پاۆلودار قالاسىندا ءمان-ماڭىزى ەسكىرگەن كەيبىر كوشەلەردىڭ اتاۋىن وزگەرتۋ جونىندە قوعامدىق تىڭداۋ وتكىزىلدى. 

جيىن قازىرگى پاندەميا جاعدايىنا بايلانىستى ZOOM باعدارلاماسى ارقىلى ونلاين تارتىبىندە  جۇرگىزىلدى دە، وعان قالالىق كەڭەستىڭ دەپۋتاتى قوبىلان كوجين مودەراتور بولدى. قالا اكىمىنىڭ ورىنباسارى سۆەتلانا گلادىشەۆا اۋىستىرىلۋعا ۇسىنىلعان 30 كوشەنىڭ اتاۋى مەن جاڭا اتاۋلاردى وقىپ، ءتيىستى مالىمەتتەردى ورتاعا سالدى. قوعامدىق ۇيىمدار وكىلدەرى، ەڭبەك ارداگەرلەرى، شىعارماشىلىق ادامدارى پىكىرتالاسقا قاتىسىپ، ءتۇرلى كوزقاراستارى مەن ۇسىنىستارىن ءبىلدىردى. 

تالقىلاۋدىڭ سوڭىندا قالالىق ءماسليحاتتىڭ دەپۋتاتى يگور ۆەرەتنوۆ تۇرعىندار تاراپىنان جاسالعان كەيبىر ەسكەرتپە مەن وتىنىشكە وراي 7 جاڭا اتاۋدى وسى جولى قاراماي، كەيىنگە قالدىرۋ جونىندە وي ايتىپ ەدى، ارىپتەستەرى بىردەن ماقۇلدادى. ال قالعان 23 كوشە اتاۋىنىڭ اۋىستىرىلۋىن  دەپۋتاتتار توبى قولداپ داۋىس بەردى.    

ءبىر اتتەگەنە-ايى، ZOOM كونفەرەنتسياعا 100 ادام عانا قاتىسا الادى ەكەن. نەبىر ءتىل جاناشىرلارى جيىنعا كىرە الماي،   قاتتى قىنجىلدى! دەگەنمەن ايتۋلى وقيعاعا قىزىعۋشىلىق تانىتقان جۇزدەگەن ادام فەيسبۋك جەلىسى ارقىلى جۇرگىزىلگەن تىكەلەي ەفيردى تاماشالاۋ مۇمكىندىگىنە يە بولىپ، قابىلدانعان شەشىمگە ريزاشىلىق سەزىمدەرىن ءبىلدىردى. ايتپاقشى، پاۆلودارلىق اقىن، ەڭبەك ارداگەرى كونستانتين لۋنين ءتارىزدى ۇلتى ورىس جەرلەستەرىمىزدىڭ قانشاسى كوشە اتاۋلارىنىڭ وزگەرۋى قالىپتى جاعداي ەكەنىن اۋەلدەن-اق ايتىپ ءجۇر. بىراق تىڭدايتىن قۇلاق قايدا؟..

بۇدان بۇرىنعى ماقالامىزدا (https://abai.kz/post/130829?fbclid=IwAR2O_4zKiKD0IUiEVT7hiM2MPlQIPYWrWCrX1PdPXlZjTXpKs6u7bqhZo70 ) قالا مەن كوشە اتاۋلارىن اۋىستىستىرۋعا جان-تانىمەن قارسى كەرىتارتپا توپ جايىندا جازعانبىز. ولار بۇل جولى دا ەسكى ادەتىنە باسىپ، ينستاگرام الەۋمەتتىك جەلىسىندەگى pavlo.detka, tipavlo.dar, kerek.pv اككاۋنتتارى ارقىلى شۋ كوتەردى! قازاقستان مەن ءوڭىر تاريحىنان مۇلدە حابارى جوق بىرەۋلەر: «ءبىز بىلمەيتىن ادام اتتارىن نەگە كوشەلەرگە قويادى؟! –  دەپ بايبالام سالدى. ەندى بىرەۋلەرى كوشە اتاۋىنا ۇسىنىلعان تاريحي تۇلعالاردىڭ ەسىم-سويلارىن بۇرمالاپ مىسقىلداپ، ۇلتى قازاق قوعام بەلسەندىلەرىنىڭ  ءىس-ارەكەتتەرىن سىناپ-مىنەدى! ZOOM كونفەرەنتسياعا كىرە الماعاندارى ۇيىمداستىرۋشىلار قاساقانا توسقاۋىل قويدى دەگەن پايىمداۋىن شىندىق ەسەبىندە وتكىزگىسى كەلدى. كەرىسىنشە،  pavlo.detka, kerek.pv اككاۋنتتارىندا قازاق ءتىلى  جاناشىرلارىنىڭ ەنۋىنە شەكتەۋ قويىلىپ، بوگەت جاسالعانى جونىندە  جاق اشپادى. پاتشالىق-كەڭەستىك ءداۋىردى كوكسەۋشىلەردىڭ ءبىرى ونلاين كونفەرەنتسيانىڭ ايقىنداعىشى مەن كىرۋ كودى الدىن-الا وبلىستىق گازەتتەرگە جاريالانعانىن  جادىنان شىعارىپ، بۇل دەرەكتەردى ءتىپتى كەش بىلدىك دەپ ەزەۋرەدى. كەيبىرەۋى وبلىس پەن قالا باسشىلارىنا ايبات شەكتى! جەرگىلىكتى «يربيس» تەلەارناسى دا سولاردىڭ سويىلىن سوقتى. نەگىزگى ماقسات: قوعامدىق تىڭداۋدىڭ زاڭ شەڭبەرىندە وتكەنىن تەرىستەپ، كەڭەس  كەزەڭىن دارىپتەيتىن كوشە اتاۋلارىن ساقتاپ قالۋ ەكەنى امبەگە ايان!  

پاۆلودار قالاسىندا 335 كوشەنىڭ  62-ءسى ء(بىر دەرەكتە 85-ءسى) عانا قازاق تىلىندە ەكەنىن ەستەرىڭىزگە سالامىز. ەندى بۇعان 30 كوشە قوسىلسا دا قازاقى اتاۋلاردىڭ سانى جالپى اتاۋلاردىڭ جارتىسىنا دا جەتپەيدى ەكەن. ونىڭ ۇستىنە پاتشا زامانىندا نارەستە پاتشازادا پاۆەل رومانوۆتىڭ قۇرمەتىنە قويىلعان قالا اتاۋى دا سول ءباز-باياعى قالپىندا تۇر. 

قالاي دەسەك تە، ءبىر جايت انىق: قالاداعى قوعامدىق ۇيىمدار مەن قالانىڭ قۇرمەتتى ازاماتتارىنىڭ ۇسىنىستارى بويىنشا ءتيىستى شەشىم شىعارعان قالالىق ءماسليحات دەپۋتاتتارىنا الگى توپ ىقپال ەتە  المايدى! 

ءبىزدىڭ وبلىس ونوماستيكا ساياساتىن جۇزەگە اسىرۋ باعىتىندا ەلىمىزدىڭ وڭتۇستىك پەن باتىس وڭىرلەرىنەن، الماتى مەن نۇر-سۇلتان قالالارىنان وزىپ كەتپەسە دە، باتىل قيمىلداپ كەلەدى. ەڭ باستىسى، كەرۋەنىمىزدىڭ باعىتى ءتۇزۋ، بارار جەرى ايقىن. ەندەشە، سوڭىمىزدان بايبالام سالعان توپتىڭ ىسىنە رەنىش بىلدىرگەنىمىز دۇرىس ەمەس شىعار...

ارمان قاني،

پاۆلودار قالاسى

Abai.kz