قىرعىزستاندىقتار ىشكى ىستەر مينيسترلىگىنىڭ الدىندا ميتينگ ۇيىمداستىرۋدا. ولار 5 ءساۋىر كۇنى 27 جاستاعى ايزادا قاناتبەكوۆانى ۇرلاپ، ارتىنشا ءولتىرىپ تاستاعان سۇمدىق وقيعادان كەيىن نارازىلىق ءبىلدىرىپ، ميتينگ وتكىزۋدە.  

ميتينگكە قاتىسۋشىلار مينيستر ۇلان نيازبەكوۆ پەن بىشكەك قالاسىنىڭ ىشكى ىستەر باسقارماسىنىڭ باسشىسى باقىت ماتمۋساەۆتى ورنىنان الىپ تاستاۋدى تالاپ ەتۋدە. نارازى توپقا ارنايى وكىل شىققانىمەن، ولار ونىڭ سوزىنە قۇلاق اسپادى. ميتينگىگە جالپى جيىنتىعى 200-دەن استام ادام جينالعان.

5 ءساۋىر كۇنى بەلگىسىز ازامات 27 جاستاعى ايزادا قاناتبەكوۆانى كولىگىنە سالىپ، ۇرلاپ كەتكەن. ىزدەۋ شارالارى بارىسىندا كولىك تابىلدى. كولىكتىڭ ىشىندە ايزادانىڭ جانە كۇدىكتى دەپ تانىلىپ وتىرعان ازاماتتىڭ دەنەسى تابىلعان. الدىن-الا بولجام بويىنشا كۇدىكتى قىزدى قىلقىندىرىپ ءولتىرىپ، ارتىنشا وزىنە قول جۇمساعان. بۇل وقيعا قىرعىزستان حالقىن ءدۇر سىلكىندىردى.

Abai.kz