنوتسيد ەكەنىن مويىنداۋىنا تۋرا كەلەدى.

نەگە ۋكراينا دەپۋتاتتارى سىزدەر سەكىلدى «اشارشىلىقتان قازاق تا قىرىلدى، رەسەيدەگى ورىس تا ءولدى، گولودومور – گەنوتسيد ەمەس»، دەمەيدى؟ تۇسىنسەڭىز ءسىزدىڭ مىندەتىڭىز: «سپيكەر مىرزا، ءسىز جاڭىلىسپاڭىز، ءبىز كەرىسىنشە اشارشىلىق - قازاق ۇلتىنا جاسالعان گەنوتسيد دەگەن زاڭ قابىلداۋعا ءتيىسپىز»، دەپ باستاما كوتەرۋ ەدى عوي ؟ ال، ءسىز بولساڭىز «31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىندە مەملەكەتتىك دەڭگەيىندە «1 مينۋتتىق ازا تۇتۋ» شاراسىن جۇزەگە اسىرۋىمىز كەرەكپىز. ەل بولىپ قۇرمەت ەتۋگە مىندەتتىمىز»، دەيسىز. اشارشىلىققا ارناپ ەڭ قۇرىعاندا بولەك كۇن بەلگىلەيىك دەپ جازۋعا دا شاماڭىز جەتپەپتى! «ءبىز رەسەيگە نەگە جالتاقتايمىز؟ ءبىز بولەك مەملەكەتپىز»، دەيسىز، ال، ءىسىڭىز جالتاقتىقتىڭ ۇلگىسى ەمەس پە؟

مۇقا! مەنەن 4 جاس كىشى ەكەنسىز. ءسىزدىڭ بۇل مالىمدەمەڭىزدى سىننىڭ استىندا قالعان م.اشىمباەۆقا قولداۋ كورسەتۋ، ال، تۇپتەپ كەلگەندە، ماۋسىم ايىندا زەينەتكەرلىككە كەتپەي، سەناتتاعى قىزمەتىڭىزدى جالعاستىرۋعا جاسالعان قادامنىڭ ءبىرى دەپ بولجامداۋعا ءماجبۇرمىن. ويتكەنى، بىزدەگى ساياسي ءومىر وسىنداي ەسەپ-قيساپتان تۇراتىنىنا بيلىك ەلدىڭ ەتىن ۇيرەتىپ قويعان. ءوز باسىم ءسىزدى تانىماسام دا، تىرنەكتەپ جيعان ابىرويىڭىزدى شەلەكتەپ توگىپ الماعانىڭىزدى قالايمىن. ۋاقتىلى كەلۋ ابزال دەسەك، ۋاقتىلى كەتۋ ودان ون ەسە ابزال دۇنيە ەكەنى بەلگىلى عوي...

قۇرمەتپەن, ءومءىرزاق اقجءىگءىت

Abai.kz