ءساۋىر ايىندا قازاقستاندا 1 ملن استام ازاماتتى COVID-19-عا قارسى ۆاكتسيناتسيالاۋ جوسپارلانۋدا. بۇل تۋرالى قر دەنساۋلىق ساقتاۋ مينيسترلىگى مالىمدەدى. 

رەسپۋبليكا بويىنشا حالىقتى كۆي-گە قارسى كەزەڭ-كەزەڭىمەن ۆاكتسيناتسيالاۋ جالعاسۋدا. بۇگىنگى كۇنى ەلىمىزدىڭ وڭىرلەرىنە 145 مىڭ دوزا ۆاكتسينا جەتكىزىلدى، ال اعىمداعى جىلعى ناۋرىزدىڭ سوڭىنا دەيىن قوسىمشا 150 مىڭ دوزانى جەتكىزۋ كۇتىلۋدە.

2021 جىلعى 19 ناۋرىزداعى جاعداي بويىنشا 100 مىڭنان استام ادام ەگىلدى، ونىڭ ىشىندە 63 مىڭنان استام مەديتسينا قىزمەتكەرى، 22 مىڭ پەداگوگ، كۇش قۇرىلىمدارىنىڭ 7 مىڭ قىزمەتكەرى، 8 مىڭ – ازاماتتاردىڭ باسقا ساناتتارى.

يممۋنداۋدان كەيىنگى قولايسىز كورىنىستەردىڭ اۋىر جاعدايلارى تىركەلگەن جوق.

بۇل رەتتە ەگىلگەن ادامداردىڭ 1%-ىندا كۇتىلەتىن رەاكتسيالار، مىسالى، دەنە تەمپەراتۋراسى كوتەرىلگەن تۇماۋعا ۇقساس جاي-كۇيلەر، جالپى السىزدىك، سونداي-اق ۆاكتسينا ەنگىزىلگەن جەردىڭ ءىسىنۋى جانە قىزارۋى تۇرىندەگى جەرگىلىكتى كورىنىستەر تىركەلۋدە.

حالىقتى ودان ءارى يممۋنداۋ ماقساتىندا اعىمداعى جىلدىڭ ءساۋىر ايىندا 1 ملن. استام ازامات ۆاكتسيناتسيالاناتىن بولادى.

وسىعان بايلانىستى سوزىلمالى اۋرۋلارى بار ديسپانسەرلىك ەسەپتە تۇرعان، 65 جاستان اسقان ادامداردى، سونداي-اق ازاماتتاردىڭ باسقا دا ساناتتارىن قوسا العاندا، ۆاكتسيناتسيالاۋعا جاتاتىن حالىق توپتارىن كەڭەيتۋ كوزدەلۋدە.
ۆاكتسيناتسيا كۆي-مەن كۇرەسۋدەگى ەڭ ءتيىمدى شارا بولىپ تابىلادى.

Abai.kz