جاڭاوزەندە جالاقى ءوسىرۋدى تالاپ ەتىپ، بىرنەشە كۇننەن بەرى ەرەۋىلدەتىپ جاتقان "مۇنايفيلدسەرۆيس" كومپانياسىنا اۋتسورسينگ كەلىسىم-شارتپەن قىزمەت كورسەتىپ جاتقان "MADIBA" كومپانياسىنىڭ جۇمىسشىلارى 21 ساۋىردە جۇمىس بەرۋشىدەن ەرەۋىلدىڭ "زاڭسىز ەكەنى جايلى" ەسكەرتۋ حات العان،-دەپ حابارلايدى Centralasian.

بۇل تۋرالى جۇمىسشىلاردىڭ وزدەرى حابارلادى.

"MADIBA" مەكەمەسىنىڭ باسشىسى گ.ايتجانوۆ قول قويعان حاتتا ەڭبەك كودەكسىنىڭ 171-172 باپتارىنا سىلتەمە بەرىلىپ، جۇمىسشىلاردىڭ ارەكەتى "زاڭسىز" دەپ جازىلعان.

"جۇمىستى توقتاتۋ تۋرالى ارەكەتتەرىڭىز ەڭبەك كودەكسىنىڭ تالاپتارىنا سايكەس كەلمەيدى، سول سەبەپتى سىزدەرگە بۇگىننەن باستاپ جۇمىستى جالعاستىرۋ تۋرالى ۇسىنىس بەرىلەدى" دەپ جازىلعان حاتتا.

مەكەمە باسشىلىعى حاتتا سونىمەن بىرگە جۇمىسشىلار تالابى "مۇنايفيلدسەرۆيس" كومپانياسى مەن "قازمۇنايگاز" اكتسيونەرلىك قوعامىمەن تالقىلانىپ جاتقانىن دا حابارلاعان.

ەرەۋىلدەگەن جۇمىسشىلار بەلسەندىسىنىڭ ءبىرى جەڭىس بوپيلوۆتىڭ ايتۋىنشا، جۇمىسشىلار تالاپتارى ورىندالماي، تارقاماۋعا بەكىنگەن.

"MADIBA" جاۋاپكەرشىلىگى شەكتەۋلى سەرىكتەستىگىنىڭ ەلۋ شاقتى جۇمىسشىسى جالاقىنى كوبەيتۋدى، وزدەرىن "مۇنايفيلدسەرۆيس" مۇناي سەرۆيس كومپانياسىنا شتاتقا قابىلداۋدى تالاپ ەتىپ، ءۇش كۇننەن بەرى جۇمىستى توقتاتىپ تۇر. ولار 19 ساۋىردە جاڭاوزەن قالاسى اكىمدىگىنىڭ الدىنا بارىپ، پرەزيدەنت قاسىم-جومارت توقاەۆقا ۇندەۋ جاريالاعان ەدى. وندا ولار پرەزيدەنتتەن 2020 جىلدىڭ اياعىندا ءوزى قول قويعان ەڭبەك كودەكسىندەگى 103-باپتاعى وزگەرىستىڭ ورىندالۋىنا كومەكتەسۋىن سۇراعان. بۇل باپقا سايكەس، اۋتسورسينگ كومپانيا جۇمىسشىلارى ولاردى جالعا العان كاسىپورىن جۇمىسشىلارىمەن بىردەي جالاقى الۋى ءتيىس.

جۇمىسشىلاردىڭ ايتۋىنشا، ولار "مۇنايفيلدسەرۆيسكە" ەكى توپقا ءبولىنىپ، قىزمەت ەتەدى. ءبىرىنشى توپ بۇرعىلاۋشىلار كومەكشىسى مىندەتىن اتقارسا، ەكىنشى توپ ءارتۇرلى جۇمىس ىستەيدى.

نارازى جۇمىسشىلار "مۇنايفيلدسەرۆيس" مۇنايشىلارىمەن بىردەي ەڭبەك ەتەتىندەرىن ايتىپ، جالاقىسىن ولاردىڭ دەڭگەيىنە، ياعني 200 مىڭ تەڭگەگە دەيىن ءوسىرۋدى سۇراپ وتىر.

ازاتتىق ءتىلشىسى ازىرگە كومپانيا باسشىلىعىنان جاۋاپ الا المادى. جاڭاوزەن قالاسى اكىمى ماقسات يباعاروۆ بۇعان دەيىن ازاتتىققا "MADIBA" جشس سەرىكتەستىگىن ەڭبەك ينسپەكتورلارىنىڭ تەكسەرىپ جاتقانىن ايتقان.

بۇعان دەيىن جاڭاوزەندە "بۇرعىلاۋ" كومپانياسىنا مەردىگەر "فيركروفت" جشس-ءىنىڭ جۇمىسشىلارى دا وسىعان ۇقساس تالاپ قويىپ، جۇمىسىن توقتاتىپ، ەرەۋىلگە شىققان. 21 ساۋىردە "بۇرعىلاۋ" جۇمىسشىلارى ولاردىڭ ەرەۋىلىن قولداپ، جۇمىسىن ءبىر ساعاتقا توقتاتقان.

Abai.kz