ءماجىلىس دەپۋتاتتارى زارينا كاماسوۆا جانە عالىمجان ەلەۋوۆ بۇگىن كوروناۆيرۋس ينفەكتسياسىنا قارسى ەكپە جاسادى.

ءماجىلىس دەپۋتاتتارى ۆاكتسينانىڭ باستاپقى كەزەڭىنەن وزدەرىنىڭ مەديتسينالىق ارىپتەستەرىمەن قاتار العاشقىلاردىڭ ءبىرى بولىپ ءوتتى. ولار VII شاقىرىلىمداعى ءماجىلىس دەپۋتاتتارى بولىپ سايلانعانعا دەيىن ىندەتپەن كۇرەس شەڭبەرىندە ايماقتاردا مەديتسينالىق مەكەمەلەردە جۇمىس ىستەپ، حالىققا قاجەتتى كومەك كورسەتتى.

دەپۋتاتتار جاپپاي ۆاكتسيناتسيالاۋ ۇجىمدىق يممۋنيتەتتى تەز قالىپتاستىرۋعا جانە قازاقستاندىقتاردىڭ ءومىرىن قالىپتى جاعدايعا كەلتىرۋگە مۇمكىندىك بەرەتىنىنە سەنىم ءبىلدىردى.

- دارىگەر رەتىندە مەن قازىر جاپپاي ۆاكتسيناتسيالاۋ عانا كوروناۆيرۋستىڭ تارالۋىنا قارسى تۇرا الاتىندىعىن جاقسى تۇسىنەمىن. ارينە، بۇل ءار ادامنىڭ ەركى. مەن ناقتى شەشىم قابىلدادىم: ەكپە جاساتامىن. ويتكەنى، ول مەنىڭ دە،  تۋىستارىم مەن دوستارىمنىڭ دا دەنساۋلىعى وسىعان بايلانىستى، - دەدى ءماجىلىس دەپۋتاتى عالىمجان ەلەۋوۆ.

دەپۋتاتتار ەكپە ەنگىزىلگەننەن كەيىن دەنساۋلىقتارىنىڭ بىرقالىپتى ەكەندىكتەرىن ايتتى.

سونىمەن قاتار، جۋرناليستەر ءماجىلىستىڭ باسقا دەپۋتاتتارىن،  ونىڭ ىشىندە ءماجىلىس توراعاسى نۇرلان نىعماتۋليننىڭ ەكپە سالدىرۋ جوسپارى تۋرالى سۇرادى.

ءماجىلىستىڭ ءباسپاسوز قىزمەتى تۇسىندىرگەندەي، قالعان دەپۋتاتتاردى ۆاكتسيناتسيالاۋ ناۋرىز ايىندا دەنساۋلىق ساقتاۋ مينيسترلىگىنىڭ كەستەسىنە سايكەس جۇرگىزىلەدى. ال، ءماجىلىس توراعاسىنا قاتىستى ايتار بولساق، نۇرلان نىعماتۋلين وسىعان دەيىن كوروناۆيرۋس ينفەكتسياسىمەن اۋىرعاندىقتان، جەتكىلىكتى انتيدەنەلەر بار. وسىعان سايكەس، ەكپە سالدىرۋدى قاجەت ەتەتىن مەديتسينالىق كورسەتكىشتەرى جوق.

Abai.kz