بەلگىلى بولعانداي، جانجال تاجىكستاننىڭ سوعدى وبلىسى حوجا الو اۋىلى تۇرعىندارى مەن قىرعىزستاننىڭ باتكەن وبلىسى سۋ كانالى قىزمەتكەرلەرى اراسىندا بولعان.

"باتكەن وبلىسى سۋ كانالى قىزمەتكەرلەرى "گولوۆنوي" دەپ اتالاتىن سۋ كانالىن تازارتپاق بولعان كەزدە، حوجا الو اۋىلىنىڭ 50 شاقتى تۇرعىنى كەلىپ، بۇل جەردە جۇمىس ەكى تاراپ وكىلدەرىنىڭ قاتىسۋىمەن ءجۇرۋى ءتيىس ەكەنىن ايتىپ، توقتاتقان. ەكى جاق سوزگە كەلىپ، تاجىك تۇرعىندار سۋ كانالى قىزمەتكەرلەرىنە تاس لاقتىرعان. زارداپ شەككەندەر جوق. جانجال كەزىندە وق اتىلمادى", - دەپ حابارلايدى قىرعىزستاننىڭ شەكارا قىزمەتى.

ەكى تاراپتىڭ جەرگىلىكتى ءوزىن باسقارۋ وكىلدەرى سۋ كانالىن تازارتۋ جۇمىسىن ۋاقىتشا توقتاتۋ جونىندە كەلىسىمگە كەلگەن.

تاجىكستان تاراپى ازىرگە بۇل وقيعا جايىندا تۇسىنىكتەمە بەرمەدى.

الەۋمەتتىك جەلىلەردە تاراعان ۆيدەوداعا قاراعاندا، داۋ شىققان ايماق ءالى بەلگىلەنبەگەن، دەماركاتسيا جۇرگىزىلمەگەن.

قىرعىزستاندىق باق وقيعا ورنىنا باتكەن جانە يسفارا اۋدانى باسشىلارىنىڭ بارعانىن ايتادى.

قىرعىزستان مەن تاجىكستان اراسىندا شەكارا قاشىقتىعى 970 شاقىرىم. ونىڭ 519 شاقىرىمى بەلگىلەنگەن، قالعان جەر ءالى داۋلى كۇيىندە قالىپ تۇر. داۋلى ايماقتىڭ تۇرعىندارى اراسىندا جانجال ءجيى بولىپ تۇرادى.

Abai.kz