17 ناۋرىزدا اقش پرەزيدەنتى دجو بايدەن ABC ارناسىنا سۇحبات بەردى. سۇحبات بارىسىندا رەسەي مەن اقش اراسىنداعى قارىم-قاتىناس ماسەلەسى دە ءسوز بولدى. اقش باسشىسى قازىرگى جاعدايدا ەكى ەل اراسىندا قاراما-قايشىلىقتىڭ وتە كوپ ەكەنىن جوققا شىعارمادى. 

ABC News ارناسىنىڭ ءتىلشىسى دجوردج ستەفانوپۋلوستىڭ رەسەيدىڭ اقش-تاعى سايلاۋعا قاتىسى جايلى سۇراققا بايدەن: «ءبىز ۇزاق سويلەستىك. مەن ونى ايتارلىقتاي جاقسى بىلەمىن. اڭگىمەنى بىلاي باستادىم: «مەن ءسىزدى بىلەمىن، سىزدە مەنى بىلەسىز. ەگەر مەن ءسىزدىڭ قاتىسىڭىز بار ەكەنىن بىلسەم (سايلاۋعا ارالاسۋ تۋرالى), وندا دايىن بولىڭىز»، دەدىم. ول بۇل ءۇشىن جاۋاپ بەرەدى»، - دەپ جاۋاپ قاتتى. الايدا جاۋاپتىڭ قانداي بولارىن اشىق ايتپادى.

ءجۋرناليستىڭ: «ياعني ءسىز ۆلاديمير ءپۋتيندى بىلەسىز. ءسىز ونى كىسى ءولتىرۋشى دەپ سانايسىز با؟» دەگەن سۇراعىنا بايدەن: «ممم، ءيا»، - دەپ جاۋاپ بەردى.

بۇل سوزدەر لەزدە جاھان باسىلىمدارىندا تارالىپ، حالىقارالىق ساياسي ارەنادا كەڭىنەن تالقىلانىپ جاتىر. رەسەي تاراپى بۇل مالىمدەمەنى وزىنە «اشىق شابۋىل»، دەپ باعالاۋدا.

رەسەي مەملەكەتتىك دۋماسىنىڭ دەپۋتاتى ارتۋر چيلينگاروۆ: «بايدەن - اۋرۋ ادام، ەسىنەن اۋىسقان. ساياساتكەر باسقا سوزدەردى تابار ەدى، ال مىناۋ ناعىز باسقا شىعۋ»، - دەپ ءوز ويىن ءبىلدىردى.

رەسەي فەدەراتسياسى كەڭەسىنىڭ ءبىرىنشى ۆيتسە-سپيكەرى اندرەي تۋرچاك: «بۇل اقش باسشىلىعىنىڭ شاراسىزدىقتان بىزگە جاساعان اگرەسسياسىنىڭ ءبىر ءتۇرى»، - دەسە، مەملەكەتتىك دۋما توراعاسى ۆياچەسلاۆ ۆولودين ءوزىنىڭ «تەلەگرامداعى» كانالىنا:  «بايدەن ءوز مالىمدەمەسى ارقىلى ءبىزدىڭ ازاماتتارىمىزعا ءتىل تيگىزدى. پۋتين ءبىزدىڭ پرەزيدەنتىمىز، وعان جاساعان شابۋىل بارىمىزگە جاسالعان شابۋىل»، - دەپ جازدى.

ەكى ەل اراسىنداعى جانجال ۋشىعىپ بارادى. رەسەي اقش-تاعى ەلشىسىن كەڭەسۋ ماقساتىندا ەلگە شاقىردى. اقش ءوز پوزيتسيالارىن قاتاڭ قورعايتىنىن جەتكىزدى. ال 18 ناۋرىز كۇنى رەسەيگە سالىناتىن سانكتسيالاردىڭ جيىنتىعى بەلگىلى بولماق.

ايتپاقشى، بايدەننىڭ مالىمدەمەسىمەن ءبىر ۋاقىتتا رەسەيدىڭ قورعانىس ءمينيسترى سەرگەي شويگۋ قازاقستاندىق باق-قا سۇحبات بەرىپ، رەسەي-اقش قارىم-قاتىناستارى مەن «تۇران ارمياسى» تۋرالى ويلارىن ايتقان. الەۋمەتتىك جەلىنىڭ قازاقستاندىق سەگمەنتى شويگۋدىڭ قازاقستاندىق باق-قا سۇحبات بەرۋىن بايدەن مالىمدەمەسىمەن بايلانىستىرىپ جاتىر.

Abai.kz