ايماقتىڭ 10 ەلىنەن 200-دەن استام مەملەكەتتىك ورگان وكىلدەرى، پراكتيكتەر مەن ساراپشىلار استانا مەملەكەتتىك قىزمەت حابى مەن قازاقستاندىق HR-مەنەدجەرلەر قاۋىمداستىعىنىڭ «مەملەكەتتىك باسقارۋداعى كادرلىق پروتسەستەر: قيىندىقتارى مەن كەلەشەگى» پانەلدىك سەسسياسىنا قاتىستى. جيىن بەلارۋس رەسپۋبليكاسى پرەزيدەنتى جانىنداعى باسقارۋ اكادەمياسى حالىقارالىق كونفەرەنتسياسى اياسىندا ونلاين فورماتتا ءوتتى.

پانەلدىك سەسسيا ماقساتى  قازىرگى جاعدايدا HR مەنەدجمەنتىن دامىتۋ ءۇشىن يننوۆاتسيالىق شەشىمدەر ىزدەۋ، وزىق تاجىريبە مەن ءبىلىم الماسۋ بولدى. مەملەكەتتىك باسقارۋ تيىمدىلىگىن قامتاماسىز ەتۋدەگى ادامي رەسۋرستارىن باسقارۋ جۇيەسىنىڭ ءرولى دە تالقىعا سالىندى.

پانەلدىك سەسسيا اشىلۋىندا استانا مەملەكەتتىك قىزمەت حابىنىڭ باسقارۋشى كوميتەتىنىڭ توراعاسى اليحان بايمەنوۆ: «ادامي رەسۋرستاردى باسقارۋ ماڭىزدىلىعى قازىرگى كەزدە بۇكىل ادامزات، ونىڭ ىشىندە مەملەكەتتىك قىزمەت تاپ بولعان توتەنشە جاعدايدا ەرەكشە مانگە يە»، - دەدى. ول: «ەگەر مەملەكەتتىك قىزمەتشىلەر مەن ازاماتتاردىڭ ابىرويىنا، ەڭبەگىنە، كۇش-جىگەرى مەن ۋاقىتىنا قۇرمەت كورسەتۋ بارلىق دەڭگەيدە سىڭىرىلسە، مەملەكەتتىك باسقارۋدىڭ كورپوراتيۆتى مادەنيەتى مەن مەملەكەتتىك اپپارات قىزمەتى تيىمدىلىگى ارتادى» - دەپ اتاپ ءوتتى.

بەلارۋc پرەزيدەنتى جانىنداعى باسقارۋ اكادەمياسى رەكتورى ۆياچەسلاۆ دانيلوۆيچ مەملەكەتتىك باسقارۋ جۇيەسىن جەتىلدىرۋ جولىنداعى سەرىكتەستىكتىڭ ماڭىزدىلىعىن اتاپ ءوتتى. قىرعىز رەسپۋبليكاسى مەملەكەتتىك كادر قىزمەتى ديرەكتورى ورىنباسارى ولەگ تaربينسكي استانا حابى ۇيىمداستىرعان تاجىريبە الماسۋ كورشى ەلدەردىڭ، سونىڭ ىشىندە قىرعىز رەسپۋبليكاسى دامۋىندا ەرەكشە ماڭىزعا يە ەكەندىگىن اتاپ ءوتتى.

قازاقستاندىق HR-مەنەدجەرلەر قاۋىمداستىعىنىڭ ۇيلەستىرۋ كەڭەسىنىڭ پرەزيدەنتى گۇلميرا رايسوۆا استانا حابى جوباسى اياسىندا قر پرەزيدەنتىنىڭ جانىنداعى مەملەكەتتىك باسقارۋ اكادەمياسىمەن بىرلەسە وتكىزگەن زەرتتەۋ ناتيجەلەرىمەن تانىستىردى. زەرتتەۋدە ەلىمىزدىڭ جەكە، كۆازيمەملەكەتتىك جانە مەملەكەتتىك سەكتورلارىنىڭ 113 مەكەمەسىنىڭ 5900-دەن استام قىزمەتكەرى قامتىلعان. وسى زەرتتەۋ ارقىلى كادرلىق پروتسەستەردى جەتىلۋ جانە دامۋ دەڭگەيىن انىقتايتىن كەشەندى ادىستەمە سىنالدى.

سەسسيا قاتىسۋشىلارى وسى زەرتتەۋگە اسا قىزىعۋشىلىق تانىتۋىنا بايلانىستى استانا مەملەكەتتىك قىزمەت حابىنىڭ باسقارۋشى كوميتەتى توراعاسى اليحان بايمەنوۆ ايماق ەلدەرىندەگى HR پروتسەستەرىنىڭ جەتىلۋىن باعالاۋ ءۇشىن وسىنداي زەرتتەۋ جۇرگىزۋدى ۇسىندى.

سونىمەن قاتار مەملەكەتتىك قىزمەتتەگى ادامي رەسۋرستاردى باسقارۋ بويىنشا رەفورمالار، HR ۇدەرىستەرىن تسيفرلاندىرۋ جونىندە ءوز ەلدەرىندەگى تاجىريبەمەن، وسى سالاداعى وزەكتى ماسەلەلەرمەن ءازىربايجان، بەلارۋس، گرۋزيا، وزبەكستان، قازاقستان ەلدەرى وكىلەتتى ورگان وكىلدەرى، جەتەكشى ساراپشىلار ءبولىستى. ولار -  ازەربايجان مەملەكەتتىك ەمتيحان ورتالىعى توراعاسىنىڭ ورىنباسارى باحرام حاليلوۆ, بەلارۋc رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى باس زاڭ دەپارتامەنتىنىڭ ەڭبەك قاتىناستارى ءبولىمىنىڭ باسشىسى يرينا پىركو, گرۋزيا مەملەكەتتىك قىزمەت بيۋروسى ادام رەسۋرستارىن باسقارۋ ءبولىمى باسشىسى گۆانتسا بەسەليا, قر مەملەكەتتىك قىزمەت ىستەرى اگەنتتىگى ستراتەگيالىق ازىرلەۋ جانە حالىقارالىق باعدارلامالار دەپارتامەنتى ديرەكتورى ازامات جولمانوۆ جانە وزبەكستان پرەزيدەنتى جانىنداعى مەملەكەتتىك قىزمەتتى دامىتۋ اگەنتتىگىنىڭ پەرسونالدى باسقارۋ ءبولىمىنىڭ مەڭگەرۋشىسى يلحوم قۇربانوۆ.

تالقىلاۋ بارىسىندا سەسسياعا قاتىسۋشىلار ادامي رەسۋرستاردى باسقارۋداعى قازىرگى قيىندىقتار مەن پەرسپەكتيۆالار جونىندە، سونداي-اق جاڭا ستراتەگيالار مەن قۇرالدار تۋرالى ءوز ويلارىمەن ءبولىستى.

Abai.kz