ەلوردادا ج.تاشەنوۆ جانە اممان كوشەلەرىنىڭ قيىلىسىندا جامبىل جاباەۆتىڭ ەسكەرتكىشىنە گۇل شوعىن قويۋ ءراسىمى ءوتتى. وعان قازاقستاننىڭ مەملەكەتتىك حاتشىسى قاتىستى. 

شاراعا قر مەملەكەتتىك حاتشىسى قىرىمبەك كوشەرباەۆ، مادەنيەت جانە سپورت ءمينيسترى اقتوتى رايىمقۇلوۆا، نۇر-سۇلتان قالاسىنىڭ اكىمى التاي كولگىنوۆ، اقىن-جازۋشىلار، جامبىلتانۋشىلار جانە قوعام قايراتكەرلەرى قاتىستى. سونىمەن بىرگە، جامبىل وبلىسىنان ارنايى دەلەگاتسيا كەلدى. اقىننىڭ اتى بەرىلگەن وبلىستا دا مەرەيتويعا ارنالعان ۇلكەن كەشەندى جوسپار بار.

«بۇگىنگى شارانىڭ جاستارعا ۇلكەن تاربيەلىك ءمانى بار. ادەتتە جامبىل جاباەۆ كىم دەگەندە، اقىن، جىراۋ، ايتىسكەر دەپ ايتامىز. ونىمەن شەكتەلۋگە بولمايدى. مىسالى بىلتىر اباي جىلى بولعاندا مەملەكەت باسشىسى «اباي جانە ءححى عاسىر» ماقالاسىندا ابايدى اقىن رەتىندە عانا ەمەس، ويشىل، فيلوسوف، عالىم رەتىندە كورسەتۋ كەرەگىن ايتتى. جامبىل جاباەۆتى دا جاي عانا ايتىسكەر ەمەس، ۇلكەن قايراتكەر رەتىندە كورسەتۋ ماڭىزدى. مىسالى جامبىل جاباەۆ – قازاق اۋىز ادەبيتەىنىڭ نەگىزىن قالاۋشى، سول سالادا ۇلكەن ورنى بار. ول قازاق ايتىسىنىڭ الەۋمەتتىك-ساياسي مانىنە باسا نازار اۋدارعان تۇلعا»، - دەدى جامبىل وبلىسى ءماسليحاتىنىڭ حاتشىسى ماحمەتقالي سارىبەكوۆ تىلشىلەرگە بەرگەن سۇحباتىندا.

ايتا كەتەيىك، كەشە جامبىل جاباەۆتىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيانىڭ العاشقى وتىرىسى ءوتتى. مەرەيتويلىق جىل ىشىندە رەسپۋبليكا بويىنشا 500-گە جۋىق الەۋمەتتىك، يميدجدىك، عىلىمي، تانىمدىق ءىس-شارالار وتكىزىلەدى. بۇدان بولەك، اقىن ومىرىنەن دەرەكتى فيلم ءتۇسىرۋ، ولەڭدەرىنىڭ جاڭا جيناقتارىن شىعارۋ، ايتىستار مەن ادەبي كونكۋرستاردى، كىتاپ كورمەلەرىن ۇيىمداستىرۋ، مەرەيتويلىق مونەتا، پوشتا ماركاسىن ازىرلەۋ جانە باسقا دا شارالار وتكىزۋ كوزدەلىپ وتىر.

Abai.kz