قازاقتىڭ كونەكتى اقىنى، مەملەكەتتىك سىيلىقتىڭ لاۋرەاتى ەسەنعالي راۋشانوۆ ومىردەن ءوتتى. قارالى حاباردى قازاقستان جازۋشىلار وداعى توراعاسىنىڭ ءبىرىنشى ورىنباسارى، اقىن اقبەرەن ەلگەزەك جەتكىزدى.

«قادىرلى اعايىن! قازاقتىڭ اسا كورنەكتى اقىنى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى ەسەنعالي راۋشانوۆتان ايىرىلىپ قالدىق.

اللا الدىنان جارىلقاسىن. اسىل رۋحى بەيىشتىڭ تورىندە شالقىسىن. قوسىمشا اقپارات كەيىنىرەك بەرىلەدى»، - دەپ جازدى اقبەرەن ەلگەزەك.

ەسەنعالي ءابدىجاپپارۇلى راۋشانوۆ 1957 جىلى قاراقالپاقستاننىڭ حوجەلى قالاسىندا دۇنيەگە كەلگەن. 1976 -1980 جىلدارى ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن.

ەڭبەك جولىن وزبەكستاننىڭ جىزاق وبلىسى ءمىرزاشول اۋدانىنداعى «دوستىق» گازەتىندە ادەبي قىزمەتكەر، ءبولىم مەڭگەرۋشىسى بولىپ باستاعان. ءار جىلدارى «جالىن» جۋرنالىندا ءبولىم مەڭگەرۋشىسى، «اراي» جۋرنالىندا پوەزيا ءبولىمىنىڭ مەڭگەرۋشىسى، جاۋاپتى حاتشى، «زەردە» (بۇرىنعى «ءبىلىم جانە ەڭبەك») جۋرنالىنىڭ باس رەداكتورى (1988 — 95), 1995 جىلدان «جازۋشى» باسپاسىنىڭ ديرەكتورى بولدى.

العاشقى جىر جيناعى «باستاۋ» دەگەن اتپەن 1980 جىلى جارىق كوردى.

«كەلىنتوبە» (1984), «شولپان جۇلدىز تۋعانشا» (1988), «عايشا ءبيبى» (1991, «Aلاش» سىيلىعىن الدى), «قارا باۋىر قاسقالداق» (1995) اتتى جىر كىتاپتارى جارىق كورگەن. كوپتەگەن ولەڭى، پوەمالارى ورىس، ليتۆا، ۋكراين، بولگار، چەح، وزبەك، قىرعىز تىلدەرىنە اۋدارىلعان.

Abai.kz اقپاراتتىق پورتالىنىڭ ۇجىمى، قازاقتىڭ دارا تۇلعالى پەرزەنتى، اقىن ەسەنعالي راۋشانوۆتىڭ قازاسىنا قايعىرىپ، تۋعان-تۋىستارىنا كوڭىل ايتامىز...

سەرىك اقسۇڭقارۇلى:

قوش بول، ارداعىم!

كۇتپەگەن جەردەن ەسەنعالي كەتىپ قالدى... ونى دا مىنا ىندەت الىپ كەتىپتى؟!. قايىرىمسىز سۇم اجال قازاق جىرىنىڭ ءبىر قابىرعاسىن سۋىرىپ الدى، كوزىمىزدى باقىرايتىپ قويىپ!

ادام-اتا - ھاۋ-انادان بەرى ءيىسى قازاقتان بۇعان دەيىن تۋماعان، ەندى قايتا تۋمايتىن اقىن كەلدى دە كەتتى! ونىڭ ورىنى ەندى قازاق جىرىندا عانا ەمەس، كۇللى الەمدىك پوەزيانىڭ تورىندە ماڭگى ۇڭىرەيىپ تۇراتىن بولادى...

ۇلى مۇحاڭنىڭ (م. ماقاتاەۆ):

«تۋادى، تۋادى ءالى ناعىز اقىن،
ناعىز اقىن بال مەن ۋ تامىزىتىن.
جەسىردىڭ ايىرىلماس سىرلاسى بوپ،
جەندەتتىڭ كوزىنەن جاس اعىزاتىن،
تۋادى، تۋادى ءالى ناعىز اقىن!
جىر سوزدەرى جاي بولىپ اتىلعاندا،
اتىلعاندا، اسپاننان وقىلعاندا،
مىلقاۋلارعا ءتىل ءبىتىپ، كەرەڭ ەستىپ،
جانار پايدا بولادى سوقىرلارعا!»، - دەگەن اقىنى وسى ەدى عوي؟!

قوش بول، ارداعىم! ارقاسىندا ۇلتتىق رۋحى شىمىرلاعان قازاق بالاسىنىڭ بارىنە ازا تۇتىپ، كوڭىل ايتامىن!

Abai.kz