ەلوردادا باس ءمۇفتي ناۋرىزباي قاجى تاعانۇلىنىڭ توراعالىعىمەن قازاقستان مۇسىلماندارى ءدىني باسقارماسىنىڭ كەڭەيتىلگەن تورالقا ءماجىلىسى ءوتتى ،- دەپ حابارلايدى قمدب.

كەڭەيتىلگەن ءماجىلىس بارىسىندا 8 ماسەلە قارالدى. تورالقا ماجىلىسىندە قمدب شاريعات جانە ءپاتۋا ءبولىمىنىڭ مەڭگەرۋشىسى سانسىزباي قۇربانۇلى رامازان ايىنىڭ باستالۋى، قادىر ءتۇنى جانە ورازا ايت كۇندەرى جايلى باياندادى.

بيىل رامازان ايى 13 ساۋىردە باستالىپ، 12 مامىردا اياقتالادى. رامازان ايى 30 كۇن بولادى. 13 مامىر – ورازا ايت كۇنى. 8 مامىردان 9 مامىرعا قاراعان ءتۇن – قادىر ءتۇنى.

سونىمەن قاتار، تورالقا ماجىلىسىندە بيىلعى ءپىتىر ساداقاسىنىڭ، زەكەت پەن ءپىديانىڭ مولشەرى انىقتالدى.

بيىل ءپىتىر مولشەرى 420 تەڭگە بولىپ بەلگىلەندى. پىتىر ساداقانىڭ مولشەرى 2 كەلى ۇننىڭ ورتاشا باعاسىمەن ەسەپتەلدى. ال ۇننىڭ باعاسى قمدب-نىڭ قالا جانە وبلىس وكىلدىكتەرىنىڭ بەرگەن مالىمەتى نەگىزىندە انىقتالدى.

قمدب توراعاسى ناۋرىزباي قاجى تاعانۇلى:

- «ساناۋلى كۇندەردەن سوڭ قاسيەتتى رامازان ايى كىرەدى. مۇسىلمان ۇمبەتى ءۇشىن رامازان – سونداي ءبىر ەرەكشە اي. ەلىمىزدەگى قانشاما باۋىرلارىمىز وسى ايدى كۇتەدى، ورازاسىن ۇستايدى. مەيىرىم مەن كەشىرىمگە، ساۋاپقا تولى ايدى ادەتتەگىدەي ءوز دەڭگەيىندە وتكىزۋدى اللا ءناسىپ ەتسىن! قازىرگى جاعدايدى ەسكەرە وتىرىپ، ەڭ باستىسى تازالىق پەن ءتارتىپ جاعىنا كوڭىل بولسەك. وسى ايدا مەيلىنشە قايىرىمدى ىستەردى كوبىرەك اتقارۋعا شاقىرامىن. جاماعاتتىڭ ىڭعايىنا قاراي ۋاقىتىن بەلگىلەپ ونلاين دارىستەر، قۇران ۇيرەتۋ ساباقتارىن وتكىزۋدى جالعاستىرۋىمىز كەرەك. حالىققا پايدالى ۋاعىز تاراتۋ ماقساتىندا تىكەلەي ەفيرلەر ۇيىمداستىرىپ، مۇمكىندىگى جوق جاندارعا اۋىزاشار پاكەتتەرىن جەتكىزۋ جاعىن قولعا الۋدى تاپسىرامىن» ،- دەدى.

Abai.kz