وزبەكستان ەۋرازيالىق ەكونوميكالىق وداققا بەت الۋدا. وزبەكستان پارلامەنتى ەۋرازيالىق ەكونوميكالىق وداقپەن بىرلەسە اتقاراتىن شارالار بويىنشا جول كارتاسىن ماقۇلدادى.

بۇل تۋرالى  15 ناۋرىزدا سىرتقى ساۋدا جانە ينۆەستيتسيا ءمينيسترىنىڭ ءبىرىنشى ورىنباسارى لازيز كۋدراتوۆ مالىمدەدى.

جەلتوقسان ايىندا كۋبا مەن وزبەكستان ەاەو-دا باقىلاۋشى ستاتۋسىن العان ەدى. ستاتۋس بويىنشا ولار بارلىق وتىرىستارعا قاتىسا الادى، الايدا داۋىس بەرۋ قۇقىعى جوق. وزبەكستاننىڭ بۇل وداققا كىرۋى جايىندا تالاي مارتە ايتىلدى. گايدار فورۋمىندا تاشكەنتتىڭ وداققا مۇشە بولۋدان باس تارتپايتىنى بايقالدى.

«كۇنى كەشە عانا ءبىزدىڭ پارلامەنتىمىز جول كارتاسىن ماقۇلدادى. شەكاراداعى ءتاريفتى رەتتەۋ، زاڭدىق نورمالاردى سايكەستەندىرۋ بويىنشا ءبىراز ماسەلە كوتەرىلدى»، – دەدى ل. كۋدراتوۆ.

رەسەي تاراپى وزبەكستان ءۇشىن وداق وتە ءتيىمدى بولادى دەپ سەندىرۋدە. اسىرەسە ەڭبەك ميگرانتتارىنىڭ قۇقىعىن قورعاۋ جانە تاۋار اينالىمىن ارتتىرۋ بويىنشا وداقتىڭ بەرەرى مول دەيدى ماسكەۋ.

Abai.kz