جۇزدەن اسا ۇلتى پەن ۇلىستىڭ باسىن بىرىكتىرىپ وتىرعان قازاقستان حالقى اسسامبلەياسى بۇگىن قازاقستان تاۋەلسىزدىگىنىڭ 30 جىلدىعى مەن «العىس» ايتۋ كۇنىنىڭ 5 جىلدىعىنا وراي دوڭگەلەك ۇستەل وتكىزدى.

دوڭگەلەك ۇستەلگە قر مەملەكەتتىك حاتشىسى قىرىمبەك كوشەرباەۆ ارنايى قاتىستى. سونىمەن قاتار، اتالعان شاراعا قر اقپارات جانە قوعامدىق دامۋ ءمينيسترى ايدا بالاەۆا، اسسامبلەيا توراعاسىنىڭ ورىنباسارلارى م.بەكباەۆا مەن ز.كۋزيەۆ، اسسامبلەيا اتىنان سايلانعان ءماجىلىس دەپۋتاتتارى، الماتى، نۇر-سۇلتان، شىمكەنت قالالارى مەن وزگە دە ءوڭىر باسشىلارىنىڭ ورىنباسارلارى، قحا-عا مۇشە ەتنو-مادەني بىرلەستىكتەر وكىلدەرى ت.ب. قاتىسقان.

ءىس-شارانى مەملەكەتتىك حاتشى قىرىمبەك كوشەرباەۆ اشتى. ول ءوز سوزىندە بيىلعى جىلعى قازاقستان تاۋەلسىزدىگىنىڭ 30 جىلدىعى مەن ەلباسى نۇرسۇلتان نازارباەۆتىڭ باستاماسىمەن اتالىپ كەلە جاتقان «العىس ايتۋ» كۇنىنىڭ 5 جىلدىعىنىڭ ءمان-ماڭىزىنا توقتالدى.

«تاۋەلسىز قازاقستاننىڭ مەملەكەت بولىپ قۇرىلۋى مەن دامۋىنىڭ باستاۋىندا بولعان ازاماتتارعا ايرىقشا العىس ايتۋىمىز كەرەك»، - دەپ ءسوز باستاعان مەملەكەتتىك حاتشى: «ەڭ اۋەلى، سانداعان عاسىر بويى ازاتتىق پەن ەگەمەندىك اڭساعان اتا-بابالارىمىزدىڭ وسى ارمانىن جۇزەگە اسىرعانى ءۇشىن ەلباسى نۇرسۇلتان نازارباەۆقا ەرەكشە العىسىمىزدى ءبىلدىرۋىمىز كەرەك»، - دەدى.

سونداي-اق، ءوز سوزىندە قىرىمبەك ەلەۋۇلى بۇگىنگىدەي زاماناۋي سىن-قاتەرلەرگە بەيىمدەلگەن ۇلتتىق، مەملەكەتتىك بىرەگەيلىكتى قالىپتاستىرۋدىڭ قازىرگى جاعدايىندا پرەزيدەنتى قاسىم-جومارت توقاەۆتىڭ ساياسي ءھام ەكونوميكالىق رەفورمالارىنىڭ ماڭىزى ەرەكشە ەكەنىن ايتتى.

«قازاقستان قوعامىن شىن مانىندە رۋحاني جاڭعىرتۋدىڭ ماڭىزدى باعىتى - ول ساياسي قۋعىن-سۇرگىن قۇرباندارىن تولىق اقتاۋ جونىندەگى اۋقىمدى جۇمىستار. توتاليتاريزمدىك جۇيە تەپكىسىنەن زارداپ شەككەن وزگە حالىقتار ءۇشىن قازاق جەرى باسپاناعا اينالدى. تاريحي ادىلەتتىلىكتى قالپىنا كەلتىرۋدىڭ العاشقى قادامى ول - ادىلەتسىز سوتتالعانداردىڭ ادال ەسىمىن اقتاۋ. مىنە، ءبىز ۇرپاقتاردىڭ جادىندا وسىنى قالدىرۋىمىز كەرەك»، - دەدى كوشەرباەۆ.

مەملەكەتتىك حاتشى ءوز سوزىندە تاريحي ادىلەتتىلىكتى قايتا قالپىنا كەلتىرۋ ءىسى – اشارشىلىق پەن «الاش» قوزعالىسىنىڭ جەتەكشىلەرىنىڭ تاعدىرىنا جانە حالقىمىزدىڭ تاريحىن بۇرمالاۋ ارەكەتتەرىنە دە قاتىستى ەكەنىن ايتتى.

دوڭگەلەك ۇستەل بارىسىندا، «تۇڭعىش پرەزيدەنت جولىمەن – بەيبىتشىلىك پەن كەلىسىمگە 30 جىل» حالىق ەكسپەديتسياسى» قحا جوباسىنىڭ جانە «قايىرىمدىلىق كەرۋەنى: 30 يگى ءىس» قايىرىمدىلىق مارافونىنىڭ تۇساۋى كەسىلىپ، جيىنعا قاتىسۋشى ەتنو-مادەني بىرلەستىك وكىلدەرى، دەپۋتاتتار مەن مينيسترلىك جەتەكشىلەرى دە ءسوز الدى.

Abai.kz